Read Zou THUHILKIANA 1 Bible Online

THUHILKIANA 1 - Zou bible

THUHILKIANA 1

¹Tam teng pen Moses in Jordan galkhat senel gam sung, Suph tawh a kigalsai, Paran le Tophel, Laban, Hazeroth, le Di-zahab kikala om Israel zosie tungah a na gen thute ahi hi.

²(Kadesh-barnea pen Horeb panin Seir Muol tawnin ni sawm le ni khat kipei hi.)

³A kum sawmlina, hla sawm le khatna a ni masa ni-in TOPA in amate kungah gen dinga a thupieh bang lienin Moses in Israel-te a hopi hi.

⁴Tam pen ama in Heshbon gam a uh Amor-te’ kumpipa Sihon, Ashtaroth, le[1] Endrei gam a uh Bashan kumpipa Og a zaw zo cieng ahi hi.

⁵Moab gam Jordan galkhat-ah Moses in tam thukham a hilcien hi:

⁶Horeb muolah TOPA i Pasien in eite ei hopi a, ‘Tami muolah na sawt op zo ta uhi.

⁷Na khuolzin maban uh zomkia unlen Amor-te’ muoltung gam le a kima gamte zong- Arabah gam, muoltung gam, Shephelah gam, Negeb gam, le tuipi dung teng- Canaan-te’ gam le Lebanon gam, gun golpi ahi Euphrates dongin pei un.

⁸En un, na masang vuah leitang ka koi zo hi; pei unlen keima[2] in na pu na pate uh Abraham, Isaac, Jacob, le a nua vua a suonlehlahte tungah pieh dinga ka kamciem leitang luo un,’ ei ci hi.

⁹Khum hun lai-in na kung vuah, “Na vai uh keima guoh in ka puo zo sih hi.

¹⁰Tuni-in vana aasi za a pha dingin TOPA na Pasien un ang pungsah zo ta uhi.

¹¹TOPA na pu na pate uh’ Pasien in a za tulin hing pungsah hinlen na tung vuah ang thuciemsa bangin thupha hing pie taheh!

¹²Ahi vangin tam bang na kiphinna uh vangihte kei guoh in bangci puoh zawh ding ka hei?

¹³Na minam sung ciet panun na makai dingun mipil, thuthei, le a zatahhuoi mite tel un,” kang ci hi.

¹⁴Note in, “Kote adingin na thugente hoi hi,” ci-in nei dawng uhi.

¹⁵Tuaci’n na minam makaite uh ahi mipil le a kizatah mite ka la a, na tung vuah a tul uh, a za uh, a sawmnga uh, a sawm uhte, le uliente-in ka pangsah a, na minam zosie sung vuah makai vaihawm dingin ka koi hi.

¹⁶“Khum hun lai-in na thukhen vaihawmte uh tam bangin thu ka hil hi: “Na unaute uh kikala kihehnate za unlen a dih lamin khenpiehin mite khatlekhat kikal ahi a, tuolsung mi le pemtate kikalah ahi zongin dihtahin thu khen un.

¹⁷Thu khenna-ah guptuom paituom na nei sih ding uhi: Mi a neu a lien ci loin a kibangin a thu ngaipieh un; thukhenna pen Pasien-a’ ahi bo ziehin koima na giing sih ding uhi. Thu khatpo hamsa na sah luot uleh ka kungah hing tut un, keima’n ka khen ding hi,” ka ci hi.

¹⁸Tuaci’n khum hunin na bawl ding zosie uh kang hil zo hi.

¹⁹Tua ciengin TOPA i Pasien ei thupiehsa bang lienin Horeb panin i dingkhie vua, Kadesh-barnea i tun masangsie-un, Amor-te’ muoltung gam zotna lamkala na musa uh a gol a zauhuoi senel gam zosie i nawh uhi.

²⁰Keima in na kung vuah, “TOPA i Pasien ei pieh Amor-te’ muoltung gam na tung zo ta uhi.

²¹En un, TOPA na Pasien un note tungah tua leitang ang pie zo hi; peito unlen, TOPA na pu na pate uh’ Pasien in ang kamciemsa bangin va luo ta un; zau sih unlen lungkie sih un,” kang ci hi.

²²Na unpi-un keima kungah nang pei vua, “Eite dinga gam van dingin i masang vuah mi sawl masa vai-in, i peito nading lampi le i zot ding khuopite tawh kisai-in eite kungah thu hing tutkia uheh,’ nei ci uhi.

²³“Keima in zong tua bang gelna pen hoi tuoh ka sa a, minam khatah khat, note lah panin mi sawm le ni ka teel hi.

²⁴Amate dingkhie-in muoltung gamah a pei to vua, tuale Eshcol kuomah pei-in a va dap-et ta uhi.

²⁵Tua leitanga pieng singga pawlkhat i kungah ang tawisuh uhi. Amate in i kung vuah thu ang tutkia vua, “TOPA i Pasien in ei pieh ding gam pen leitang hoi ahi hi,” ei ci uhi.

²⁶Ahi vangin na peito nuom sih uhi. Note in TOPA na Pasien uh’ thupiehte na langpang uhi;

²⁷na puonbuh sung vuah na tawngphun vua, “TOPA in eite ei muda ziehin Amor-te khut sungah ei pie-in suhmaimang dinga Egypt gam pana ei peipi ahi bo hi.

²⁸Hei lam manaw-a pei ding i hi uh ahei? I sanggamte thugen in ei lung kiesah a, “Eite sangin khum gam mite a golzaw vua, zong a sangzaw uhi; khuopite gol a, van holin kulpi tawh ki-im hi! Khum munah Anak’ suonte ka mu tahtah uhi!’ na ci uhi.

²⁹“Keima in na kung vuah, “Amate zatah sih unlen zong giing beh sih un.

³⁰Na masang vua a pei TOPA na Pasien un Egypt gam sungah na mitmu mama-un a bawl bangin ama in note dingin gal ang simpieh ding a,

³¹mi khat in a tapa a puoh bangin tam mun nang tun masangsie-un, TOPA na Pasien un na khuolzinna uh lam tungtawn senel gamah ang bangci puoh ahei ci na musa uh ahi hi.

³²Ahi vangin tam bang thu om hi napi, na TOPA na Pasien uh na muong sih uhi.

³³Ama in na giephuol sat nading uh mun ang suipieh ding le na pei nading uh lampi ang lah dingin na mai vuah zanin mei, sunin meii-in a pei hi.

³⁴TOPA in na thugente uh a zah ciengin lungthahin tam bangin kiciem hi:

³⁵“Na pu na pate uh tungah pieh dinga ka kamciemsa gam hoi pen Jephunneh’ tapa Caleb lobuong tami khang gilote lahah koima khat beh in a mu sih ding hi.

³⁶Ama in a lungsim zosie tawh TOPA a zui ziehin ama le a suonlehlahte tungah a totsa leitang ka pie ding hi,” a ci hi.

³⁷Note ziehin kei tung nangawnah zong TOPA lungthah a, “Nang zong khum gam na lut sih ding hi.

³⁸Khum munah na kithuopi pa Nun’ tapa Joshua a lut ding hi; ama hantawh in, azieh pen ama Israel-te khum gam luosah ding pa ahi hi.

³⁹Khum gamah galte mat bep ding hi bo na ci uh na nausente ule tu laitaha a sie le a pha a khen thei nai lo na tate uh a lut ding hi; keima in tua gam pie-in amate in tua gam a luo ding uhi.

⁴⁰Ahi vangin note na hi leh, San Tuipi[3] lam manaw-in senel gamah kilekia un,’ ei ci hi.

⁴¹Note in nei dawngkia vua, “TOPA tungah ka maw zo ta uhi! TOPA i Pasien in eite ei thupieh bang lienin peito-in galdo dingin a kigingsa-in ka om uhi,” nei ci uhi. Tuaci’n na milipun na galvante uh tawi-in na kawng uh na gah ciet vua, muoltung kato ding na bai ngaisut uhi.

⁴²” TOPA in keima kungah, ‘Amahaw kungah gen inlen, ‘Na lah vuah kei om lo ka hi ziehin kuonto da mai unlen gal zong va do da lel un. Na do pau uleh na galte un ang zo ding hi, ci-in,’ ei ci hi.

⁴³Na kung vua kang gen vangin note in nei mang nuom sih uhi. TOPA’ thupiehna na langpan vua, muoltung gamah na peito paupau uhi.

⁴⁴Ang sim dingin muoltung gama na teng ahi Amor-te ang kuon vua, Seir gam Hormah dongah khuoi bangin hing delin ang zogawp uhi.

⁴⁵Note na kilekia vua, TOPA mai-a na kaa ciengun, TOPA in na aw uh ang thupisim sih a, zong ang thudon sih hi.

⁴⁶Nidanga bangin Kadesh ah ni tampi na thaam zaw ciengun,