Read Zou THUHILKIANA 19 Bible Online

THUHILKIANA 19 - Zou bible

THUHILKIANA 19

¹TOPA na Pasien un a gam uh note ang pieh minamte a suhsiet zaw, note in zong amate suonin a khuopite ule a innte vuah na ten zaw ciengun,

²TOPA na Pasien un na luo ding vua ang pieh gam sungah khuopi thum na tuomkoi ding uhi.

³Tuolthat khat popo tua khuote khat penpen ah a tai thei nadingin, TOPA na Pasien un na luo ding vua ang pieh tua leitang a gamlatna[54] na te ding vua, mun thumin na khen ding uhi.

⁴Tami pen sawmhlim hi loin kigalbawlna zong om ngai lopi-in mi khat a that hai kha, khum munah tai-in a teng mithat pa’ kungtung thu ahi hi:

⁵Gentena-in, mi khat sing phua dingin adang khat tawh gamlah pei-in, khat zawhsang in sing phua dingin a hei lamto a, tuale a heiga panin a heitang kitawhin a guolpa satkha-in tua pa a si leh; tua mithat pa tai-in tam khuopite khat popo-ah ama’ hinna a hu thei ding hi.

⁶Hizongle ama gel kigalnei ngai lo ahi ziehin sina thuoh dinga kilawm lo hi tama le, phula nuompa in a lungthah sulin nua delin lampi a gamlat ziehin ama pha-in tua mithat hai kha pa mawh tha kha thei ding hi.

⁷Tua ahi ziehin keima in thu kang pie hi: Khuopi thum na tuomkoi ding uhi.

⁸TOPA na Pasien un na pu na pate uh tungah kiciemin amate tungah gam buppi a khap bangin na gam uh ang kehpieh leh,

⁹tuni-a kang pieh thukhamte zosie limtahin zui a, TOPA na Pasien uh itin ama’ lampi na zui zingna uh ahi ziehin tua khuopite banah adang khuopi thum ma na belap lai ding uhi.

¹⁰Tuaci’n TOPA na Pasien un na luo ding vua ang pieh ding leitang tungah maw baang lo mi khat’ sisan luong loin, na tung vuah tua sisan mawna ang tun lo nading ahi hi.

¹¹Ahi vangin mi khat in adang khat muda a, ama na buhdapin na vuo na satin tua mipa a tha a, tua khuopite lahah khat pen pena a tai leh,

¹²mithat pa’ khuo upate in tua mun panin ama peisahin tha dingin phulapa kungah ap ding uhi.

¹³Ama na khuotuo sih ding uhi; note na nopsah thei nadingun Israel-te sung panin maw baang lote’ sisan luonsahna zieha khielna na hemkhie ding uhi.

¹⁴TOPA na Pasien un na nei ding vua ang pieh ding gam, le ang kipie ding leitang tungah khanglui mite in a na phusa uh na vengte’ kigisuong khin sih un.

¹⁵Mi khat in a bawlkhah mawna khatpo ahi a, khielna khatpo a bawlna-ah ahi zongin tua mipa mawsah nadingin teci khat beh kicing lo ding hi. Teci ni ahi sihle teci thum thugenna tawh mawsahna kikipsah pan beh ding hi.

¹⁶Huotna lungsim a nei teci khat in mi khat’ tatkhielna a mawsah dinga a pei leh,

¹⁷thukinei tegel a ni tuohin TOPA mai le khum huna siempute le thukhente mai-ah a kilaa ding vua,

¹⁸tuaci’n thukhente in limtahin kanin teci pa pen teci zuou ahi a, adang khat pa’ langkhatah a man lopi-a teci pang ahile

¹⁹adang khat tungah ama in bawl dinga a sawm bang lienin ama tungah na bawl ding uhi. Tuaci’n note sung panin sietna na hemkhie ding uhi.

²⁰A omlai mite in za-in a zau ding vua, note lahah tam bang mawna lien a bawlkia ngai nawn sih ding uhi.

²¹Mi na khuotuo sih ding uhi: hinna tangin hinna, mit tangin mit, ha tangin ha, khut tangin khut, keng tangin keng hi ciet ding hi.