Read Zou LUKE 20 Bible Online

LUKE 20 - Zou bible

LUKE 20

¹Ni khat, Jesu in biehinnpi sungah mite thuhilin lungdamna thu a gen laitahin siempu liente, thukham hil siete, le upate pei-in ama kungah,

²“Bang thuneina tawh tamte na bawl ahei? Tami thuneina koi ang pieh ahei? Ei gen in,” a ci uhi.

³Jesu in amate kungah, “Ke’n zong thu khat kang dong ding hi. Hing gen un:

⁴John’ ki-baptize na pen vantung pana ang pei amah, ahi sihle mihing tung pana ang kipan ahei?” a ci hi.

⁵Amate khatlekhat kikumin, ‘Vantung pan hi,’ ci leih ama in, ‘Bang dinga ama na muon lo uh ahei?’ ei ci ding hi.

⁶Ahi vangin, ‘Mihing kung pan ahi hi,’ ci lei lah John pen amate in kamsang khatin ngaisun uh ahi ziehin mi zosie in suong tawh ei seplia ding uhi,” a kici uhi.

⁷Tuaci’n amate in hei sunga hing pei ahei ci ka thei sih uhi, ci-in a dawng uhi.

⁸Tua ciengin Jesu in amate kungah, “Ke’n zong tamte bang thuneina tawh ka bawl ahei ci kang gen sih ding hi,” a ci hi.

⁹Jesu in mipite kungah tami thugentena a gen hi: Mi khat in lengga lei khat bawl a, huonhlote kawmsahin gamdang khatah sawtveipi a zin hi.

¹⁰Lengga law hun a tun ciengin lengga lei pana pieng ama’ tanh ding teng a nga thei nadingin lohlote kungah nasem khat a sawl hi; ahi vangin lohlote in a nasempa na sat gawpin a khutguohin a peisah uhi.

¹¹Ama in adang nasem khat sawl leuleu hi; amate in tuapa na sat gawpin a na zako vua, a khutguohin na peisah uhi.

¹²Ama in a thumveina nasemte khat ma sawlkia leuleu hi; tuapa zong tua ma bangin liemsahin a notmang uhi.

¹³Tua ciengin lengga lei neipa in, “Bang law ding ka hei? Ka it ka tapa ka sawl ding hi; tua hile amate in na zatah kha sam ding uhi,” a ci hi.

¹⁴Ahi vangin lohlote in ama a mu uh ciengin, “Tampa pen gamhluo ding pa ahi hi; a gamh teng i nga thei nadingin ama i that ding hi,” ci-in a kikup zaw ciengun,

¹⁵lengga lei pulamah notmangin a that uhi. Tua ahile lengga lei neipa in lohlote bang a law ta diei?

¹⁶Lengga lei neipa pei-in lengga huon lohlote that ding a, lo zong midangte a pie ding hi,” a ci hi. Amate in tam thu a zah ciengun, “Tam bangin pieng da taheh!” a ci uhi.

¹⁷Ahi vangin Jesu in amate enin, “Tua ahile: “Innlamte’ nilkhiet suong pen innkiu suongpi a suoh zo hi,” ci-a a kigiel thu khu bang a cinopna adiei?

¹⁸Tua suong tunga a pua mi poma guoicim ding a, tua suong in a khiehkhah poma a dengguoi ding hi,” a ci hi.

¹⁹Jesu in tam thugentena a gen pen amate a cinopna ahi lam thukham hil siete le siempu liente in a thei uh ciengin, tua hun sung ma-in Jesu a man nuom vua, ahi vangin mipite a giing zel uhi.

²⁰Tuaci’n amate in gam-uhpa’ thuneina le vaihawmna sungah a ap thei nadingun, ama’ kam tawh ama thangsie dingin mihoi kipang thukante sawlin a endapsah uhi.

²¹Tua mite in, “Sie aw, na thugen le na thuhilte man mama a, mai-et tuom nei loin Pasien’ lampi mantahin na hil lam kang thei uhi.

²²Caesar kumpipa tungah sieh pieh ding pen thukham tawh a kituoh amah, a kituoh sih ahei?” ci-in a dong uhi.

²³Ahi vangin ama in a ngian uh thei a, amate kungah,

²⁴“Sum denarii khat ei lah un. Tami koi’ lim le koi’ min ahei,” a ci hi. Amate in, “Kumpipa’ lim le min ahi hi,” a ci uhi.

²⁵Jesu in amate kungah, “Tua ahile kumpipa’ nate kumpipa tungah pie unlen, Pasien’ nate Pasien tungah pie un,” a ci hi.

²⁶Amate in mipite mai-ah ama’ thugen tawh thangsie zo loin, a thudawnte zong lamdang a sa mama vua, ham lo phun loin a sip dide uhi.

²⁷Misite thawkiana om lo hi, a ci Sadducee-te pawlkhat ama kungah pei-in

²⁸thukhat a dong vua, “Sie aw, Moses in mi khat’ sanggampa in ta nei loin a zi a sisan leh, tua mipa[97] in tua meigongnu kinunpi-in a sanggam pa adingin ta hinpieh ding hi, ci-in giel hi.

²⁹Tu-in sanggam pasal sagi a om hi; a tapen pa in zi nei a, ta nei loin a si hi.

³⁰Tua ciengin a nina pa

³¹le a thumna pa in tua nu ma a kinunpi vua, tua ma bangin a sagi-un ta nei loin a si sieng uhi.

³²A tawpna ah tua nu zong a si hi.

³³Tua ahi ziehin thawkia ni ciengin tua nu koi pen’ zi ahi diei? Azieh pen a sagi-un ama a kinunpi kim uhi,” a ci uhi.

³⁴Jesu in amate kungah, “Tami khanghun a mite in mopi mohla-in a om uhi;

³⁵ahi vangin sina panin thokia-in ang tung ding khang hun a mun nga dinga kilawm mite in mopi loin mo zong a hla sih ding uhi.

³⁶A tahtahin amate a si thei nawn sih ding uhi, azieh pen thawkiana’ tate ahi ziehun amate pen vantung mite le Pasien’ tate tawh kibang ding uhi.

³⁷Misite a thawkiana thu pen Moses mama in theubawh tangthu sungah na lah a, tua sungah Abraham’ Pasien, Isaac’ Pasien, le Jacob’ Pasien, na ci hi.

³⁸Tu-in ama pen misite’ Pasien hi loin a hingte’ Pasien ahi zaw hi,” a ci hi.

³⁹Tua ciengin thukham hil sie kimkhat in, “Sie aw, na thugen hoi mama hi,” ci-in a dawng uhi.

⁴⁰Azieh pen amate in thu dangte a dong ngam nawn sih uhi.

⁴¹Tua ciengin Jesu in amate kungah, “Bang dinga amate in Messiah[98] pen David’ Tapa hi a ci thei uh ahei?

⁴²Azieh pen David mama in late sung ah, ‘TOPA in ka TOPA tungah,

⁴³na galte ka keng ngahna-a ka bawl masangin ka zietlamah to in,’ ci hi,” a ci hi.

⁴⁴Tua bangin David in ama pen TOPA na ci hi; tuaci’n ama, a tapa bangci hi thei ding ahei,” a ci hi.

⁴⁵Mi zosie’ zahin Jesu in a nuazuite kungah,

⁴⁶“Thukham hil siete na kidawm un. Puontuol silin amate a vah kawikawi nuom vua, vanzuana mun lah po-ah zatah hopi ding dei-in, kikhopna inn sungah tona thupi pente-ah a to nuom se vua, pawi bawlna munte-ah zong uliente tona-ah a to nuom na lai uhi.

⁴⁷Amate in meigongte’ inn a valtum vua, a kilimlawm dingin thu a sawt nget giap uhi. Amate in mawsah thukhenna a lienzaw a thuoh ding uhi,” a ci hi.