Read Zou LUKE 6 Bible Online

LUKE 6 - Zou bible

LUKE 6

¹Sabbath ni khatin[28] mangbu leite nawhin Jesu a pei laitahin a nuazuite in mangbuvui a zut vua, a khut utawh nuoi-in a ne uhi.

²Ahi vangin Pharisee-te pawlkhat in, “Sabbath ni-a bawl dinga kilawm lo nate bang dinga na bawl uh ahei?” a ci uhi.

³Jesu in, “David in a pawlte tawh a gilkiel laitahun bang bawl ci na sim ngai sih uh amah?

⁴Pasien biehinn sungah lutin siempute longal midangte’ neh dinga a kilawm lo Ompina Anlum la-in ne a, a pawlte zong pie lai hi lo amah?” ci-in a dawng hi.

⁵Tua ciengin amate kungah, “Mihing Tapa pen Sabbath’ uhpa ahi hi,” a ci hi.

⁶Sabbath ni dang khatin kikhopna inn sungah ama lutin thu hil a, tua munah a zietlam khut a zaw mi khat a om hi.

⁷Tuale thukham hil siete le Pharisee-te in ama a mawmat thei nadingun Sabbath ni-in mi ang damsah mawng ei mah, ci-in ama a kai-hlit uhi.

⁸A ngaisutnate uh a thei vangin ama in khutzaw mipa kungah, “Hing pei inlen tanah hing ding ta’n,” a ci hi. Ama thoto-in tua munah a ding pai hi.

⁹Tua ciengin Jesu in amate kungah, “Note kang dong hi, sabbath ni-in a sie bawl ding le a pha bawl ding, hinna hutdam ding le suhsiet ding, koi pen thukham tawh a kituoh ei?” a ci hi.

¹⁰Amate zosie a et kawikawi zaw ciengin Jesu in tua pa kungah, “Na khut zah vawi,” a ci hi. Ama in tua bangin a zah leh a khut a ngaingai a bangkia hi.

¹¹Ahi vangin amate a lungthah mama vua, Jesu bang i law thei diei, ci-in khatlekhat a kikum uhi.

¹²Khum hunlai-in thugen dingin muoltungah Jesu kato a, zan thapai-in Pasien kungah thu ngen hi.

¹³Khuo ang vah ciengin ama in a nuazuite hlanin mi sawm le ni teel a, tua teng sawltahpite ci-in minvaw hi:

¹⁴Peter ci-a min a vaw pa Simon le a sanggampa Andrew, James le John, Philip, Bartholomew,

¹⁵Matthew le Thomas, Alpheaus’ tapa James le Zealot kici Simon,

¹⁶James’ tapa Judas le a lehehpa Judas Iscariot-te ahi uhi.

¹⁷Ama in a nuazui mihon tampite le Judea, Jerusalem, Tyre le Sidon tuipi dung pana a pei mi zosie tawh kumsuhin munzang khatah a ding uhi.

¹⁸Amate ahile a thugen ngai ding le a natna uh panin damna a nga nuom zieh vua pei uh ahi hi; tuale hlabua in a bawlsiet mite zong kidamsah hi.

¹⁹Tuale ama tung panin vanglietna pusuohin amate a unpi-un a damsah ziehin, mihonpi zosie in ama tham ding a hanciem uhi.

²⁰Tua ciengin Jesu in a nuazuite ento a: “No mizawngte thupha nga na hi uhi, azieh pen Pasien’ manggam noma-a’ ahi hi.

²¹Tulai taha a gilkielte thupha nga na hi uhi, azieh pen na gil uh a va ding hi. Tu-a a kap a maute thupha nga na hi uhi, azieh pen na nui ding uhi.

²²“Mihing Tapa ziehin mite in hing muda-in ang puse vua, hing hosie-in ang gensiet[29] ciengun mi hampha na hi uhi.

²³Vantunga na nga ding uh thaman lien mama ahi ziehin tua bang hun ciengin kipahin dieng un, azieh pen a pu a pate un zong kamsangte tungah tua bangin a bawl uhi.

²⁴“Ahi vangin no mihaute in gimna na thuoh ding uhi, azieh pen note in henepna na nga zo uhi.

²⁵Tu hun a a gilva note in gimna na thuoh ding uhi, bangzieh ahei cile note na gilkiel ding uhi. Tu hun a a nui note in gimna na thuoh ding uhi, bangzieh ahei cile note kapin na mau ding uhi.

²⁶“Mi zosie in ang genphat ciengun gimna a thuoh ding na hi uhi, bangzieh ahei cile a pu a pate un zong kamsang zuoute tungah tua bangin a bawl uhi.

²⁷“Ahi vangin ka thugen a ngai note kungah kang ci-in, na galte na it unlen, ang mudate tungah a pha na bawl un,

²⁸ang samsiete thupha na pie unlen ang bawlsiete adingin thu na ngetpieh un.

²⁹Mi khatpo in na pheta uh ang beh leh a langkhat zong na daw un; mi khatpo in na puon tungsil uh ang lahpieh leh na songkhol uh nangawn na piehbe un.

³⁰Na kung vua na ang ngen poma pie unlen, na van uh a late kungah ngenkia nawn sih un.

³¹No tunga ang kibawl ding na dei bangun midangte tungah zong na bawl un.

³²“No ang itte beh na it uleh na lemlaw uh bang ahei? Azieh pen mawneite nangawn in amate a itte a it uhi.

³³Na tung vua a pha bawlte tung behah a pha na bawl uleh, na lemlaw uh bang ahei? Azieh pen mawneite nangawn in zong tua bangin a bawl uhi.

³⁴Ngakia ding lametna tawh mi sum na leitawi uleh na lemlaw uh bang ahei? Mawnei mite nangawn in a leitawi zaza a ngakia nadingun mawnei dangte a leitawi uhi.

³⁵Hinanle na galte it unlen a pha bawl un, ngakia ding bangma lamen loin leitawi pie un. Tua hileh na thaman uh lien ding a, Sangpen Pasien’ tate na hi ding uhi; azieh pen ama in lungdam dan thei lote le mi gilote tungah a migi hi.

³⁶Na Pa un mi a khuotuo ma bangin note in zong mi na khuotuo un.

³⁷Thu na khen sih un, tua hile no tungah zong thu ang kikhen sih ding hi; mi na mawsah sih un, tua hile no zong ang kimawsah sih ding hi. Mite’ maw maisah un, tua hile no zong ang kimaisah ding hi;

³⁸pie un, ang kipie ding hi. A tena hoi, a kibetlawt, a kitawkhet, le a dimletin na kang sung vuah ang kisung ding hi; azieh pen na te zaza ma uh na ngakia ding uhi.

³⁹Ama in amate tungah thugentena khat zong a gen hi: “Mittaw khat in mittaw dang khat lam a hil thei ding amah? A ni gelin guom sungah a kieton ta sih ding uh amah?

⁴⁰Nuazui khat a siepa sangin a lienzaw ngai sih hi, ahi vangin mi khatpo a picingsa ahi zaw ciengin a siepa tawh a kibang ding hi.

⁴¹Bang dinga nangma’ mit a singluong kikham phawh kha lopi-in na vengpa’ mit a buathah them na muthaw ahei?

⁴²Ahi sihle nangma’ mit a singluong kikham mu lopi-in bang dingin na vengpa[30] kungah, ‘Lawm aw, na mit a buathah nang lahpieh vang’ na ci thei ahei? No, mihoi kipangte aw, na mit vua singluong lakhie masa phot unlen, tua zaw ciengin na vengpa’[31] mit a buathah hoitahin mu-in na lahpieh thei pan ding uhi.

⁴³Singkung hoi in ga hoi lo ga ngai lo a, singkung hoi lo in ga hoi ga ngai lo hi;

⁴⁴azieh pen singkung zosie a ga tawh kitheithei hi. Lingkung panin theiga kilo ngai lo a, thangling kung panin zong lengga kilo ngai lo hi.

⁴⁵Mihoi in a lungtanga a vom thuhoite a suokhie a, migilo in a lungtanga a vom gitlonate a suokhie hi; azieh pen lungtang sungah a dimlet ciengin kam tawh kisuokhie hi.

⁴⁶“TOPA, TOPA ei ci napi ucin, bang dinga ka thugente na man lo uh ahei?

⁴⁷Ka kungah hing pei-in ka thugen za a, ka gen banga a gamta zosiete bang tawh kibang ahei, ci thu kang lah ding hi.

⁴⁸Tua mipa pen lei a thuh taw zaw cienga suongpi tunga khuomkuo ding a phutkip inn lampa tawh kibang hi; tui khangin hawhtuite in tua inn a nawh vangin hoitaha kilam ahi ziehin a kilawh zo sih hi.

⁴⁹Ahi vangin ka thu za-a a mang lo mi in doppha a nei lo, leitang tunga innlam pa tawh kibang hi. Hawhtui in tua inn khautahin a nawh ciengin thakhatin pua pai a, tua inn pen a nahsiet mama hi,” a ci hi.