Read Zou THUHILKIANA 12 Bible Online

THUHILKIANA 12 - Zou bible

THUHILKIANA 12

¹Tam teng pen na pu na pate uh’ TOPA Pasien in leitunga na ten laisie-un na luo ding vua ang piehsa gam sungah limtaha na zui ding uh thukhamte le ngaina kipte ahi hi.

²Na suonmang ding uh minamte in a bieh pasien-te opna mun, muol sangte, muoltangte, le singnim nei zosie na susie ding uhi.

³A maitamte uh phelmangin a khuom siengthote satguoi a, a khuom siengthote mei tawh haltumin a pasien-te’ uh limte zong mei tawh haltum un. Tuaci’n amau’ munte panin a min uh na phietmang ding uhi.[31]

⁴Tua bang dan tawh TOPA na Pasien uh na bie sih ding uhi.

⁵TOPA na Pasien un na minam zosie uh sung panin ama’ min koi nadingin teelin ama op nadinga a bawlna mun na suizaw ding uhi. Khum munah na pei ding vua,

⁶na meihal biehnate ule na biehpiehnate uh, na sawm-ah-khatte ule na silpiehte uh, na kamciem uh letsongte, nop thu-a na pieh uh biehnate le na bawnghonte ule na tuuhon tacilte uh, khum tahah na peipi ding uhi.

⁷TOPA na Pasien uh’ mai khum munah na ne ding vua, TOPA na Pasien un na sepna zosie vuah thupha ang pieh ziehin no le na innkuonpite na kipah ding uhi.

⁸Eite zosie in hoi i sah dan bangin tam munah i bawl bangun na gamta sih ding uhi,

⁹azieh pen TOPA na Pasien un na luo ding vua ang pieh gam le tawlngahna mun na lut nai sih uhi.

¹⁰Jordan gun galkai-in TOPA na Pasien un luo dinga ang pieh leitangah na ten cieng ule, lungnuomin na ten thei nadingun na kimvel vua om na galte uh panin bihtahin tawlngahna ang pieh ciengin,

¹¹TOPA na Pasien un ama’ min ten nadinga a teelna munah kang thupieh zosie na peipi ding uhi: Tua teng pen na meihal biehnate ule na biehpiehnate uh, na sawm-ah-khatte ule na silpiehte uh, TOPA tunga na kamciemsa uh ahi na deituom uh letsong zosie ahi hi.

¹²TOPA na Pasien uh mai-ah na tanu na tapate uh, na sila uh numei pasalte le na khuo sung vua a teng Levi-te tawh na lungdam ton ding uhi. (bangzieh ahei cile amate in tanh ahi a, luo ahi zongin a nei sih uhi.)

¹³Na tuona mun po vuah na meihal biehnate na pieh lo nadingun kidawm un.

¹⁴Hizongle na minamte uh sung panin TOPA in a teelna mun khat behah na meihal biehnate na pie ding vua, khum munah kang thupieh zosie na bawl ding uhi.

¹⁵Hinanle TOPA na Pasien un ang pieh thupha tawh kizui-in na khuopite uh khat popo sungah na dei hunhun-un sa go-in na ne thei ding uhi; sangai le sakhi sate a kineh ma bangin a sieng le a bua kideidan loin na ne thei ding uhi.

¹⁶Ahi vangin a si na ne sih ding uhi; tui bangin tuolah na buo ding uhi.

¹⁷Na khuopite sung vuah na an uh sawm-a- khatte, na lenggazu ule na sathaute uh, na bawnghonte ule na tuuhonte uh sung panin tacilte, pieh dinga na kiciemsa uh letsongte khat popo ahi sihle kiphalna tawh na pieh uh biehnate le na silpiehte uh na ne thei sih ding uhi.

¹⁸TOPA na Pasien un a teel nading mun, na TOPA Pasien uh mai-ah, note le na tanu na tapate uh, na sila pasalte, na sila numeite, le na khuopi sung vua a teng Levi-te in na ne ding vua, na sepna zosie vuah TOPA na Pasien uh mai-ah na kipah ding uhi.

¹⁹Na gam sung vuah na ten laisie-un Levi-te na thusim lo khah ding uh kidawm un.

²⁰Ang kamciemsa ma bangin TOPA na Pasien un na gam uh ang kehpieh ciengin sa na du ziehun, “Sa ka ne ding uhi,” ci po locin sa na du hunhunun na ne thei ding uhi.

²¹Note kung panin TOPA in ama’ min op nadinga a teelna mun a gamlat seng leh note kang thupiehsa bangin TOPA in ang piehsa na bawnghonte uh pan ahi a, na tuuhonte uh pan ahi zongin khat popo na go thei ding vua, tuaci’n na khuopite sung vuah na du hunhunun na ne thei ding uhi.

²²Sangai ahi a, sakhi ahi zongin a kineh bangin na ne thei ding uhi; mi a sieng le a buate in a kibangin na ne thei ding uhi.

²³A si na neh lo ding beh uh thei siem un; bangzieh ahei cile sisan khu hinna ahi a, sa tawh hinna na neton sih ding uhi.

²⁴Tua sisan ne loin tui bangin tuolah na buo ding uhi.

²⁵TOPA muna-ah a dihin na gamtat ziehun noma le na nua vua na tate uh a nopsah thei nadingin tua si ne sih un.

²⁶Hinanle na pieh ding uh silpieh siengthote, le na kiciemsa uh letsongte la-in TOPA in a teel nading munah na peipi ding uhi.

²⁷TOPA na Pasieh uh’ maitam tungah na meihal biehnate uh’ a sa le a si na pieton ding uhi; na TOPA Pasien uh’ maitam gei-ah[32] note in adang na biehpiehnate uh’ site na sung ding vua, ahi vangin a sa na ne thei ding uhi.

²⁸TOPA na Pasien uh’ mitmu-in a hoi le a dihin na gamtat ziehun, note le na nua vua na tate a khantanun a nopsah den thei nadingin tuni-a[33] kang gen tam thute zosie man dingin ngaisun un.

²⁹TOPA na Pasien un na mai vua na suonmang ding uh minamte hemkhie-in, amate suon dingin a leitang vuah na ten ciengun,

³⁰na mai vuah amate a kisuhsiet zaw ciengin amate zui-in na awkhah lo nadingun kidawm un: “Tam minamte in amau’ pasien-te a bangci bieh uh ahei? Ke’n zong tua bangin bawl nuom ing,” ci-in a pasien-te tawh kisai thute kan sih un.

³¹TOPA na Pasien uh tungah tua bangin na bawl sih ding uhi. Azieh pen amau’ pasien-te dinga a kidahhuoi a silbawlte zosie uh TOPA in muda hi. Amau’ pasien-te dingin a tapate ule a tanute nangawn uh mei sungah a hal uhi.

³²[34] Kang thupieh zosie limtahin na zui ding uhi; tua khu belap loin zong na lakhie sih ding uhi.