Read Zou THUHILKIANA 23 Bible Online

THUHILKIANA 23 - Zou bible

THUHILKIANA 23

¹TOPA mite kikhopna-ah a ciltang a kisuguoi ahi sihle a pasal neitah a ki-attan poma kihal thei lo ding hi.

²TOPA’ mite kikhopna-ah zawlta poma kihal thei lo ding hi. TOPA’ mite kikhopna-ah a suon a hlahte uh a khang sawmna dong na ngawnin kihal thei lo ding hi.

³TOPA’ mite kikhopna-ah Ammon-te ahi a, Moab-te ahi zongin kihal thei lo ding hi. TOPA’ mite kikhopna-ah a suonlehlahte a khang sawmna dong nangawnin kihal thei lo ding hi,

⁴azieh pen Egypt panin na peikhiet lai-un amate in lampi-ah an le tui tawh ang na lamdot sih vua, ang samsie dingin Mesopotamia gama om Pethor khuo panin Beor’ tapa Balaam ciel zawsop uhi.

⁵(Hinanle TOPA na Pasien un Balaam’ thu a mang sih hi; TOPA na Pasien un note ang it ziehin, TOPA na Pasien un tua samsietna pen no adingin thupha-in ang heipieh hi.)

⁶Note in na nuntah laisie-un amau’ nopsah nading le hau nading na bawlpieh ngai nawn sih ding uhi.

⁷Note in Edom mite khatpo na huot bawl sih ding uhi, azieh pen amate na sanggam uh ahi hi. Egypt-te khatpo zong na huot bawl sih ding uhi, azieh pen amau’ gamah note zong pemta na hi ngai uhi.

⁸TOPA’ mite kikhopna-ah amate sung pana a pieng a khang thumna panin kihal thei ding uhi.

⁹Na galte uh do dingin giephuol-ah na om ciengun, a kilawm lo na khat popo panin na kikem ding uhi.

¹⁰Na lah vuah mi khatpo in zanlai-in bawtui a te ziehin a bua leh, giephuol panin tua pa pusuoh ding hi; giephuol sungah ama lut lo ding hi.

¹¹Nitah ciengin tui tawh ama kipumsil ding a, ni tum ciengin giephuol sungah lut theikia ding hi.

¹²Giephuol pulamah dailen nading mun khat na tuom nei ding uhi.

¹³Na vanzahte ban vuah tuzum khat na nei ding uhi; a pulamah dai na len ciengun tua tawh lei tokuohin na zun na eh uh lei na vuakia ding uhi.

¹⁴Azieh pen TOPA na Pasien ukhu no ang hun ding le na khut sung vuah na galte ang pie dingin na giephuol utawh ang zinton ahi hi, tua ahi ziehin ama in na lah vuah a kilawm lo na khatpo a mu lo nading le ang vamangsan khah lo nadingin na giephuol uh a sientho kul ding hi.

¹⁵A neite kung panin no kunga ang tai silate na piekia sih ding uhi.

¹⁶Na khuopite lah panun amau’ teelna mun, amau’ lungkim penna, na lah vuah note tawh ang teng ding uhi; amate na gawt sih ding uhi.

¹⁷Biehinnpi sungah Israel’ tanute koima numei pahtatin om thei lo ding hi; Israel tapate zong biehinnpi sungah koima khat beh a pahtatin om thei lo ding hi.

¹⁸Numei pahtat nu kiguoina thaman ahi a, pasal pahtat pa[58] kiguoina thaman ahi zongin TOPA na Pasien uh’ inn sungah thuciemna khat popo-a pieh dingin na tawi sih ding uhi, azieh pen tamte khu a ni tuohin TOPA na Pasien vua dingin a kidahhuoi ahi hi.

¹⁹Na sanggam Israel khat tungah sum ahi a, neh ding an ahi zongin na khat popo a met deina tawh na leitawi sih ding uhi.

²⁰Gamdang mi khat tungah a metin leitawi na pie thei ding vua, hinanle na sanggam Israel mipa tungah a metin leitawi na pie sih ding uhi. Tam teng pen luo dinga na lut nading uh gam sungah TOPA na Pasien un nasepna zosie vuah thupha ang pieh thei nading ahi hi.

²¹TOPA na Pasien uh tungah thuciem na na bawl ciengun, na ciemna uh na tangtun nadingun hun khinto sih un; bangzieh ahei cile TOPA na Pasien un na kung vuah ang phul valon ding a, na tung vuah khielna ang hi ta ding hi.

²²Ahi vangin thuciemna bawl ding na kideh vua ahile na tung vuah khielna om lo ding hi.

²³Na kam utawh TOPA na Pasien tung vuah na dei bang vua na kiciemsa ma bangun na kam sung pan vua a pusuoh poma limtahin na sem ding uhi.

²⁴Na vengpa lengga lo-a na kuon uleh na du zaza uh, na kham dongun lengga na ne thei ding vua, ahi vangin na seu sung vuah bangma khat na guong sih ding uhi.

²⁵Na vengpa’ ankung ding laite lahah na pei ciengun na khut utawh a vuite na hiet thei ding vua, ahi vangin na vengpa’ ankung ding laite phieukawi tawh na at sih ding uhi.