Read Zou THUHILKIANA 2 Bible Online

THUHILKIANA 2 - Zou bible

THUHILKIANA 2

¹TOPA in keima ei gensa bangin San Tuipi[4] lam manaw-in senel gam i zinkia vua, Seir Muol kimvelah ni tampitah i vahvai uhi.

²Tua ciengin TOPA in keima kungah tam bangin ei gen hi:

³“Tam muol kimah sauvei khop na vahthap zo ta uhi. Leilu lam naw ta un.

⁴Mite tam bangin thu pie in: Sier gama a teng na sanggamte ule Esau’ suon le hlahte’ gam sung a nawh ding na hi uhi. Amate in ang giing ding uhi, tua ahi ziehin kidawm mama unlen

⁵amate tawh kido sih un. Bangzieh ahei cile a luo dingin Esau tungah Seir Muol pie zo ka hi ziehin na ketot cie nangawn uzong amau’ leitang kang pie sih ding hi.

⁶Amate tung panin na neh ding uh an sum tawh na lei ding uhi; amate tung panin na dawn ding uh tui zong sum ma tawh na lei ding uhi.

⁷Na sepna zosie vuah TOPA na Pasien un thupha ang pie valon ding hi; ama in tam senel gam lienpi na peina uh ang thei hi. Tam kum sawmli sungin note tawh TOPA na Pasien uh ang omton hi; bangma na kisam sih uhi,” ei ci hi.

⁸Tuaci’n Seir gama a teng i sanggam Esau’ tate i pelh vua, Arabah lampi, Elath lampi le Ezion-geber lampi lam i zui nawn sih uhi. Moab senel gam lampi dung teng manaw-in i pei ciengun,

⁹TOPA in ka kungah tam bang ei ci hi: “Moab-te gimsah sih unlen, amate tawh galin kido sih un. Bangzieh ahei cile Lot’ suon le hlahte nei dingin Ar khuo pie zo ka hi ziehin, na nei dingun amau’ leitang behkhat zong kang pie sih ding hi,’ ei ci hi.

¹⁰(Anak-te banga a tun sang, a tam le a lien Emim-te khum munah nidangin teng ngai hi.

¹¹Amate pen Moab-te in Emim-te a ci vangun Anak-te ma bangin amate zong Rephaim-te in kingaisun uhi.

¹²Tua tham loin Seir gamah Hor-te a na teng ngai vua, ahi vangin TOPA in amau’ nei dinga a pieh leitangah Israel-te in a na bawl bangin, Esau’ suon le hlahte in zong amate na suonin na susie a, amau’ tenna mun na luo uhi.)

¹³“Tua ciengin Zered Lui kantan un,” ei ci hi. Tuaci’n eite in Zered Lui i kantan uhi.

¹⁴Amate tawh kisai-in TOPA a kiciemsa bangin giephuol panin galhang khangmite zosie a si sieng dong ahi, Kadesh-barnea panin Zered Lui i kantan dong kikal kum sawmthum le kum giet sung khuol i zin uhi.

¹⁵Amate a unpi-un giephuol panin a si sieng dongun a langkhat vuah TOPA’ khut a pang tahpi hi.

¹⁶Mihingte lah panin galhang zosie a si zaw ciengin

¹⁷TOPA in ka kungah,

¹⁸“Tuni-in Ar khuo-a Moab gamgi a kantan ding na hi uhi.

¹⁹Amor-te’ gamgi na neh ciengun amate phin sih unlen galin zong kido sih un, azieh pen na nei dingun na tung vuah Ammon-te’ gam kang pie sih ding hi. Bang ding ahei cile Israel-te tungah tua leitang ka pie zo hi,” ei ci hi.

²⁰(Khum gam pen Rephaim gam zong na kici ngai hi. Khumi munah Rephaim-te na teng ngai vua, ahi vangin amate pen Ammon-te in Zamzummim-te ci uhi.

²¹Anak-te banga a tun sang, a thahat le a citam mite ahi uhi. Hinanle Ammon-te in amate suonin amau’ munah a ten thei nadingun TOPA in Ammon-te mai-ah amate a susie hi.

²²Ama in Sier-a a teng Esau’ suonlehlahte adingin amate mai-ah Hor-te a suhsiet ma bangin amate in zong tua mite susie-in gam nei lo a suo vua, tuni dongin amau’ gam a luo suoh uhi.

²³Caphtor pana ang pei ahi Caphtor-te in Gaza tawh a kinai-a na tengsa Avvim-te susie-in amau’ munah teng uhi.)

²⁴“Na khuolzin maban zom unlen Arnon Lui kansan un. En un, na khut sung vuah Heshbon Kumpipa, Amor-te Sihon le ama’ leitang kang pie zo hi. Ama suon dingin kipan unlen ama va sim ta un.

²⁵Tuni-in vansin nei-a om mite in ang zatah nading ule ang giin nadingun ka bawl ding a, amate in na thu a zah ciengun citunin note ziehin a lung gim ding uhi,’ ei ci hi.

²⁶Tuaci’n keima in Kedemoth senel gam panin Heshbon kumpipa Sihon kungah kamtai sawlin tam bang kilemna ding thu ka puohsah hi:

²⁷“Na gam sung nei nawsah leh lampi behah ka pei ding vua, ziet le vei-ah ka piel sih ding uhi.

²⁸Ka neh ding uh an sum tawh lei dingin nei zua ding a, ka dawn ding uh tui sum ma tawh lei dingin nei pie ding hi. Ka keng utawh ei nawhsah maimai in.

²⁹Jordan kantanin TOPA ka Pasien un ei pieh gam ka tun masangin Seir-a teng Esau’ suonte le Ar-a teng Moab-te in ei peisah bang lienin ei peisah in,” ka ci hi.

³⁰Ahi vangin Heshbon kumpipa Sihon in ei peisah lo hi. Azieh pen TOPA na Pasien un tuni-a a bawl bangin na khut sung vuah ama a pieh thei nadingin a lungsim a khausah a, a lung zong a phengsah hi.

³¹TOPA in keima kungah, “En in, na tungah Sihon le a leitang pieh kang kipan zo ta hi. A leitang na luo nadingin tu-in a lah kipan in,” ei ci hi.

³²Tuaci’n eite do dingin Jahaz ah Sihon le a mite zosie ang kuon ciengun

³³TOPA i Pasien in eite tungah ama ei pie hi; eite in a tapate le a mite zosie tawh ama i that uhi.

³⁴Khum hunin ama’ khuopi zosie i la vua, khuopi sima pasal, numei, le naupangte i su maimang uhi. A suohta khat beh i nuasie sih uhi.

³⁵I lahsa uh khuopi sunga van kinuasie teng tawh eima’ kep dingin ganhonte beh i la uhi.

³⁶Arnon Lui monga (tua lui-a om khuopi zong kihal hi) om Aroer panin Gilead dongin eite adingin khuopi kul a sang seng khat beh a om sih a, TOPA i Pasien in a unpi-in i khut sung vuah ei pie hi.

³⁷Ahi vangin Ammon-te’ leitang na neh sih vua, TOPA i Pasien’ ei thuhil bang lienin[5] Jabbok Lui a tunglam gam buppi le muol tunga om khuopite zong na pel uhi.