Read Zou THUHILKIANA 18 Bible Online

THUHILKIANA 18 - Zou bible

THUHILKIANA 18

¹Siempu ahi Levi minam zosie in Israel-te bangin tanh ahi a, luo ahi zongin a nei sih ding vua, amate in TOPA’ tanh [46]ahi biehpiehnate a ne thei ding vua,

²hinanle a unau dangte lahah luo a nei sih ding uhi; ama in amate tungah a ciem bangin TOPA khu amau’ luo ahi hi.

³Mite pieh biehpiehnate lah panin bawng ahi a, tuu ahi zongin siempute’ kaih ding ahi hi: Siempute tungah a lieng, a khagu ni le a gilpi a pie ding uhi.

⁴Na anpal, na lenggazu, na sathau, na heu masah uh na tuumul uh na pie ding uhi.

⁵Azieh pen TOPA’ min tawh na sem den dingin TOPA na Pasien un na minam zosie lah panun Levi-te[47] a teelsa ahi hi.

⁶Levi-te khat in Israel gamah a tenna, na khuopite uh khat popo nuasie-in TOPA’ teelna munah a nop hun hunin ang pei thei ding hi.

⁷Tua ciengin TOPA mai-ah na sema om a guol Levi-te zosie ma bangin TOPA a Pasien’ minin na sem thei ding hi.

⁸Amate in innkuon’ van neite[48] a zuana uh panin sumlut nei nan ule, amate tawh a kikimin neh ding satanh nga ton ding hi.

⁹TOPA na Pasien un note ang pieh ding gamah na tun ciengun, a mudahuoi khum mite’ gamtatnate na zui sih ding uhi.

¹⁰Note lahah a tapa ahi a, a tanu ahi zongin meihal kithoina-a a zang, ai a san, khutlam a en, mailam thu a gen, ai a tawi,

¹¹bum a zang, sihla thu a dong, a sisate thu a dong koima kimu lo ding hi.

¹²Bang ding ahei cile tam teng a sem poma TOPA adingin a kidahhuoi ahi hi; tam bang a kidahhuoi gamtatnate ziehin TOPA na Pasien un na mai panun amate notmang hi.

¹³TOPA na Pasien uh tungah na citah den ding uhi.

¹⁴Na suonmang dawh ding uh tam minamte in khutlam ente le aisante thu a ngai vua, hizongle note na hi ule tua bangin na gamtat ding uh TOPA na Pasien un ang phal sih hi.

¹⁵TOPA na Pasien un noma dingin na sanggamte uh lah panin keima tawh a kibang kamsang[49] khat ang khangsah ding hi; note in tua kamsangpa[50] thu na ngai ding uhi.

¹⁶Horeb muolah na kikhop ni-un, “Si kha ding ka hi ziehun TOPA ka Pasien uh’ aw ei zasahkia nawn sin. Tam meikuong vanglien zong ei musah nawn sin,” ci-in TOPA na Pasien uh kungah tam thu na ngen uhi.

¹⁷Tua ciengin TOPA in kei tam bangin ei dawngkia hi: “A thugente uh man hi.

¹⁸Amate dingin a minam sung panun nangma tawh a kibang kamsang[51] khat ka khangsah ding hi; keima in kamsangpa’ kam [52]sungah ka thute ka koi ding a, amate tunga ka thupieh zosie a unpi-in a gen ding hi.

¹⁹Ka min tawh a gen ding kamsangpa’[53] thugen a don lo poma kei mama in ka mawsah ding hi.

²⁰Hizongle kamsang khat in kei thupieh lopi-in ka min tawh thu a gen ngam a, ahi sihle pasien dangte’ min tawh thu a gen leh, tua kamsangpa si ding hi,” ei ci hi.

²¹Na lungsim sung vuah, “TOPA’ gen lo thu bang i ci thei uh ahei na ci kha thei ding uhi.

²²Kamsang khat in TOPA’ min tawh thu genin tua thu ang tun sih a, ang man sih leh tua thu khu TOPA’ gen ahi sih hi. Tua khu kamsangpa in a uong get ahi bo hi; Ama na giin ding uh hi lo hi.