Read Zou THUHILKIANA 10 Bible Online

THUHILKIANA 10 - Zou bible

THUHILKIANA 10

¹Tua hun laitahin TOPA in keima kungah, “A masa gel bangin suongpeh ni sehin muoltung ka kungah hing kato inlen, sing singkuong khat bawl in.

²Tua suongpeh gel tungah na sekehsa suongpeh masate tunga thu teng kang giel ding a, singkuong sungah tuate na koi ding hi,” ei ci hi.

³Tuaci’n gising tawh singkuong khat bawlin, a masa gel bangin suongpeh ni ka seh a, ka khut sungah tua suongpeh gel tawi-in muol tungah ka kato hi.

⁴Tua ciengin mihon kikhop ni-in TOPA in mei sung panin muoltung na kung vua ang gensa thupieh sawmte,[22] a masa-a kigiel bangin tua suongpehte tungah giel hi; tuale TOPA in tua suongpehte kei tungah ei pie hi.

⁵Tuaci’n kihei-in muol tung panin ka kumsuh a, ka bawlsa singkuong sungah tua suongpehte ka koi a, tuale TOPA ei thupieh bangin tua sungah suongpehte a om hi.

⁶(Beeroth-bene-jaakan[23] panin Moserah ah Israel-te khuol zinin khum munah Aaron si-in tua munah kivui hi; a tapa Eleazar in ama’ za luo-in siempu sem hi.

⁷Tua mun panin Gudgodah ah amate khuolzinin Gudgodah panin lui tuite a luonna gam Jotbathah ah a pei uhi.

⁸Tua hun lai-in TOPA in tuni donga TOPA mai-ah dinga ama’ na sem ding, ama’ min tawh thupha pie ding, le TOPA’ thuciemna singkuong puo dingin Levi-te a tuomkoi hi.

⁹Tua ahi tah ziehin Levi in a tanaute lahah tanh hile luo hile a nei sih a, TOPA na Pasien un ama kungah a kamciem bangin TOPA khu ama’ luo ahi hi.)

¹⁰A masa-a ka bawl bangin muol tungah sun sawmli le zan sawmli sung ka om hi. TOPA in tua hunin zong ka thu ei ngaipieh leuleu hi. TOPA in note ang susie nuom sih hi.

¹¹TOPA in kei kungah, “A pu a pate tunga pieh dinga ka ciemsa leitangah pei-in a luo thei nadingun tho inlen, mite mai-ah na khuolzin ban zom in,” ei ci hi.

¹²Israel-te aw, tu-in TOPA na Pasien un na tung panun bang ang kalh ahei? Na hoi nadingun na TOPA na Pasien beh uh zatatin a lampite zosie zui-in, ama na it vua, na lungtang zosie ule na hinna zosie utawh TOPA na Pasieh uh’ na semin,

¹³tuni-a kang gen thupiehte le TOPA na Pasien uh’[24] thukhamte na zui ding uh ahi hi.

¹⁴Vantung le vantungte’ vantung, leitung le a sunga om zosie note’ TOPA Pasien-a’ ahi a,

¹⁵hinanle TOPA in na pu na pate tung behah itna lungtang a koi a, tuni-a ma bangin mite zosie lah panin amau’ suon le hlah ahi note ang teel hi.

¹⁶Tua ciengin na lungsim tepte tan unlen lungkhauh nawn sih un.

¹⁷Bangzieh ahei cile TOPA na Pasien uh khu a lien Pasien hi a, a thahat, a giinhuoi, deidan a nei lo, guhgol zong a la lo, pasien-te’ Pasien, topate’ TOPA ahi hi.

¹⁸Meigong tagate adingin ama in thu a tangin khenin pemtate it a, an le puon a pie hi.

¹⁹Pemtate na it ding uhi, bang ding ahei cile note zong Egypt gamah pemta na hi ngai uhi.

²⁰TOPA na Pasien uh na zatah ding uhi; ama beh na bie ding uhi; ama na tudet ding vua, ama’ min tawh na kiciem ding uhi.

²¹Ama na phat ding uh ahi h; ama pen note adinga na mit utawh na musa uh tam a lien le a giinhuoi nate ang bawlpieh pa na Pasien uh ahi hi.

²²Egypt gamah na pu na pate mi sawmsagi a peisuh vua, tu-in TOPA na Pasien un vana aasi za-in ang pungsah zo ta hi.