Read Zou THUHILKIANA 21 Bible Online

THUHILKIANA 21 - Zou bible

THUHILKIANA 21

¹TOPA na Pasien un na nei ding vua ang pieh ding leitang tunga lopangah si luong lum khat kimu-in a that a kithei sih leh,

²na upate ule na thukhente uh pei-in khumi tuol luong lupna kima khuopite a gamlatna te ding uhi.

³Siluong tawh kinai pen khuo upate in na sem nai lo, kol kivaw nai lo, bawnglaa khat a kai ding uhi;

⁴tua khuopi upate in lo-a kihlo nai lo, khaici zong a kivaw ngai nai lo, le a kang ngai lo tuiluong opna lui khatah tua bawnglaa kaisuhin tuami lui-ah bawnglaa’ ngawng a tan ding uhi.

⁵Tua ciengin TOPA na Pasien un a na sem ding le TOPA’ min tawh thupha a pie dinga Levi siempute a teelsa ahi ziehin amate pei-in kithuneina le kihauna zosie amau’ thu tawh kikhen ding hi.

⁶A kithat mipa tawh kinai pen khuopi upa zosie in lui sunga a ngawng kitan bawnglaa tungah khut a sil ding vua,

⁷“Ka khut un tam sisan a luongsah sih a, a kitha lam zong ka mu sih uhi.

⁸TOPA aw, na hutdamsa na mi Israel-te’ mawna ei maisah in; na mi Israel-te lahah midih sisan luonna omsah sin,” ci-in a tangko ding uhi.

⁹Tuaci’n TOPA muna-ah a manin na gamtat ziehun note lah panin maw baang lo sisan suona na hemkhie ding uhi.

¹⁰Na galte uh do dingin na kuon vua, TOPA na Pasien un na khut sung vuah amate hing pie-in salin na mat ciengun,

¹¹salte lahah numei melhoi khat mu-in, tua nu deigaw-in na tenpi nuom vua ahile,

¹²na inn vuah tua numei na zawpi ding uhi: Ama in a sam heukieu-in a cin tan ding a,

¹³a sila puonte suo dawhin na inn sungah hla khat bup ang omin a nu a pa ngai-in a kap ding hi; tua zaw ciengin ama na luppi thei pan ding a, nang a pasal hi-in, ama na zi hi thei pan ding hi.

¹⁴Ahi vangin ama tunga na lungkim zo sih leh, a nopna po-ah na peisah ding hi. Ama na daisahsa ahi ziehin sum tawh zua lo-in sila bangin zong na bawl sih ding hi.

¹⁵Mi khat in zi ni nei a, khat dei-in a khat dei lo a, a deinu le a deilo nu in ta nei tuohin a tapa neicil pen a deilo nu tawh a hin ahile,

¹⁶a tapate tungah a neisa goute a hawmpieh ciengin a deilo nu’ tapa sangin a deinu’ tapa a deisah zawh ziehin a deinu’ tapa pen a ta cilin bawl thei lo ding hi.

¹⁷Ama in a deilo nu’ tapa pen a tacilin pom ding a, a nei zosie’ tanh ni[55] pie ding hi. Bang ding ahei cile tua pa pen a pa’ thahatna tawh a pieng masa pen ahi ziehin tacil hina za ama-a’ ahi hi.

¹⁸Mi khat in a lungpheng, a ledo thei, nu thu pa thu ngai lo, a kihil cienga thu a mang nuom lo tapa khat a nei leh,

¹⁹a nu le a pa in a khuopi upate kung, khuopi tunkotah tua mipa peipi-in,

²⁰amate in a khuo upate kungah, “Tam ka tapa uh pen mi lungpheng le mi ledo thei, sap thei lo le zuhai anhai bep ahi hi,” ci ding uhi.

²¹Tua ciengin khuo pasal zosie in suong tawh ama seplia ding uhi. Tuaci’n na laizang vuah sietna na hemkhie ding uhi; tuale Israel-te zosie in za-in zau ding uhi.

²²Mi khat in sina cing mawna bawlin ama kithat a, sing tung khatah ama a khai ciengun,

²³sing tungah zan tungtawnin a luong om lo ding hi; khumi ni ma-in na vui pai ding uhi, azieh pen sing tunga kikhai mi poma Pasien’ samsietna thuoh ahi hi. TOPA na Pasien un luo dinga ang pieh ding na leitang uh na buasah sih ding uhi.