Read Zou LUKE 8 Bible Online

LUKE 8 - Zou bible

LUKE 8

¹Tua zaw bakhat ciengin khuopi le khuotate-ah ama zin kawikawi a, Pasien’ manggam tawh kisai lungdamna thu puohin a tangko hi. Sawm le nite zong ama tawh a zawhton vua,

²hla gilote’ mat a kidamsahte le natna tuomtuom pana kidamsah numei pawlkhat in zong ama a zui uhi. Tuate pen: A sung pana dawi sagi a pusuona Magdalene kici Mary,

³tuale Herod inn sung vaihawmpa Chuza’ zi Joanna le Susanna-te a kipanin a neisa utawh amate[35] a panpi numei dang tampite zong ahi uhi.

⁴Khuo khat zaw khuo khat panin ama kungah ang pei vua, mi honpi ang kikhop uh ciengin ama in thugentena khat a gen hi:

⁵“Khaici vawpa khat khaitu dingin kuon a, khai a tu leh pawlkhat lam dungah tu ahi ziehin mite in keng tawh tuonin, vana a leng vate in tungin a netum uhi.

⁶Pawlkhatte suong tungah tu hi; tuale leinom a op lo ziehin a po vangin a gawpmang hi.

⁷Pawlkhatte ling lahah tu a, ling tawh a khanton ziehin ling in a depgawp hi.

⁸Pawlkhatte ahile lei hoina-ah tu-in khanglien a, a za zakhatin a pung hi,” a ci hi. Tami thu a gen zaw ciengin, “Zah nading bil a nei tapo in za taheh,” ci-in a kiko hi.

⁹Tua ciengin a nuazuite in tam thugentena’ deina bang ahei, ci-in ama a dong uhi.

¹⁰Ama in, “A ki-im[36] Pasien’ manggam thute na thei nadingun note tungah tuate ang kipie zo hi. Ahi vangin, ‘Amate in mu napi a mu cien lo nading, za napi a telcien lo nadingun, keima in amate tungah thu ka gen[37] hi,’ a ci hi.

¹¹Thugentena’ khietna tam bang ahi hi: Khaici pen Pasien’ thu ahi hi.

¹²Lamdunga kiete pen Pasien’ thu a zasate a cinopna ahi hi; tua ciengin amate in umin a kihutdam lo nadingin dawimangpa pei-in a lungtang panun Pasien’ thu a lahpieh hi.

¹³Suong tunga a kiete pen Pasien’ thu a zah ciengun kipah tahin a sang uhi; ahi vangin zung hla loin bakhat sung beh umin, ze-etna hun a tun ciengin a puate ahi uhi.

¹⁴Ling lahah a kiete pen Pasien’ thu za napi leitung lunghimawna, hau nopna le nopsahnate in depgawpin a ga picing zo lote ahi uhi.

¹⁵Lei hoina munah a kiete ahile Pasien’ thu za-in citahna le lungsim pha tawh pomdetin thuohzawhna tawh a ga khiete ahi uhi.

¹⁶“Koima in meivah a tan zaw ciengin law a khu sih a, lupna nei lah po-ah zong koi loin, a lut mite in khuovah a mu thei nadingin meivah tunna tungah a koizaw uhi.

¹⁷Azieh pen a kilang lo dinga a kiphuoldap bangma a om sih a, tua ma bangin khuovah in tan a, a kithei lo ding thusim bangma a om sih hi.

¹⁸Tua ciengin bangci bangin thu ka ngai ahei ci limtahin kingaisun un; azieh pen a neite kipiehbe hi; tuale a nei lote tung panin a neisa-a a ngaisutte nangawn uh kilahpieh ding hi,” a ci hi.

¹⁹Tua ciengin ama kungah a nu le a sanggamte a pei vua, mi a tam seng ziehin ama kung a tung zo sih uhi.

²⁰Tua bepin, “Nang ang mu nuomin a pulamah na nu le na sanggamte a ding uhi,” ci-in ama kungah kigen hi.

²¹Ahi vangin Jesu in amate kungah, “Pasien’ thu za a, a zui tapo ka nu le ka sanggamte ahi uhi,” a ci hi.

²²Ni khat a nuazuite tawh gunkuong tungah tuong a, tuale amate kungah, “Tuili galkhatah galkai vai,” a ci hi. Tuaci’n amate a pei vua,

²³gunkuong tawh a pei laitahun ama a kimu hi. Tuipi tungah hui le guo kithuo-in gunkuong sungah tui dim ahi ziehin a zauhuoi dinmunah a om uhi.

²⁴Ama kungah amate pei-in a phong vua, “Mangpa, Mangpa, a si sieng ding hi tai!,” ci-in a kiko uhi. Tuale ama zong tho-in huipi le tuihuolpite a hosie hi; tuate khawlin a dai dide pai hi.

²⁵Ama in amate kungah, “Na upna uh hei-ah a om ta ahei?” a ci hi. Amate zau kawm le lamdangsa kawmin, “Tua ahile huipi le tuipite nangawn in a thu a man valia nadingin tampa koi hi mawh ahei?” ci-in khatlekhat a kiho uhi.

²⁶Tua ciengin Galilee gam galkhat lama a om Gerasenes[38] gam a tung uhi.

²⁷Lei lahah ama a kumsuh laitahin tua khuo-a dawivei mi khat in na dawntuo pai hi. Tuapa in sawtveipi sung puon[39] sil lo in, inn ah zong om loin han lah po-ah a teng hi.

²⁸Ama in Jesu a mu bepin a mai-ah bawhsuhin, “Sangpen Pasien’ Tapa Jesu aw, kei bang ei law sawm na hei? Nei bawlsiet lo nadingin kang thum hi,” ci-in a aw nei za tawh a kiko hi.

²⁹Tam banga a kikona pen tua mipa sung panin hlabua a peikhiet nadingin Jesu[40] in thu a pieh zieh ahi hi. (Azieh pen hlabua in tua mipa tamveipi tah man zo a, siakhau le siakol tawh kihenin a kicin vangin a kikhinate botsan a, tua dawi in ama gamlahah a delmang hi.)

³⁰Tua ciengin Jesu in ama kungah, “Na min bang ahei? ci-in dong hi. Ama in, “Tampi,” a ci hi; azieh pen ama sungah dawi tampi a lut zo hi.

³¹Taw nei lo leihawm thuhpi sungah a peikia dingin amate thu a pieh lo nadingin ama kungah a thum uhi.

³²Tua laitahin muolpang a kikhawi vohhon tampi a om hi; tuale vohte sungah a lut thei nadingun dawite[41] in Jesu[42] kungah a thum vua, ama in zong a phal hi.

³³Tua ciengin tuapa sung panin dawite pusuohin vohte sungah a lut uhi; tuale kentawng-ah vohte kumsuhin tuili sungah a kie sieng uhi.

³⁴Vohcingte in a thupieng teng a mu ciengun tai-in khuopi le tua gam sung tengah a gen uhi.

³⁵Tua ciengin bang thu pieng ahei, ci-in a en dingin mite a pei vua, Jesu kung a tun ciengun Jesu keng phungah dawite taikhietna mipa na to a, ama in puon silin a lungsim a pilkia a mu ciengun a zau uhi.

³⁶A mu masate in amate kungah dawiveipa bangci bangin dam ahei ci thu a gen sawn uhi.

³⁷Tua ciengin Gerasenes[43] kimvela mi zosie a zau seng ziehun amate a peisan nadingin Jesu[44] kungah a thum uhi; tuaci’n Jesu zong gunkuong tungah tuongin a kilekia hi.

³⁸Dawite a peikhietna pa in ama tawh a zawton nadingin a thum hi; ahi vangin Jesu[45] in ama kungah,

³⁹“Na inn ah kilekia zaw inlen, Pasien in nang dingin bangza tahin ang seppieh ahei, ci thute va gen ta’n,” ci-in a sawl hi. Tuaci’n ama pei a, khuopi sung tengah Jesu in bangza tahin ama adingin bawlpieh ahei, ci thute a phuongzah hi.

⁴⁰Tuale mihonpite in ama lamen uh ahi ziehin, Jesu a kilekia ciengin amate in a na dawn uhi.

⁴¹Tua laitahin Jairus a kici kikhopna inn uhpa khat tua munah pei a, Jesu’ keng phungah bawhin ama’ inn ah a haw nadingin a thum hi.

⁴²Bangzieh ahei cile ama in kum sawm le kum ni bang a pha tanu khat beh nei a, tua nu cina-in si dihtah hi. Ama a pei laitahin a kimvelah mipite a kiphul valuh uhi.

⁴³Khum hun laitahin kum sawm le kum ni sung siluong natna a vei numei khat a om hi; tuale sievuonte[46] cielna-in a neisa zosie a zah sieng vangin koima in ama damsah zo lo hi.

⁴⁴Jesu’ nua lamah ama nu pei-in a puonmongtep a tham ciengin thakhatthu-in a siluong natna a khawl pai hi.

⁴⁵Tua ciengin Jesu in, “Ei tham koi ahei?” ci-in dong a, amate in a unpi vua a niel ciengun Peter[47] in, “Mangpa, na kimkotah mihonpi in ang neh valuh vua, ang phuhkhah uh hi lel bo va,” a ci hi.

⁴⁶Ahi vangin Jesu in, “Mi khat in ei tham hi; a zieh pen ka tung panin vanglietna a peikhiet lam ka thei hi,” a ci hi.

⁴⁷Tua numei nu in a kisel zo lo ding lam a thei bepin zau-in a citunsa-in pei a, Jesu mai-ah bawhsuhin mipi zosiete mai-ah ama a thamna le a tham cienga thakhata a dampaina thu a gen hi.

⁴⁸Jesu in tua nu kungah, “Ka tanu aw, na upna in nang ang damsah zo ta hi; lungmuong tahin pei ta’n,” a ci hi.

⁴⁹Ama in thu a gen laitahin makaipa inn panin mi khat pei a, “Na tanu si ta; siepa buoisah nawn da in,” a ci hi.

⁵⁰Jesu in tam thu a zah ciengin, “Zau sinlen um beh lel in, ama nu ang hingkia ding hi,” a ci hi.

⁵¹Inn sung a tun ciengin ama in Peter, John, James le naupang’ nu le pa simlo, ama tawh inn sunga tum ding koima dang a phal sih hi.

⁵²Amate a unpi-un kap le mau-in a na om uhi; ahi vangin ama in, “Kap sih un; azieh pen ama a si ahi sih a, a kimu ahi bo hi,” a ci hi.

⁵³Ama nu a si zo lam amate in a thei ziehun Jesu a nuisan uhi.

⁵⁴Ahi vangin ama in a khut tawh tua nu tu-in, “Numeino aw, tho vawi!” ci-in hlan hi.

⁵⁵Tua nu’ hlagau hingkia a, thakhatthu-in a thoto pai hi. Tua ciengin Jesu in a neh ding bangkhat pie un, ci-in a sawl hi.

⁵⁶A nu le a pa in lamdang a sa uhi; ahi vangin ama in a piengsa thute koima kunga a gen lo nadingun amate thu a pie hi.