Read Zou LUKE 21 Bible Online

LUKE 21 - Zou bible

LUKE 21

¹Jesu a khuodah leh mihaute in sumpi kuong sunga a sumpi khieh uh a mu a,

²mizawng meigongnu khat in zong dangka san tang ni a khieh a mu hi.

³Ama in, “A tahtah a kang ci-in, tami mizawng meigongnu in amate zosie sangin a tam khiehzaw hi;

⁴azieh pen amate zosie in a hauna uh panin a khieh uh ahi a, ahi vangin tua nu in a zawn kawmkal panin a kiva nading a neisun teng a khie sieng hi,” a ci hi.

⁵Mi pawlkhat in biehinnpi pen suong hoi mamate tawh a kizep dan le Pasien tungah letsongte a kipieh dan teng a gen ciengun Jesu in,

⁶“Na mu uh tami nate tawh kisai-in suong khat tungah adang suong khat beh kithuop loin a kicipzan hun ang tung ding hi,” a ci hi.

⁷Amate in, “Siepa, tam thute bang cih ciengin ang pieng ding a, tam thute ang pien kuon ciengin bang limte ang om ding ahei? ci-in a dong uhi.

⁸Jesu in, “Koima in ang puimang lo nadingun kidawm un; azieh pen keima’ min suongin mi tampi ang pei ding a, “Kei, ama ka hi hi! ‘A hun ang nai ta hi!’ ang ci ding uhi. Tua bang mite na zui sih un.

⁹Gal kikapnate le kumpi ledona thute na zah ciengun zau sih un; azieh pen tam thute ang pieng masa ding ma ahi a, ahi vangin hun tawpna in ang zui pai nai sih ding hi,” a ci hi.

¹⁰Tua ciengin Jesu in amate kungah, “Minam khat le minam khat, gam khat le gam khat ang kido ding hi;

¹¹zil nahpi-in ang ling ding a, mun tuomtuom ah kielpi le pul natna ang tung ding hi; tuale van tung panin dipkuotna le lim lamdangte ang pieng ding hi.

¹²“Ahi vangin tam thute ang tun masangin keima’ min ziehin amate in note hing manin ang bawlsie ding uhi; amate in kikhopna innte le thong sungah ang ap ding vua, keima’ min ziehin kumpite le gam-uhte mai-ah ang kipeipi ding uhi.

¹³Tami in na teci pan nading uh hun lemtang ang pie ding hi.

¹⁴Tuaci’n note in na lungsim sung vuah na kihut nading uh ngaisun masa sih un;

¹⁵azieh pen keima in na langte uh koima khat beh in nielin ang nan zo lo nadingun gen ding thute le pilna kang pie ding hi.

¹⁶Na nu na pate, na sanggamte, na hieng nasante ule na lawm na guolte nangawn un zong ang khie ding vua, pawlkhat in thana na thuoh ding uhi.

¹⁷Keima’ min ziehin mi zosie in ang muda ding uhi.

¹⁸Ahi vangin na samzam uh khat zong a mangthai sih ding hi.

¹⁹Note in thuohzawhna tawh na hinna uh na hu zo ding uhi.

²⁰“Galkapte in Jerusalem khuopi a kui-im na mu uh ciengin tua khuopi a kisuhsiet nading ang nai zo hi, ci-in thei ta un.

²¹Tua hun ciengin Judea gam a omte muol tungah tai-in, khuopi sunga omte in khuopi nuasie-in, gam sunga omte in khuopi sung lut nawn sih uheh.

²²Bang zieh ahei cile tua hun pen a kigielsa thu zosie a tangtun nadinga phulah ni ahi hi.

²³Khum ni ciengin naupaite le nausen nawi tepsah laite in gimna a thuoh ding uhi! Azieh pen leitungah gimna lienpi tung ding a, tam mite tungah lungthahna a tung ding hi;

²⁴namsau tawh a si ding vua, minam zosiete lahah salin amate kikai ding hi; Gentile-te’ hun a tun masangsie, Gentile-te in Jerusalem khuopi a tuoncil ding uhi.

²⁵“Ni, hla le aasite tungah limte ang om ding a, tuipi le tuihuol gingte ziehin leitung minamte lahah hamsatna le buoina a om ding hi.

²⁶Leitunga ang pieng ding thute a ngaisutna ziehun mite zau-in sibup ding uhi, azieh pen vantunga om nate kiling ding hi.

²⁷Tua ciengin Mihing Tapa in vanglietna le minthanna sang pen tawh meiilum lahah ang pei amate in a mu ding uhi.

²⁸Tu-in tam thute a pien ding ang kipat ciengin na kitatkhiet ding uh a hun ang nai ta ahi ziehin na lu uh phongin khuodah un,” a ci hi.

²⁹Tua ciengin Jesu in thugentena khat a gen hi: “Theikung le singkung zosie en un;

³⁰a nate ang dawn ciengin khuokhal hun ang nai zo ta hi, ci-in na thei uhi.

³¹Tua ma bangin tam thute ang pien na mu ciengun Pasien’ manggam ang nai ta hi, ci-in thei ta un.

³²Ke’n a tahtah a kang ci-in, tam thute zosie ang tun masangsie tami khang mite a mangthai sih ding uhi.

³³Vanpi le leipi mangthai zong nanle ka thute mangthai lo ding hi.

³⁴“Na pilvang bo un, na lungsim uh lalthangin zukhamna le hinkhuo ading lunghimawna in ang thazaw gawp ding a, na muonmaw lo laitahun thang kisai bangin note tungah tua ni ang tung ding hi.

³⁶Ang tung ding tam thute zosie panin na suotah thei nadingun thahatna na nei nading ule Mihing Tapa mai-ah na din thei nadingun a tawntungin thu ngenin na pilvang un,” a ci hi.

³⁷Ama in biehinnpi sungah nisielin thu hil a, zan ciengin Olive muolah a gieh dingin a pei hi.

³⁸Biehinnpi sunga a thuhilna ngai dingin zingmawngin mi zosie a thobai uhi.