Read Zou LUKE 18 Bible Online

LUKE 18 - Zou bible

LUKE 18

¹Tua ciengin Jesu in lungkie lo-a thu nget den ding a kisapna thu tawh kisai-in thugentena tawh thu a hil hi.

²Khuopi khatah Pasien a zatah lo, mi zong a thusim lo thukhen mang khat a om hi.

³Tua khuo sungah meigong numei khat om a, thukhen pa kungah pei den mielmuolin, ‘Ka langpa tungah thu a tangin ei khenpieh in,’ a ci hi.

⁴Ama in bapikhat sung khenpieh nuom lo a, ahi vangin a nua ciengin, ‘Pasien zatah loin mihing zong ka thusim sih vangin,

⁵tami meigong numei in ei subuoi zing ahi ziehin, ama hing pei-in ei gimsah nawn lo nadingin a thu tangtahin ka khenpieh ta ding hi,’ ci-in ngaisun hi,” a ci hi.[93]

⁶Tuale TOPA in, “A dih lo thukhen mangpa thugen ngaisun un.

⁷Sun le zanin ama kunga a kiko ama’ teelsa mite tungah Pasien in thu a tangin khenpieh lo ding amah? Amate panpi ding a kiheh ding amah?

⁸Ke’n kang ci-in, ama in amate tungah thu a nawkhen ding hi. Hizongle Mihing Tapa ang pei ciengin leitungah upna a mu lai diei mah?” a ci hi.

⁹Amau le amau thuman kisa-in a kimuong vua, midangte a simmaw mite tungah zong tami thugentena a gen hi:

¹⁰“Thu ngen dingin biehinn ah mi ni a peito vua, khat pa pen Pharisee ahi a, adang khat pen siehdong pa ahi hi.

¹¹Pharisee-pa dingin thu ngen a, ‘Pasien aw, kei pen midangte bangin misuomte, neisa lahpiehte, angkawmte, ahi sihle tami siehdong pa nangawn tawh zong ka kibah lo ziehin nangma tungah lungdam kang ko hi.

¹²Nipi kal khat sungin an nivei ka tang a, ka nga zosie lah panin sawm-ah-khat zong ka pie hi,’ a ci hi.

¹³Ahi vangin siehdong pa pen a gamlapi ah ding a, van lam nangawn nga ngam loin a awm bengin, ‘Pasien aw, mawnei mi keima ei hepi in!’ ci-in thu a ngen hi.

¹⁴Ke’n kang ci-in, a khat pa sangin dihtangsa-in inn ah tampa a pei hi; azieh pen ama le ama a kitawisang poma in niemkhiehna thuoh ding a, ama le ama a kiniemkhieh poma in tawisangna nga ding hi,” a ci hi.

¹⁵Jesu in a tham thei nadingin mite in ama kungah naupangte a peipi uhi; tuale a nuazuite in a mu ciengin amate a phawhsie uhi.

¹⁶Ahi vangin Jesu in ama kungah naupangte hlanin, “Keima kungah naupangte hing peisah unlen kham sih un; bangzieh ahei cile Pasien’ manggam khu tua bang mite-a’ ahi hi.

¹⁷A tahtah a kang ci-in, naupang banga Pasien’ manggam a sang lo poma tua gam sungah lut ngai lo ding hi,” a ci hi.

¹⁸Uhpa khat in Jesu kungah, “Sie Hoipa aw, kumtawn hinna ka nga thei nadingin bang bawl ding ka hei? ci-in dong hi.

¹⁹Jesu in tuapa kungah, “ Bang zieha kei mihoi nei ci ahei? Pasien khat longal koima a hoi a om sih hi.

²⁰Nang in thukham teng na theisa ahi hi: ‘Ang na kawm sih ding hi; tuol na that sih ding hi; mi neisa na gu sih ding hi; zuou teci na pang sih ding hi; na nu leh na pa zatah ding hi,’ ci hi,” a ci hi.

²¹Ama in, “Tam teng zosie ka neu lai-a kipanin ka zui siengsa ahi hi,” a ci hi.

²²Jesu in tam thu a zah ciengin tuapa kungah, “Na khat na kisam lai hi. Na neisa zosie zua inlen, mizawngte tungah na sumte[94] hawm in, tua hile van gamah gou na nei ding hi; tua ciengin hing pei inlen ka nua ei zui in,” a ci hi.

²³Ahi vangin ama hau mama ahi ziehin tam thu a zah ciengin a da mama hi.

²⁴Jesu in ama en kawmin, “ Pasien’ manggam sungah mihaute a lut ding bang a ci hamsat diei izaw!

²⁵Mihau khat, Pasien’ manggam sunga a lut ding sangin kala-oh khat, hieumei hawm sunga a lut ding baizaw lai hi,” a ci hi.

²⁶Tami thu a za mite in, “Tua bang ahileh koi in gupna nga zo mawh ding ahei?” a ci uhi.

²⁷Ama in, “Mihingte adinga ahi thei lote Pasien adingin hi thei hi,” a ci hi.

²⁸Tua ciengin Peter in, “En in, ko zong ka inn ka lo uh nuasie-in nang kang zui uhi,” a ci hi.

²⁹Jesu in amate kungah, “A tahtah a kang ci-in, Pasien’ manggam ziehin a inn, a zi, a sanggamte, a nu a pa-a kipan a tate nuasie-in,

³⁰tam khanghun ah a za tampi nga a, ang tung ding hunah zong kumtawn hinna a nga lo ding koima a om sih hi,” a ci hi.

³¹Tua ciengin Jesu in sawm le nite hlanin amate kungah, “En un, Jerusalem ah i peito ding a, kamsangte in a na gielsa Mihing Tapa’ thu zosie a tangtung ding hi.

³²Azieh pen Gentile mite khut sungah ama ki-ap ding hi; tuale ama kisimmaw-in, kizako-in, kicilphit ding hi.

³³Amate in ama a sat gawp zaw uh ciengin a that ding vua, tuale a nithum ni ciengin a thokia ding hi,” a ci hi.

³⁴Ahi vangin a nuazuite in tam thute zosie bangma a thei sih uhi; amate tungah ama’ thugente ki-im ahi ziehin a kigen thute a deina a man zo sih uhi.

³⁵Jericho khuo ah Jesu a tun kuonin lam gei-ah mittaw khutdawngen khat na to hi.

³⁶Tua mun nawhin mihonpite pei a zah bepin ama in bang thu ahei, ci-in dong hi.

³⁷Amate in, “Nazareth mi Jesu ang pei ahi hi,” ci-in a gen uhi.

³⁸Tua ciengin ama kiko a, “David Tapa Jesu aw, kei ei hepi in!” a ci hi.

³⁹A mai-a om mite in ama a sip khinkhian nadingin khautahin thu a pie uhi; ahi vangin ama in ,“David Tapa aw, ei hepi in,” ci-in a kinah ko semsem hi.

⁴⁰Jesu khawlin ama kungah ang peipi nadingun thu a pie hi; tuale a gei a tun ciengin Jesu in,

⁴¹“Bang hing bawlpieh leng na nuom ei?” ci-in dong hi. Ama in, “TOPA aw, khuo ei musahkia in,” a ci hi.

⁴²Jesu in ama kungah, “Khuo mu ta in; na upna in nang ang damsah zo hi,” a ci hi.

⁴³Ama in thakhatin khuo mu pai a, Pasien’ min phat kawmin a nua a zui pai hi; mi zosie in a mu ciengun Pasien a phat uhi.