Read Zou LUKE 22 Bible Online

LUKE 22 - Zou bible

LUKE 22

¹Tu-in Peisan Pawi a kici Tolsawlo Anlum Pawi hun a nai ta hi.

²Siempu liente le thukham hil siete in mihonpi a giin ziehun Jesu tha thei nading lampi a suidap uhi.

³Tua ciengin sawm le nite lahah khat ahi Judas Iscariot kici pa sungah Satan a lut hi;

⁴ama pei-in siempu liente le biehinncing palihbute tawh Jesu leheh dan ding a kikum uhi.

⁵Amate a nuom mama vua, sum pieh dingin a kithukim uhi.

⁶Tuaci’n Judas Iscariot zong thukim a, mipite’ op lo kalin amau’ khut sungah Jesu leheh thei nading hun lemtang a sui hi.

⁷Tua ciengin Peisan tuuno tawh biehpiehna kibawl ni ahi Tolsawlo Anlum Pawi a tung hi.

⁸Tuaci’n Jesu in Peter le John sawlin, “Pei ta unlen i neh ding Peisan Pawi ankuong va bawl ta un,” ci-in a gen hi.

⁹Ama gel in, “Hei sungah va bawl ta gel leng na dei ei? ci-in ama a dong uhi.

¹⁰Jesu in ama gel kungah, “Ngai gel in,” a ci a, “Khuopi sung na lut cieng gelin tui beel a tui puo pasal khat tawh na kituoh ding uhi; ama lutna inn ah ama zui gel inlen

¹¹innteh pa kungah, ‘Siepa in ka nuazuite tawh Peisan Pawi an ka neh nading uh zin tunna innkhan hei sung ahei, ei dongsah hi,’ va ci ta un,” a ci hi.

¹²Ama in a kipuosa innkhan tungnung pen a khan gol khat ang lah ding hi. Eite adingin tua munah na bawl khol gel in,” a ci hi.

¹³Tuaci’n amate pei-in a kung vua a gen bangin a mu mintah vua, tua munah Peisan Pawi an neh ding a siemkhol gel hi.

¹⁴A hun a tun ciengin sawltahpite tawh sabuoi-ah Jesu a toton hi.

¹⁵Jesu in amate kungah, “Gimna ka thuoh masangin note tawh tami Peisan Pawi an nehton ding ka lunggul mama hi;

¹⁶azieh pen ke’n kang ci-in, Pasien’ manggam sungah tam thu a tangtun masangsie-in ka ne nawn sih ding hi,”[99] a ci hi.

¹⁷Tua ciengin ama in hai la-in lungdam a ko zaw ciengin, “Tami hai la unlen, note lahah hawm un;

¹⁸azieh pen ke’n kang ci-in, Pasien’ manggam ang tun masangsie tu-a kipanin lenggazu ka dawn nawn sih ding hi,” a ci hi.

¹⁹Tua ciengin khomun zong la-in lungdam a ko zaw ciengin balkehin, “Tami in note dinga ang kipie ka pumpi ahi hi. Kei nei phaw nadingun tam bangin bawl un,” ci-in amate a pie hi.

²⁰Tua ma bangin nitah an a neh zaw ciengun hai zong la-in, “Tami hai in note dinga ang luongkhie ka sisan tawh a kikipsah thuciemna tha ahi hi.[100]

²¹Ahi vangin en un, keima ei leheh pa’ khut in sabuoi tungah keima tawh a om hi.

²²A kisesa bangin Mihing Tapa pei ding a, ahi vangin ama a leheh pa in gimna a thuoh ding hi,” a ci hi.

²³Tua ciengin tam banga gamta ding koi pen hi ding ahei, ci-in khatlekhat a kidong uhi.

²⁴Amate lahah koi lienpen ding ahei, ci-in a nuazuite khatlekhat a kisel uhi.

²⁵Ahi vangin Jesu in amate kungah, “ Gentile kumpite in amate tungah uhna aana zang uhi; tuale amate tunga thunei mite pen thupha bawlte kici hi.

²⁶Ahi vangin no tua bang na hi sih ding uhi; note lahah a lienpen pa a neupen pa bangin om zaw ding a, makai pa nasem bangin om ding hi.

²⁷Sabuoi tunga a to pa le an piepa koi lienzaw ahei? Sabuoi tunga a to pa ahi sih amah? Ahi vangin kei pen note lahah anpie pa bang ka hi hi.

²⁸Note pen gimna ka thuoh sunga ei thuohpite na hi uhi.

²⁹Ka pa in keima tungah gam ei pieh ma bangin,

³⁰tuaci’n note in zong ka gam sunga ka sabuoi-ah anne tuidawnin na om thei nading ule thukhenna topha tungah to-in Israel minam sawm le nite tungah thu na khen thei nading uh ahi hi,” a ci hi.

³¹“Simon, Simon aw, ngai vawi! Satan in buhum zoi banga ang zoi thei nadingin ang ngen[101] zo hi.

³²Ahi vangin na upna na hlasuo lo nadingin thu kang ngetpieh zo hi; nang kiheikia ciengin na sanggamte na thakhausah in,” a ci hi.

³³Tuale Simon in, “TOPA aw, thong le sina-ah nangma tawh peiton dingin a kigingsa-in ka om hi,” a ci hi.

³⁴Jesu in, “Peter aw, ke’n kang ci-in, ‘Ama ka thei kha sih hi,’ ci-in tuni-in thumvei nei niel masangsie aah khuong lo ding hi,” a ci hi.

³⁵Jesu in amate kungah, “Sum ip, thung-ip le khedapte keng lo-a kang sawl lai-in tasapna na nei uh amah? a ci hi. Amate in, “Bangma tasapna ka nei sih uhi,” a ci uhi.

³⁶Tua ciengin Jesu in, “Ahi vangin tu-in sum-ip nei pa in keng hinlen, tua ma bangin thung-ip nei pa in zong keng heh. Namsau nei lo pa in a puon-ah zua-in lei heh.

³⁷Azieh pen ke’n kang ci-in, “Thukham palsatte lahah ama kisimtha hi,” ci-a a kigiel tami Lai Siengtho kei tungah ang tung valon ding hi,” a ci hi.

³⁸Amate in, “TOPA aw, en in, tam sungah namsau ni a om hi,” a ci hi. Ama in, “Tua ahile pha zo ta hi,” a ci hi.

³⁹Jesu a pei ngai bangin Olive Muol tungah pei a, a nuazuite in ama a zui uhi.

⁴⁰Khum munah ama a tun ciengin amate kungah, “Solna na thuoh lo nadingun thu ngen un,” a ci hi.[102]

⁴¹Tua ciengin amate kung panin suongse khat tan bang nuakin a, tuale khupdinin thu ngen a,

⁴²“Pa aw, na deina a op leh keima kung panin tami hai hemkhie ta’n; hizongle keima’ dei bang hi sih hinlen nangma’ dei bang hi taheh,” a ci hi.

⁴³(Tua ciengin vantung panin ama kungah vantungmi khat kilang a, ama a thakhausah hi.

⁴⁴A lunggim ziehin ama in nahpi-in thu ngen a, a khuosa sisan mal golpi bangin lei-ah a taa hi.)[103]

⁴⁵A thungetna panin ama a dinto ciengin a nuazuite kungah a pei leh amate da luo kisa-in a kimut laitah uh a tuohkha hi.

⁴⁶Tuale Jesu in amate kungah, “Bang dinga kimu na hi uh ahei? Tho unlen solna na thuoh lo nadingun thu ngen un,” a ci hi.[104]

⁴⁷Ama in thu a gen laitahin sawm le nite lahah khat ahi Judas a kici mipa makai-in mihonpite a tung uhi. Ama in Jesu nam dingin a a kung a neh hi;

⁴⁸ahi vangin Jesu in, “Judas aw, nang in khatvei napna tawh Mihing Tapa leheh ding na hi amah?” a ci hi.

⁴⁹A kima om mite in a thupieng ding teng a mu ciengun Jesu kungah, “TOPA aw, namsau tawh ka sat ta ding vuoi mah? ci-in a dong uhi.

⁵⁰Tua ciengin amate lahah khat in siempu lien pa’ sila khat a sat leh a zietlam bil a bantan hi.

⁵¹Ahi vangin Jesu in, “Tam kan bawl nawn sih un!” ci-in a bil thampiehin a damsah hi.

⁵²Tua ciengin Jesu in ama man dinga a kuon siempu liente, biehinncing palihbute, le upate kungah, “Misuom khat a man ding bangin kei ei man dingin namsau le phohbul tawh ang kuon na hi uh amah?

⁵³Biehinnpi sungah note tawh nisielin ka opton lai-in lah ka tungah khut na nga sih uhi. Ahi vangin tam pen na hun uh ahi a, khuomiel thunei hun ahi hi,” a ci hi.

⁵⁴Tua ciengin amate in Jesu manin siempupa inn ah a peipi uhi. Ahi vangin Peter in a kihalin a zui hi.

⁵⁵Leituol laikim ah meitaw-in amate a toton laitahun Peter zong amate lahah a to hi.

⁵⁶Tua ciengin nasem numei no khat in mei gei-a a to Peter a mu bepin encienin ama kungah, “Tampa zong ama tawh kigop khat ahi hi,” a ci hi.

⁵⁷Ahi vangin ama kilepin, “Numei aw, ama ka thei kha sih hi,” ci-in a niel hi.

⁵⁸Bakhat zaw ciengin midang khat in mu leuleu a, “Nang zong amate lahah khat hi ngel veteh aw,” a ci hi. Ahi vangin Peter in, “Hi sih veng aw, nang pa,” a ci hi.

⁵⁹Tua ciengin nai khat bang a sawt ciengin midang khat ma in ama kungah, “Tam pa zong Jesu tawh kigop tahtah ahi hi; azieh pen ama Galilee mi khat ahi hi,” a ci hi.

⁶⁰Ahi vangin Peter in, “Nang pa, na gen thu thei kha vawt sing!” a ci hi. Tua hun laitahin thakhatin aah a khuong hi.

⁶¹TOPA zong kihei-in Peter a en hi. Tua ciengin Peter in, “Tu ni aah khuon masangin thumvei nei niel ding hi,” ci-a TOPA gensa thu a phawh hi.

⁶²Peter zong pusuohin nahpi tahin a kap hi.

⁶³Tu-in Jesu a mante in zako le vuoh a kipan uhi;

⁶⁴puon tawh a mit a tuompieh zaw ciengun, “Ang sat koi ahiei? Gen vawi,” ci-in a dong mielmuol uhi.

⁶⁵Amate in ama tungah zakona kam tampi a zang uhi.

⁶⁶Khuo a vah ciengin tangpi upa vaihawmte, siempu liente le thukham hil siete kikhawmin thukhen uliente mai-ah Jesu a peipi uhi.

⁶⁷Amate in, “Nang Messiah[105] na hi leh ei gen in,” a ci uhi. Ama in, “Ke’n hing gen leng note in na um sih ding uhi;

⁶⁸hing dong leng zong nei dawng sih ding uhi.

⁶⁹Ahi vangin tu-a kipanin Pasien’ vanglietna zietlamah Mihing Tapa a to ding hi,” a ci hi.

⁷⁰Amate zosie in, “Tua ahile nang Pasien’ Tapa na hiei mah? ci-in a dong uhi. Ama in amate kungah, “Na ci bangun ka hi hi,” a ci hi.

⁷¹Amate in a unpi-un, “Adang teci bang kisam lai ahei? Ama kam tehteh panin i za zo ta uhi!” a ci uhi.