Read Zou LUKE 7 Bible Online

LUKE 7 - Zou bible

LUKE 7

¹Jesu in mite’ zahin a thugen ding zosie a man zaw ciengin Capernaum khuo ah a lut hi.

²Tua sungah galkapmangpa khat in a it mama sila khat nei a, tuapa cina-in si dihtah hi.

³Ama in Jesu’ thu a zah ciengin ama kungah Judah upa pawlkhat sawl a, ama pei-in a sila pa a damsah nadingin amate a thumsah hi.

⁴Jesu kungah a tun ciengun amate in nahpitahin a thum vua, “Ama tua banga na bawlpieh dinga kilawm ahi hi,

⁵bangzieh ahei cile ama in i minamte it a, i kikhopna inn zong ei lampieh hi,” a ci uhi.

⁶Amate tawh Jesu zawhton a, a inn tawh a kigamla lo mun khat a tun ciengin galkapmangpa in ama kungah a guolte sawlin, “TOPA aw, nang le nang gim kipie da in, azieh pen ka inn sunga nang kang lutsah ding kei adingin a kilawm sih hi;

⁷tua ahi ziehin kei zong nang kunga ang pei dingin kilawm ka kisa sih hi. Ahi vangin kamteng khat beh hing gen zieu inlen, ka silapa hing damsah ta’n.

⁸Bangzieh ahei cile kei zong uhna khut nei-a a om khat ka hi a, ka nei-ah galkap tampi a om hi; mi khat kungah, “Pei in,” ka ci leh a pei a, adang khat kungah ,“Hing pei vawi,” ka ci leh ang pei pai a, tuale ka silapa kungah, “Tami bawl in,” ka ci leh ka silapa in a bawl pai hi,” a ci hi.

⁹Jesu in tami thu a zah ciengin lamdang sa a, ama a zui mipite lamah kihei-in, “Note kungah kang ci-in, Israel-te lah nangawnah zong tam bang upna ka mu ngai nai sih hi,” a ci hi.

¹⁰Innah a kisawlte a tun ciengin amate in silapa a cidamsa-in a mu uhi.

¹¹Tua zaw a sawt loin[32] Nain kici khuo ah ama pei a, a nuazuite le mihonpi zong ama tawh a zawhton uhi.

¹²Khuopi tunkot a tun kuon ciengun vui dingin mi sisa khat na kizawng hi. Ama pen a nu in tapa khat tanga a nei ahi mel a, ama zong meigong khat ahi hi; tua khuopi panin tua nu tawh mi honpite a om uhi.

¹³TOPA in tua nu a mu bepin a khuotuo nah mama a, ama kungah, “Kap sin,” a ci hi.

¹⁴Tua ciengin a mai lamah ama pei-in misi puohna lanng a tham leh a puote zong a dinkhawl vawt uhi. Tuale ama in, “Tangval pa, tho in kang ci hi,” a ci hi.

¹⁵Misipa thoto-in thugen a kipan pai a, tua bepin Jesu in a nu kungah tuapa a apkia hi.

¹⁶Amate a unpi-un a zausi sieng vua, Pasien’ min phatin, “Eite lahah kamsang thupi khat ang pieng zo ta! Pasien in angvanna tawh a mite ei ve zo ta!” a ci uhi.

¹⁷Judea gam buppi le a kimvela gam zosie-ah ama’ thu a kizel sieng hi.

¹⁸John’ nuazuite in ama kungah tam thu zosie a gen uhi. Tuaci’n John in a nuazuite ni hlan a,

¹⁹TOPA kungah, “Ang pei ding pa na hi amah, ahi sihle adang khat ka lamen lai ding vuoi mah?” ci-in a dong dingin ama gel a sawl hi.

²⁰Jesu kungah tua tegel a tun ciengun ama gel in, “Ang pei ding pa na hi amah, ahi sihle adang khat ka na lamen lai ding vuoi mah?” ci-a dong dingin Baptize-pa John in kogel ei sawl ahi hi,” a ci uhi.

²¹Tua hun laitahin Jesu in natna tampi tah, pulnatna le hla gilo veite damsah a, mittaw tampitah zong khuo a musah hi.

²²Ama in ama gel kungah, “Pei unlen, na zahsa thute ule na mu thute uh John kungah va gen ta un: Mittawte in khuo mu a, khelbaite lam pei thei-in, miphahte[33] kidamsah a, bilbingte in khuo za-in, misite kithosah a, mizawngte tungah lungdamna thu kipuoh zo hi.

²³Keima zieha a lungkie lo poma mi hampha ahi hi,” ci-in a dawng hi.

²⁴John’ kamtaite a pei zaw ciengun mipite kungah John’ thu a gen dingin Jesu kipan a, “Gamlahah bang en dinga pei na hi vuoi? Hui’ mut a a zam kawikawi pumpeng amah?

²⁵Tua ahi sihle bang en dinga pusuoh na hi vuoi? Puon hoi sil mi pawlkhat en nuom na hi uh amah? En un, puon hoi silte kumpipa inn sungah a om uhi.

²⁶Tua ahile bang en dinga pusuoh na hi vuoi? Kamsangpa khat amah? Hi hi, ke’n kang ci-in, kamsangpa sangin a lienzaw hi.

²⁷‘En in, na mai-ah ka kamtaipa ka sawl ding a, ama in na mai-ah na pei nading lampi a na sielkhol ding hi,’ ci-a kigiel pa khu tampa ahi hi.

²⁸A tahtah a kang ci-in, numeite sunga a suohte lah panin Baptize-pa John sanga a lienzaw koima a om sih hi; hizongle Pasien’ manggam sungah a neu pen khat nangawn ama sangin a lienzaw hi.

²⁹(Siehdongte-a kipanin mi zosie in tami thu a zah uh ciengin Pasien pen thutang hi, ci-in a sang uhi, bangzieh ahei cile amate John kunga na ki-baptze sa ahi uhi.

³⁰Ahi vangin Pharisee-te le thukham hil siete in John’ baptize ding a niel ziehun amau’ phattuomna ding ahi Pasien gelna a nol uh ahi hi.)

³¹“Tua ahile tami khang mite bang tawh ka gente ding a, bang tawh kibang ci ding ka hei?

³²Vanzuana munah amate to a, ‘Theile ka tum vangun na lam nuom sih vua, kaa-la ka sah vangun na kap nuom tuon sih uhi,’ ci-a khatlekhat a kigal hlat naupangte tawh a kibang uhi.

³³Azieh pen bangma ne lo dawn loin John ang pei-in note in, “Dawi lawmnei pa,’ na ci uhi.

³⁴Mihing Tapa ang pei ciengin an ne tuidawnin a om a, ‘En un, anhai zuhai pa, siehdongte le mawneite’ guolpa!’ na ci vanuh uhi.

³⁵Hinanle pilna pen a man a hina a tate zosie tung panin kilang veve hi,” ci-in a gen hi.

³⁶Pharisee-te khat in ama tawh an ne dingin Jesu hlan a, tuale Pharisee pa inn ah pei-in an ne dingin sabuoi-ah a to hi.

³⁷Tuami khuo-a mawnei numei khat in Pharisee pa inn ah Jesu in an ne ding hi, ci a thei bepin sathau namtui suongngo thawl khat a tawi hi.

³⁸A nualam a keng phungah tua nu dingin kap a, a hlitui tawh a keng silpiehin, a sam tawh a nawtgumpieh hi. Tua ciengin a keng namin sathau a nupieh hi.

³⁹Ama a hlan Pharisee mipa in a mu ciengin a lungsim sungah, “Tampa kamsang khat ahileh ama a tham nu koi hi a, bangci numei ahei, ci a thei ding hi; azieh pen ama mawnei ahi hi,” a ci hi.

⁴⁰Jesu in ama kungah, “Simon aw, kang gen nop khat om hi,” a ci hi. Ama in, “Siepa,” ci-in dawng a, “Gen in,” a ci hi.

⁴¹“Sum palah mipa khat in leiba mi ni a nei hi; khat in denari[34] za nga ba-in, adang khat in sawm nga ba hi.

⁴²Tua gel in a leiba uh a lo zawh lo ciengun, ama in a ni gelin a leiba uh a maisah hi. Tuale tua tegel koi pen in ama itzaw ding ahei?” a ci hi.

⁴³Simon in, “A leiba a tamzaw kimaisah pa hi va, ci-in ngaisun ing,” ci-in a dawng hi. Tuale Jesu in ama kungah, “Dihtahin na khen zo hi,” a ci hi.

⁴⁴Tua ciengin numei nu lamah Jesu kihei-in, ama in Simon kungah, “Tami numei na mu ei mah? Na inn ah keima kang lut hi; ka keng sil nading tui nei pie sih a, hinanle ama in a hlitui tawh ka keng pah tehhopsah a, a sam tawh ei nawtgumpieh hi.

⁴⁵Nang in nei nam sih a, ahi vangin a inn sung ka lut a kipanin ama in ka keng a nam den hi.

⁴⁶Nang in ka lu sathau nei nupieh sih a, ahi vangin ama in ka keng sathau namtui ei nupieh hi.

⁴⁷Tua ahi ziehin ke’n kang ci-in, ama’ mawna tampitah kimaisah zo hi; tua ahi ciengin tua nu in itna lien a lah zo hi. Ahi vangin a kitawm maisahte in a tawm it pai uhi,” a ci hi.

⁴⁸Tua ciengin ama in tua nu kungah, “Na mawna teng kimaisah zo hi,” a ci hi.

⁴⁹Hinanle amate lahah Jesu tawh sabuoi-a an a imton mite in, “Mawnate nangawn a maisah vazuou tampa koi ahiei?” a ci uhi.

⁵⁰Tuale Jesu in numei nu kungah, “Na upna in nang ang hundam zo hi; lungmuong tahin pei in,” a ci hi.