Read Zou THUHILKIANA 15 Bible Online

THUHILKIANA 15 - Zou bible

THUHILKIANA 15

¹Kum sagi a cin sielin leiba maisahna na nei ding uhi.

²Maisahna ding dan tam bang ahi hi: Mi a leitawi poma in a vengte’ bat leibate maisah ding hi. TOPA’ maisahna kiphuong zo ahi ziehin leitawi a pie poma in a sanggampa’ bat ahi a, a mipi a vengpa’ bat leiba ahi zongin phulkia nawn lo ding hi.

³Gamdang mite kung panin na phul thei ding vua, hizongnanle na sanggam khat popo in noma-a’ ang batte na maisah ding uhi.

⁴Ahi vangin note lahah a tasam koima om lo ding hi. Bangzieh ahei cile TOPA na Pasien un na luo ding ule na nei ding vua ang pieh leitangah TOPA in thupha ang pie valon ding hi.

⁵Tua khu note kang pieh TOPA na Pasien uh’ thu mangin tuni-a kang gen tami thupiehte zosie limtaha na zui uleh cina ahi hi.

⁶TOPA na Pasien un note ang kamciemsa bangin thupha ang pieh ciengin, minam tampite na leitawisah ding vua, ahi vangin nomate in koima-a’ na leitawi sih ding uh; minam tampite tungah vai na hawm ding vua, hizongle no tungah amate in vai a hawm sih ding uhi.

⁷TOPA na Pasien un ang pieh ding gama na khuote uh khat popo sungah na sanggam khat uh note lahah a tasam a op leh na lungtang khausah sih unlen, tua a tasam na vengpa hu lo-in om sih un.

⁸Note na vautat zaw ding vua, a kisap za phaltahin na leitawi ding uhi.

⁹“A kum sagina, maisahna kum hing nai ta hi,” ci-in na lungsim sung vuah ngaisutna gilo khat ang omin, a tasam na vengpa uh galbawlin bangma pie loin na op lo nadingun kidawm un; na vengpa zong ang kiko-in TOPA tungah ang khie kha thei ding a, tua hile khielna bawl na suoh ta ding hi.

¹⁰A hlawnna-in na pie ding vua, na pieh ciengun zong kiphal tahin na pie ding uhi. Azieh pen TOPA na Pasien un tam thu ziehin na sep na bawlna zosie vuah thupha ang pie ding hi.

¹¹Leitungah mi tasam tawp ngai lo ding a, tua ahi ziehin, “Gam sunga om mizawngte le tasam sanggamte tungah phaltahin na pie ding uhi,” ci-in thu kang pie hi.

¹²Na unau, Hebrew pasal khat ahiei, ahi sihle Hebrew numei khat ahiei na kungah ang kizua-in[38] kum guh sung na na ang seppieh leh, a kum sagina ciengin tua mipa na suohta sah ding hi.

¹³Nangma kung panin sila pasal[39] khat a suohta-in na peisah ciengin a khutguohin na peisah sih ding hi.

¹⁴Na tuuhonte lah, na ancilna lah le na lengga suhna lah panin phalna tawh na pie ding a, TOPA na Pasien in thupha ang piehna bangin na pie ding hi.

¹⁵Egypt gamah sila na hina ule TOPA na Pasien un ang tatkhiet uh ahi lam phawh un; tam thu ziehin tuni-in na tung vuah tam thupieh kang pie hi.

¹⁶Hizongle ama in nuom hing sa-in, nangma le na innkuonpite ang it ziehin, “Na kung panin ka pei sih ding hi,” ang ci vawt tah leh

¹⁷siatul khat la-in kotbieng dappha-in a bil na vut ding a, tuaci’n ama na sila[40] ahi zing ta ding hi. Na sila numei[41] zong tam bangma-in na bawl ding hi.

¹⁸Nangma kung panin a suohta-in na peisah ciengin hamsa ngaisut sin. Bang ding ahei cile a kiciel nasemte’ thamanza tawh kum guh sung nangma’ na ang sep pieh zo ta uhi; tuale TOPA na Pasien un na sepna zosie vuah thupha ang pie ding hi.

¹⁹Na bawnghon ule na tuuhon panun tacil apa poma TOPA na Pasien uh tungah na siensuo ding uhi; na bawnghon tacilte utawh na semton loin, na tuuhon tacilte uzong a mul na heu sih ding uhi.

²⁰TOPA in a teelna munah a kum kumin TOPA na Pasien uh mai-ah na innkuonpite utawh na ne ding uhi.

²¹Ahi vangin poina khatpo, a khelbai a mittaw, ahi sihle poina gol a nei khat popo ahile, TOPA na Pasien uh tungah biehpiehna-in na pie sih ding uhi.

²²Sangai ahiei sakhi ahiei na neh bangun, na khuo sung vuah mi buate le mi siengte in a kibangin na ne ding uhi.

²³Ahi vangin a sisan na ne sih ding uhi; tui bangin tuolah a si na buo ding uhi.