Read Zou LUKE 13 Bible Online

LUKE 13 - Zou bible

LUKE 13

¹Khum hun laitahin tua sunga om mi pawlkhat in, Pilat in Galilee-te’ sisan le amau’ biehpiehnate a halpiehna thu ama kungah a gen uhi.

²Ama in amate kungah, “Tami Galilee-te in tam banga a thuoh ziehun Galilee midang zosie sangin a mawzaw hi dingin na ngaisun uh amah?

³Hi lo hi, ke’n kang ci hi; note na kisiakia sih uleh no zong amate bangin na mangthai sieng ding uhi.

⁴Ahi sihle Siloam tausang in a netlia mi sawm le giette, Jerusalem-a teng midang zosie sangin a gilozaw dingin na ngaisun uh amah?

⁵Hi lo hi, ke’n kang ci hi; note zong na kisiakia sih uleh amate bangin na mangthai sieng ding uhi,” a ci hi.

⁶Tua ciengin ama in tami thugentena a gen hi: “Mi khat in a lengga um sunga kisuon theikung khat nei hi; tua theiga lo dinga a pei ciengin a ga bangma a mu sih hi.

⁷Tuaci’n um cingpa kungah, “En vawi! Tami kum thum sung theiga ka sui vangin khat beh ka mu sih hi. Phua dawh ta’n! Bang dingin leitang mawh nawngkaisah ding ahei?’ a ci hi.

⁸Ama in, ‘Siepa aw, a phung kimkot lei to-in ehlei ka sun masangsie kum khat sung tam bangin omsah phot lai in.

⁹Maikum cienga ang ga leh a hoi hi ding a, ang ga sih leh phua bep in,’ ci-in a dawng hi,” a ci hi.

¹⁰Sabbath ni-in ama in kikhopna inn sungah thu a hil hi.

¹¹Tua zaw lien ciengin khum munah hlabua in kum sawm le kum giet sung a poisah numei khat a om hi. Ama pen a cingbawngin a dingtang thei sih hi.

¹²Jesu in tua nu a mu ciengin ama kungah hlanin, “Numei aw, na natna panin na dam ta hi,” a ci hi.

¹³Ama in tua nu tungah a khut a ngah ciengin ama dingtang thei pai lienin Pasien’ min a phat hi.

¹⁴Ahi vangin Jesu in Sabbath ni-in cina a damsah ziehin kikhopna inn uhpa lungthah a, mihonpite kungah, “Nasep hun ding ni guh tah a om hi; a kidamsah dingin tuami hun sungin hing pei unlen, sabbath ni-in hing pei sih un,” a ci hi.

¹⁵Tua ciengin TOPA in dawngkia-in amate kungah, “No mihoi kipangte aw, sabbath ni-in a buh panin na bawngte uh ahi sihle na laate uh hla-in noma ciet in tui pie dingin na peipi sih uh amah?

¹⁶Satan in kum sawm le kum giet sung a na hencip Abraham’ tanu ahi tami numei nu khu sabbath ni-in a kihencipna panin sutdawh dingin kilawm hi lo amah? a ci hi.

¹⁷Ama in tami thu a gen ciengin a langpangte zosie a maizum mama uhi; tuale a bawl na lamdang zosiete ziehin mipi zosie a lungdam uhi.

¹⁸Tua ahi ziehin ama in, “Pasien’ manggam bang tawh kibang ahei? Bang tawh gente ding ka hei?

¹⁹Mi khat in um sunga a the ankam tang tawh a kibang hi; tua ankam tang khangin singkung golpi suoh a, vana leng vate in a bate tungah bu a bawl uhi,” a ci hi.

²⁰Tuale ama in a genkiana-ah, “Pasien’ manggam bang tawh gente ding ka hei?

²¹Numei khat in vainel law thum a zelsuoh donga a saw tol tawh kibang hi,” a ci hi.

²²Khuopi le khuotate khatzaw khat nawhin Jesu pei kawikawi a, thu a hil kawmin Jerusalem lam manaw-in a zin hi.

²³Mi khat in ama kungah, “TOPA aw, mi tawmno khat beh in hutdamna nga ding amah?” ci-in a dong hi. Ama in amate kungah,

²⁴“Kot kawcih lam tawn a lut ding hakat un; azieh pen note kunga kang ci-in, mi tampi a lut sawm vua, ahi vangin a lut zo sih ding uhi.

²⁵Khatvei inn neipa tho-in kot a khazaw ciengin note in zong a pulamah dingin kot na kiu ding vua, “TOPA aw, kot ei hon in,” na ci ding uhi. Tua ciengin ama in note kungah, ‘Hei pana hing pei ci kang thei sih uhi,” ci-in a dawng hi.

²⁶Tua ciengin note in, ‘Nang tawh an ne-in tui i dawnton ngai zo a, ka gawldung teng vuah zong thu nei hil zo hi,” na ci ding uhi.

²⁷Ahi vangin ama in note kungah, “Ke’n kang ci-in, no hei pana ang pei ci ke’n kang thei sih hi; no, migilote zosie aw, ka kung panin peidawh ta un,” ang ci ding hi.

²⁸Pasien’ manggam sungah Abraham, Isaac, Jacob, le kamsangte zosie omin, note a pulamah ang kipaimang na mu uh ciengin kaana le hagawina a om ding hi.

²⁹Tua ciengin nisuona, nitumna, leilu le leitaw lam panin mite pei-in Pasien’ manggam sungah an a ne ding uhi.

³⁰A nukhia-te masa-in a masate nukhia tahpi ding hi,” a ci hi.

³¹Khum hun laitahin Pharisee-te pawlkhat pei-in ama kungah, “Tam panin kihemkhie ta’n, azieh pen Herod in ang tha sawm hi,” a ci uhi.

³²Ama in amate kungah, “Va pei ta unlen tua ngie kungah, ‘En in, tu ni le zing ciengin dawite notdawhin cinate ka damsah ding a, a ni thum ni-in ka nasep ka man sieng ding hi.

³³Hinanle tuni, zing cieng le thai sung teng ka ma nawtsuohin ka pei ding hi, azieh pen Jerusalem pulamah kamsang khat a kitha ding pieng thei lo hi,’ a ci hi.

³⁴Jerusalem, Jerusalem aw, kamsangte thatin, na kunga ang kisawlte suong tawh na seplia a, aapi in a hla kawmah a tate a huoi bangin na tate tamveipi ka huoi nuom vangin na nuom sih hi.

³⁵En in, na innte kinuasie zo hi. Ke’n kang ci-in, ‘TOPA’ min tawh ang pei pa in thupha nga taheh,’ na ci hun uh ang tun masangsie-in kei nei mu nawn sih ding uhi,” a ci hi.