Read Zou LUKE 4 Bible Online

LUKE 4 - Zou bible

LUKE 4

¹Hlagau Siengtho tawh kidimsa-in Jordan gun panin Jesu kinuale kia-in, Hlagau in ama gamlahah zawpi a,

²khum sungah dawimangpa in ni sawm li sung a ze-et hi. Ama in khum hun sung tungtawnin an bangma ne lo a, a ni a cin ciengin a gil kiel mama hi.

³Dawimangpa in ama kungah, “Nang Pasien’ Tapa na hi leh tami suongte khomun a suo nadingin thu pie in,” a ci hi.

⁴Jesu in, ‘Mihingte khomun beh tawh a nungta hi lo hi,’ ci-in kigiel hi,” ci-in a dawng hi.

⁵Tua ciengin dawimangpa in muol dawnah Jesu peipi to a, leitung gam zosie bakhat sung lah hi.

⁶Tuale dawimangpa in ama kungah, “Tam teng zosie keima tungah ei kipie zo ahi ziehin ka pieh nop popo ka pie thei hi; tami thuneina le thupina zosie nang tungah kang pie ding hi.

⁷Tua ahi ciengin kei nei bieh leh tam teng zosie a unpi-in nang-a’ hi ding hi,” a ci hi.

⁸Jesu in ama kungah, “’TOPA na Pasien bie inlen ama’ na beh sem in,’ ci-in kigiel hi,” ci-in a dawng hi.

⁹Tua ciengin dawimangpa in Jerusalem ah peipi a, biehinnpi khumvum ah koi-in ama kungah, “ Pasien’ Tapa na hi leh tam panin kumsuh in.

¹⁰Azieh pen, ‘Ama in nang ang cing dingin vantung mite thu pie ding a,

¹¹na keng suong tawh na tawhkhah lo nadingin a khut utawh nang ang dom ding uhi,’ ci-in kigiel hi,” a ci hi.

¹²Tuale Jesu in, “’TOPA na Pasien na ze-et sin,’ ci-in kigiel hi,” ci-in a dawng hi.

¹³Dawimangpa in a ze-et nading zosie a man sieng zaw ciengin hun lemtang a nga masangsie ama a peisan phot hi.

¹⁴Hlagau’ vanglietna tawh kidimin Galilee gamah Jesu kilekia a, a kimvela gam sung zosie-ah ama thu a kizel hi.

¹⁵A kikhopna uh innte ah thuhil kipan a, mi zosie in ama a phat uhi.

¹⁶A khankhietna Nazareth ah ama tung a, a pei ngaina bangin Sabbath ni-in kikhopna inn sungah a lut hi. Lai Siengtho sim dingin dingto a, tuale

¹⁷kamsang Isaiah laiziel khat kipie hi. Ama in tua laiziel a phen leh tam bang teng kigielna mun a mu hi:

¹⁸“Keima tungah TOPA’ Hlagau ang om hi, azieh pen mizawngte kungah lungdamna thu a gen ding, sal tang mite kungah suotahna thu a phuongzah ding, mittawte in khuo mukia-in, gawtna a thuoh mite in suotahna a nga thei nading le

¹⁹TOPA’ angvan hun a genkhie dingin ama in keima sathau ei nu zo hi,” a ci hi.

²⁰Tuale ama in tua laiziel a khup dawh a, kikhopna inncingpa kungah pie-in a tosuh hi. Kikhopna inn sunga a om mi zosie in ama mittuhna-in a nei uhi.

²¹Tua ciengin amate kungah thugen ding kipan a, “Tuni-in na zahna vuah tami Lai Siengtho tangtung zo hi,” a ci hi.

²²Mi zosie in ama a genpha vua, a kam pana a pusuoh a kilawm ama’ kammal hoite lamdang sa uh ahi ziehin, “Tam pa Joseph’ tapa hi lo amah?” a ci uhi.

²³Ama in a kung vuah, “’Sievuonpa aw, nang le nang kidamsah in! ci tami paunah pen keima tungah nang zang valon ding vua, ‘Tam na pienna khuo-ah zong Capernaum khuo-a na sil bawl ka zahte uh hing bawl in,’ nei ci ding uhi,” a ci hi.

²⁴Ama in, “A tahtah a kang ci-in, a pienna khuo-ah kamsang koima khat beh a kisang om lo hi.

²⁵Ahi vangin a tahtahin ci leih, Elijah hunin kum thum le alang sung van kikhah a, guo zu loin mun zosie-ah kielpi a tun lai-in, Israel-te sungah meigong numei tampi a om hi.

²⁶Ahi vangin Sidon gam Zarephath khuo meigong nu khat kungah ci simlo meigong koima dangte kungah Elijah kisawl lo hi.

²⁷Kamsang Elisha hun lai-in Israel-te sungah miphah[23] tampi om a, ahi vangin Syria mi Naaman ci sim lo koima kidamsah lo hi,” a ci hi.

²⁸Tami thu a zah ciengun kikhopna inn sunga a om mi zosie a lungthah mama uhi.

²⁹Amate dingto-in khuo pulamah ama a notmang vua, kensang dawn panin a bungbu lama a sawnthop thei nadingun a khuopi uh kilamna muoldawn kenah a peipi uhi.

³⁰Ahi vangin Jesu in amau’ laizang nawhin a peimang ta hi.

³¹Galilee gam Capernaum khuo ah ama peisuhin Sabbath ni-in amate thu a hil hi.

³²Amate in a thuhilna lamdang a sa uhi, azieh pen ama in thuneina tawh thu a gen giap hi.

³³Khumin kikhopna inn sungah hlabua a nei pasal khat om a, ama nahpi-in kiko-in,

³⁴“Nazareth mi Jesu aw, ko guoh ei omsah lel ven! Ko bang ei law nuom na hei? Ko ei susie dinga ang pei na hi amah? Pasien’ Misiengtho Pa na hi lam kang thei hi,” a ci hi.

³⁵Ahi vangin Jesu in “Ham sinlen ama kung panin pusuoh in!” ci-in a hosie hi. Tua dawi in amate mai-ah ama puasah a, bangma law loin a sung panin a pusuoh hi.

³⁶Amate in a unpi-un lamdang a sa vua, “Tami thu bangci dan adiei? Azieh pen ama in thuneina le vanglietna tawh hlabuate thu a pieh ciengin a taimang uhi,” ci-in khatlekhat a kiho uhi.

³⁷Tuale tua kuom muncin tengah ama’ thu a kizel hi.

³⁸Kikhopna inn panin a pei zaw ciengin Simon inn ah ama a lut hi. Tua laitahin Simon’ sungnu cithuo-in gim mama a, Jesu kungah ama adingin huna a ngen uhi.

³⁹Tua ciengin tua nu kungah ama ding phei a, a cithuo natna a hosiet ciengin ama a dam pai hi. Thakhatin tua nu thoto-in zindo a kipan pai hi.

⁴⁰Ni tum ciengin ama kungah natna tuomtuom a nei mi zosie a peipi vua, ama in a tung vuoh khut nga-in a damsah hi.

⁴¹Mi tampi sung panin dawite zong a pusuoh vua, “Nang Pasien’ Tapa na hi hi!” ci-in a kiko uhi. Hinanle dawite in ama Messiah[24] ahi lam a thei ziehun tuate phawhsie-in thu a gensah sih hi.

⁴²Khuo a vah ciengin khum mun panin mun sip khatah a peikhie hi. Tuale mihonpi in ama a sui uhi; ama a mu ciengun amate a nuasie lo nadingin a hlo uhi.

⁴³Hinanle Jesu in amate kungah, “Khuopi dangte ah zong Pasien’ manggam lungdamna thu ka tangko ding hi; azieh pen tami dinga ei kisawl ahi hi,” a ci hi.

⁴⁴Tuaci’n Judea[25]gam sunga kikhopna innte ah ama in thu a hil suoh hi.