Read Zou LUKE 9 Bible Online

LUKE 9 - Zou bible

LUKE 9

¹Tua ciengin Jesu in a nuazui sawm le nite hlanin dawite zosie a hawlkhiet nading ule natnate a damsah thei nading uh thuneina le vanglietna pie a,

²Pasien’ manggam thu a tangko ding le cinate a damsah dingin amate a sawl hi.

³Ama in amate kungah, “Na khuolzinna vua na zah dingun ciengkhut, thung-ip, anphel, le sum cite keng sih unlen, puon-ah nangawn zong a valin kenbe sih un.

⁴Na lutna uh inn khat popo-ah om peisuoh unlen tua inn pan ma-in dingkhie un.

⁵Zin ang tungsah lo khuo khat popo panin na pei ding ciengun amate langah teci ahi dingin na keng vua leivuite thing dawh un,” a ci hi.

⁶Amate zong kuonin khuo zosie-ah a pei vua, lungdamna thu tangko-in muncin tengah cinate a damsah uhi.

⁷Gam uhpa[48] Herod in thupieng zosie a zah ciengin a buoi mama hi, azieh pen mi pawlkhat in sina panin John thokia zo hi, a ci vua,

⁸pawlkhat in Elijah ang kilang hi, ci-in, pawlkhat leuleu in tanglai kamsangte khat ang thokia hi, a ci uhi.

⁹Herod in, “John’ ngawng ka tansansa ahi hi; tam banga a thu ka zah pa koi ahei?” a ci hi. Tuale ama a mu nadingin a hanciem hi.

¹⁰A khuolzinna uh panin a kile lamun sawltahpite in Jesu kungah a nasepna teng a gen uhi. Ama in amate zawpi-in Bethsaida kici khuo khatah a peidap uhi.

¹¹Mihonte in tam thu a thei ciengun ama a zui uhi; ama in zong amate na muoh a, amate kungah Pasien’ manggam thu genin cidam nading deite a damsah hi.

¹²Ni a tum kuon ciengin sawm le nite pei-in ama kungah, “Gamsip-a om i hi ziehun gie nading le neh ding a sui dingin tam kim a khuotate le gamte-ah mipi peisah in,” a ci uhi.

¹³Ahi vangin ama in, “A neh ding uh bang khat popo pie un,” a ci hi. Amate in, “Tami mi zosie adingin an lei dinga pei ding ka hi ngal sih uleh anlum nga le nga tawn ni simlo bangma a val ka nei sih uhi,” a ci uhi.

¹⁴Azieh pen khum munah pasal tul nga bang a om hi. Tuale ama in a nuazuite kungah, “Mi sawm nga ta-in a pawlpawlin tosah un,” a ci hi.

¹⁵Amate in tua ma bangin a unpi-un a tosah uhi.

¹⁶Ama in anlum nga le ngasa tawn ni la a, vantung lam ento-in lungdam a ko zaw ciengin phalsuo a, mihonpi mai-a lui dingin a nuazuite a pie hi.

¹⁷Mi zosie in ne-in a kham ciet uhi. Tuale khamval teng a khawm uleh seu sawm le seu ni a pha hi.

¹⁸Khatvei, Jesu ama guoh thungenin a op laitahin a nuazuite zong a gei-ah a om uhi, tuale amate kungah, “Mihonpite in kei koi hi, ei ci vuoi?” ci-in a dong hi.

¹⁹Amate in, “Baptize-pa John hi; adang pawlkhat in, Elijah hi; pawlkhatte leuleu in tanglai kamsangte khat ang thokia hi, ang ci uhi,” ci-in a dawng uhi.

²⁰Ama in amate kungah, “Tua ahile note in lah kei koi hi, nei ci vuoi?” a ci hi. Peter in, “Nang pen Pasien’ Messiah[49] na hi hi,” ci-in a dawng hi.

²¹Ama in koima kungah a gen lo nadingun khautahin amate thupie a,

²²“Mihing Tapa in gimna lienpi thuohin upate, siempu liente le thukham hil siete in a niel ding vua, tuale ama kithatin ni thum ni-in a thokia ding hi,” ci-in a gen hi.

²³Tua ciengin Jesu in amate zosie kungah, “Mi khatpo ka nuazui a suo nop leh ama le ama kinielin, nisimin a singlamte puo-in ka nua ei zui taheh.

²⁴Azieh pen a hinna a hu nuom tapo in a tan ding vua, keima zieha a hinna a tan tapo in a hinna a hudawh ding uhi.

²⁵Mi khat in leitung buppi a nga vangin a hinna tanin suplaw leh bang phattuomna om ding ahei?

²⁶Keima le ka thu ei zumpite, mihing Tapa in ama’ minthanna, a Pa’ minthanna le vantung misiengthote’ minthanna tawh ang pei ciengin tuapa a zumpi ding hi.

²⁷Ahi vangin a tahtah a kang ci-in, tam sunga a ding mi pawlkhat in Pasien’ manggam a mu masangin sina a ciem sih ding uhi,” a ci hi.

²⁸Tam thu teng a gen zaw a ni gietna pawlin ama in Peter, John le James-te zawpi-in thungen dingin muol tungah a peito uhi.

²⁹Thu a nget laitahin a mel kikhel a, a puon zong a vam lihleh hi.

³⁰Amate in thakhatthu-in mihing ni, Moses le Elijah, tawh ama a kiho a mu uhi.

³¹Amate minthanna tawh a kilang vua, Jerusalem ah Jesu a si nading vai teng a tangtun zawh nading thu a kikum uhi.

³²Tua laitahin Peter le a ompite kimut suohin a lusu uhi; ahi vangin amate a khahlaw ciengun ama’ minthanna le ama tawh a dington mihing ni a mu uhi.

³³Tua mihing nite in ama a nuasie kuonun Peter in bang gen ka hei ci zong a thei lo pi-in Jesu kungah, “Mangpa, tami munah i om pen nuom mama hi; nangma ading buh khat, Moses ading buh khat le Elijah ading buh khat, buh thum ei lamsah in,” a ci hi.

³⁴Tami thu a gen laitahin meiilom khat kai-in amate a liemang hi; meiilum lahah a op ziehun amate a zau mama uhi.

³⁵Tua ciengin meiilum lah panin aw khat in, “Tampa pen ka Teelsa ka Tapa ahi hi; ama’ thu na ngai un!” a ci hi.

³⁶Tua awging in thu a gen zaw ciengin Jesu ama guohin a om hi. Amate in tua sawng tengin a musa uh thute koima kungah gen lo-in a dai khipkhep uhi.

³⁷A zing ni, muoltung panin a kumsuh zaw ciengun, mihonpi in ama a na dawntuo uhi.

³⁸Tua zaw a sawt loin mihonpi lah panin pasal khat kiko a, “Siepa aw, ka tapa nei et pieh dingin kang thum hi; ama beh tapa-a ka nei ahi hi.

³⁹Hlagau khat in ama man a, thakhatthu-in a peng vagua hi. Dawi in a kam sungah a cilphuon a kai dongin kongkaw sahin liemsah gawp a, a hla nuom zepzep sih hi.

⁴⁰Na nuazuite kungah tua dawi ei hawlkhietpieh nadingun ka thum vangin a hawlkhie zo sih uhi,” a ci hi.

⁴¹Jesu in, “Upna nei lo, a letat khang mite aw, bang tanvei note hing ompi-in hing thuoh zo lai ding ka hei? Tam munah na tapa hing peipi in,” ci-in a dawng hi.

⁴²Naupang pa a pei laitahin dawi in lei lahah lawmlia-in a kongkawsah gawp hi. Ahi vangin Jesu in tua hlabua hosie a, naupang damsahin a pa a apkia hi.

⁴³Tuaci’n a unpi-un Pasien’ vanglietna mu-in lamdang a sa mama uhi. Mi zosie in a sil bawl teng vannuoi lamdangsa-in a op laitahun ama in a nuazuite kungah,

⁴⁴“Tam thute na bil vuah lutsah un: Mite khut sungah Mihing Tapa a ki-ap ding ahi ta hi,” a ci hi.

⁴⁵Ahi vangin amate in tami a kigen thu a tel siem sih uhi; amau’ thei lo dinga tam thu a ki-imdap ahi ziehin, amate in a khietna a tel thei sih vua, a kigen thu tawh kisai zong ama a dong ngam sih uhi.

⁴⁶Amate lahah koi lienpen ahei, ci thu tawh kisai-in kiselna a om hi.

⁴⁷Ahi vangin Jesu in a lungsim vua a ngaisutna uh a thei ciengin naupang khat kai-in a gei-ah koi a,

⁴⁸amate kungah, “Ka min tawh tami naupang a sang mi poma in kei ei sang ahi a, kei ei sang poma in kei ei sawlpa zong a sang ahi hi; azieh pen note lahah a neupen pa khu a lienpen pa ahi hi,” a ci hi.

⁴⁹John in, “Mangpa, nangma’ min tawh dawi a hawlkhie mi khat ka mu vua, ama in eite ei zui lo ahi ziehin ka kham uhi, ci-in a dawng hi.

⁵⁰Ahi vangin Jesu in ama kungah, “Ama kham sih un; azieh pen no ang langpan lo poma no lam a pang ahi hi,” a ci hi.

⁵¹A kilahto ding hun a nai ciengin ama in Jerusalem lam pei ding mitsuon in a nei hi.

⁵²A masangah kamtaite sawl a, amate in lamkalah Jesu ading nate a baisa-a a koipieh dingin Samaria khuo khatah a lut uhi;

⁵³ahi vangin Jesu in Jerusalem lam manaw sawm ahi ziehin amate in ama a na dawn sih uhi.

⁵⁴A nuazui James le John-te in a thei uh ciengin amate in, “TOPA aw, vantung panin meikuong kiesah suhin[50] amate katumsah uleng nei awi ei mah?” a ci uhi.

⁵⁵Ahi vangin Jesu kihei-in amate a phawhsie hi.

⁵⁶Tua ciengin[51] khuo dang khatah a peisuoh uhi.

⁵⁷Lampi-ah amate a pei laitahun mi khat in ama kungah, “Na peipei na-ah kang zui ding hi,” a ci hi.

⁵⁸Tuale Jesu in tuapa kungah, “Ngiete in kuo nei-in, vana leng vate in zong bu a nei vua, hizongle Mihing Tapa in a lu ngah nading mun nei lo hi,” a ci hi.

⁵⁹Ama in adang khat kungah, “Ei zui in,” a ci hi. Ahi vangin tuapa in, “TOPA aw, pei-in ka pa va vui phot ta vang,” a ci hi.

⁶⁰Ahi vangin Jesu in tua pa kungah, “Misite in a misite uh vuisah lel in; nang na hile va pei inlen Pasien’ manggam thu va tangko zaw ta’n,” a ci hi.

⁶¹Midang khat in zong, “TOPA nang hing zui vang; ahi vangin ka inn-ate mangpha va pai phot ta vang,” a ci hi.

⁶²Jesu in tuapa kungah, “A lokaina tu kawmin a nualam en pa pen Pasien’ manggam tawh kituoh lo hi,” a ci hi.