Read Zou THUHILKIANA 14 Bible Online

THUHILKIANA 14 - Zou bible

THUHILKIANA 14

¹Note na hi uleh TOPA na Pasien uh’ tate na hi uhi. Misite ziehin noma le noma kikuikeh sih unlen, na humsam zong heukieu sih un.

²Bangzieh ahei cile TOPA na Pasien uh tungah a siengtho mite na hi uhi; leitung mi zosie lah panin ama’ nei gougil dinga TOPA in ang teelsa na hi uhi.

³A kidahhuoi na khat popo na ne sih ding uhi.

⁴Na neh thei ding uh ganhingte tam teng ahi hi: Bawng, tuu, keel,

⁵sakhitang, sangai, sim sakhi, sathah, saza, zo sakhi, le gamtuu-te ahi hi.

⁶Ganhingte lah panin a kecin a kaa, ehnel a hlai ganhing kici poma na ne thei ding uhi.

⁷Ehnel hlai a, a kecin a kaa zongin tam bang sate na ne thei sih ding uhi: Kalaoh, bilpi, le sakihte in ehnel a hai vangin a kecin a kaa lo ziehin note adingin a nieh ahi hi.

⁸Voh a kecin a kaa vangin ehnel hlai lo ahi ziehin note dingin a nieh ahi hi. Tuate’ sa na ne sih ding vua, a luong zong na tham sih ding uhi.

⁹Tui sunga om zosie lah panin hla le lip a nei zosie na ne thei ding uhi.

¹⁰Hla le lip a nei lo poma na ne sih ding uhi; tua khu note adingin a nieh ahi hi.

¹¹Va sieng zosie na ne thei ding uhi.

¹²Ahi vangin tam teng na ne sih ding uhi: Muvanlai, langta, luimu,

¹³mumeika, mukhau namcin;

¹⁴va-ah nam zosie;

¹⁵va-kalaoh, pengpeleuh, vatawt, musi nam zosie;

¹⁶keising le simbu, gam vatawt,

¹⁷le senel-simbu,[36] musane le tuimu,

¹⁸gun vapi, tui va kengsau nam popo; lailen le baah te ahi hi.[37]

¹⁹Hla a nei insect ganhing zosie note adingin a sienglo ahi hi; tuate kine lo ding hi.

²⁰Hla a nei ganhing a sieng poma na ne thei ding uhi.

²¹A mawhsi ganhing poma na ne sih ding uhi; na khuo sung vua a teng khuol mite neh dingin na pie thei vua, ahi sihle gamdang mite kungah na zua thei ding uhi. Azieh pen TOPA na Pasien uh tungah a siengtho mi na hi uhi. Keelno a pi’ nawizu tawh na huonton sih ding uhi.

²²Kumsielin na lo vua a pieng, na khaici panun a pieng zosie sawm-ah-khat na tuomkoi ding uhi.

²³TOPA na Pasien uh na zatah zing thei nadingun, ama’ min ten nadinga a teelna mun TOPA na Pasien uh’ mai-ah na an uh, na lenggazu uh, na sathau uh sawm-ah-khat le na bawnghonte ule na tuuhon tacilte uh na ne ding uhi.

²⁴Hizongle TOPA na Pasien un thupha ang pieh ciengin, na TOPA Pasien un a min koi nadinga a teel mun khu na kung panun a gamlat seng ziehin sawm-ah-khat na puoh zawh sih uleh,

²⁵tuate sum na suo ding uhi. Na khut sung vuah tua sumte na tawi ding vua, TOPA na Pasien un a teelna munah pei-in;

²⁶na lunggul popo uh bawngtang, tuu, lenggazu, kham thei zu, ahi sihle na du popo uh leina-in tua sumte na zang ding uhi. Na TOPA Pasien uh’ mai khum munah kipah tahin noma le na innkuonpite tawh na ne ding uhi.

²⁷Na khuo sung vua a teng Levi-te in tanh le luo ding a nei lo ziehun amate thuse loin om sih un.

²⁸Kum thum a cin sielin tua kuma a pieng na an uh’ sawm-ah-khat zosie peipi-in na khuo sung vuah na khol ding uhi;

²⁹TOPA na Pasien un na sep na bawlna zosie vuah thupha ang pieh thei nadingin note bangin tanh ahi a, luo ahi zongin a nei lo ziehun na khuo sung vua a om Levi-te, pemtate, tagate, meigong numeite pei-in khamtahin tua ante a ne ding uhi.