Read Zou LUKE 16 Bible Online

LUKE 16 - Zou bible

LUKE 16

¹Tua ciengin Jesu in a nuazuite kungah, “Mihau pa khat in neisa kem khat nei a, tua neisa kempa in a neisa teng phengzah gawp hi, ci-in kiheh hi.

²Tuaci’n ama in tuapa hlanin ama kungah, ‘Na tungtang thu ka zahte bang cidan ahei? Nang pen ka neisa kempa hi nawn lo ding na hi ziehin na sum zehna sazien teng ei ap in,’ a ci hi.

³Tua ciengin neisa kempa in a lungsim sungah, “Tu-in ka pupa in ka nasep panin ei tawpsah ahi tah leh bang ka ci ta diei? Lei lai dingin lah ka tha a hat sih a, khutdaw nget ding lah ka maizum hi.

⁴Neisa kempa hina panin ei kitawpsah zaw ciengin mite in a inn vua zin ei tunsah thei nadingin ka sep ding teng ka khensat zo hi,’ a ci hi.

⁵Tuaci’n a pupa tunga leiba ba teng a banbanin hlan a, amasa pen pa kungah, “Nang in ka pu lei bangza na ba ei? ci-in a dong hi.

⁶Ama in, ‘Sathau bung zakhat ka ba hi,’ a ci hi. Tua neisa kempa in ama kungah, ‘Leiba ciemtena laibu va lazuai ta’nlen tosuhin sawm nga-in giel in,’ a ci hi.

⁷Tua ciengin adang khat kungah, ‘Tuale nang in ka pu leiba bangza na nei ei?’ ci-in dong hi. Ama in, ‘Mangbu seu zakhat,’ a ci hi. Ama in tuapa kungah, ‘Na leiba ciemtena lai la inlen, to-in seu sawm gietin giel in,’ a ci hi.

⁸Tuale a dihtat lo neisa kempa pen pilvang tahin a gamtat ziehin a pupa in ama a pahta hi; azieh pen khuovah tate sangin leisiet mite a nasepna vuah a pilvangzaw uhi.

⁹Keima in note tungah kang ci-in, tuate a tawp ciengin kumtawn inn[81] sungah ang lamdot ding lawm suina-in tua a dih lo haunate[82] na zang un.

¹⁰Themno khat tunga a citah poma a tampi tungah citah a, themno khat tunga a citah lo poma a tampi tungah zong citah lo hi.

¹¹Tua ciengin a dih lo hauna[83] tunga na citah sih uleh koi in note adingin hauna tahtah ang ap ngam ding uh ahei?

¹²Midang khat’ neisa tunga na citah sih uleh koi in noma adingin ang ap ngam mawh ding uh ahei?

¹³Koima’ sila in pu ni’ na semton zo lo hi; bang ding ahei cile ama in khat muda-in adang khat it ding a, ahi sihle khat belin adang khat a simmaw ding hi. Pasien’ na le hauna’[84] na na semton thei sih ding uhi,” a ci hi.

¹⁴Sum du Pharisee-te in tam thu zosie a zah ciengun ama a nuisan uhi.

¹⁵Tuaci’n amate kungah, “Mite mai-ah no le no na kidihsah vangun Pasien in na lungtang uh a thei hi; azieh pen mihingte in manpha a sah mama uh nate pen Pasien’ muna-ah a kidahhuoi ahi hi.

¹⁶“John hun cieng dong thukham le kamsangte’ thu na kizang hi; tua zaw lang kalsie Pasien’ manggam lungdamna thu kihil a, tua gam sungah mi zosie in pau lut ding a hanciem uhi.[85]

¹⁷Hinanle thukham laibu sunga om laimal cindawncie khat a manthai ding sangin van le lei a manthai ding baizaw lai hi.

¹⁸“Mi khatpo in a zi a khul a, midang khat tawh a kinun leh ama angkawm suoh a, a kikhulsa numei tawh a kinung mi zong angkawm ma ahi hi.

¹⁹“Khumin mihaupa khat in puon ausan le saihadiel puon sil a, nisimin pawi bawlin nuomsa tahin a om hi.

²⁰Tuale a tunkotah a pumtanga hima vei Lazarus a kici mizawng khat kikoi a,

²¹ama in a gilkiel phat nadingin mihaupa’ sabuoi panin a kie annengte a dugaw hi; uite nangawn pei-in a hima a liepieh zel uhi.

²²Tua mizawng pa si a, vantung mite in Abraham[86] tawh omton dingin ama a puo uhi. Mihaupa zong si-in a kivui hi.

²³Misikhuo ah gawtna thuohin a op laitahin a khuodah leh a gamlapi mun khatah Abraham le a gei-a[87] om Lazarus a galmu hi.

²⁴Ama kiko-in, “Pa Abraham aw, kei ei khuotuo inlen, tami meili lai-ah gimna nahpi tahin thuoh ka hi ziehin Lazarus in a khutme dawn tui die-in ka leii a votsah dingin hing sawl in,” a ci hi.

²⁵Ahi vangin Abraham in, “Ka ta aw, na hin sungin sil hoi teng na nga a, tua ma bangin Lazarus in sil hoi lo teng a nga lam phawh in; hizongle tu-in tam sungah ama nuomsa-in a om a, nang in gimna na thuoh hi.

²⁶Tamte zosie banah i kikal vuah guom thuhpi khat om a, tam lam panin no lamah a galkai nuomte a galkai thei sih vua, tua lam panin ko lamah zong koima a galkai thei sih hi,” a ci hi.

²⁷Ama in, ‘Tua ahileh Pa aw, ka pa inn ah ama ei sawlpieh in, kang thum hi.

²⁸Azieh pen keima in sanggam pasal nga ka nei a, tami bawlsietna munah amate ang tun lo nadingun ama in ei va hilpieh taheh,’ a ci hi.

²⁹Abraham in, ‘Amate in Moses le kamsangte a nei uhi; amate’ thu na ngai ta uheh,’ a ci hi.

³⁰Ama in, ‘Hi lo hi, Abraham aw, misite lah panin khat ka sanggamte kungah va pei leh amate kisiakia ding uhi,’ a ci hi.

³¹Ama in tuapa kungah, ‘Amate in Moses le kamsangte’ thu a man nop sih uleh misite lah nangawn panin mi khat thokia nanle zong a tahsang tuom sih ding uhi,” a ci hi.