Read Zou THUHILKIANA 28 Bible Online

THUHILKIANA 28 - Zou bible

THUHILKIANA 28

¹TOPA na Pasien uh’ thu na man vua, keima in tuni-a na tung vua kang gen ama’ thupiehte zosie limtaha na zui uleh, TOPA na Pasien un leitunga minam zosiete tungah ang koi ding a,

²TOPA na Pasien uh’ thu na man uleh na tung vuah tam thuphate zosie ang tung ding hi:

³Khuopi sungah thupha na nga ding vua, khuotate-ah zong thupha na nga ding uhi.

⁴Na sung pan vua a piengte, na leitang pan vua a pieng gate, na ganhonte, na bawnghonte ule na tuuhonte uh pungin thupha na nga ding uhi.

⁵Na lawte ule na annel pawina kuongte vuah thupha om ding hi.

⁶Na sungtum uh ciengin thupha na nga ding vua, na pusuo ciengun zong thupha na nga ding uhi.

⁷TOPA in na mai vuah ang langpang na galte a lelsah ding hi; note ang langpang dingin lampi khat panin ang kuon ding vua, lampi sagi-in na mai vuah a taimang ding uhi.

⁸Na ansalte ule na sepna zosie vuah TOPA in thupha ang tungsah ding hi; TOPA na Pasien un note ang pieh ding leitangah ama in thupha ang pie ding hi.

⁹TOPA na Pasien uh’ thupiehte zui-in ama’ lampi na tot nah uleh na tung vua ang ciemsa bangin a mi siengtho dingin TOPA in note ang sukip ding hi.

¹⁰Leitung mi zosiete in TOPA mina ang kihlat lam a thei ding vua, ang giing ding uhi.

¹¹TOPA in na pu na pate uh tungah pieh dinga a na ciemsa leitangah noma sung pana a piengte, na ganhon pan vua a piengte le na leitang pan vua a piengte tungah TOPA in note nahpitahin ang hausah ding hi.

¹²Na leitang tung vuah a hunin guo a zusah ding le na sepna zosie vuah thupha ang pie dingin TOPA in vantung le a gou hoi kholna inn ang honpieh ding hi. Minam tampite na leitawisah ding vua, hizongle note in mi kungah na leitawi sih ding uhi.

¹³Na kung vuah tuni-a keima in kang gen TOPA na Pasien uh’ thupiehte mangin tuate limtahin na zui vua, tuni-in na kung vua kang gen kammalte panin amau’ nasem dingin pasien dangte zui-in zietlam ahi a, vei lam ahi zongin na piel sih nah po uleh, TOPA in a mei lamin ang bawl sih dinga, a lutang lamin ang bawl ding hi.

¹⁴

¹⁵Hinanle TOPA na Pasien uh’ thu na man sih vua, tuni-a kang gen ahi ama’ thupiehte le a thukham teng zosie limtaha na zui sih uleh, tam samsietna zosie in note ang pha dinga, na tung vuah ang tu ding hi:

¹⁶Khuopi sungah ang kisamsie ding a, khuota-ah zong ang kisamsie ding hi.

¹⁷Na lawte ule na annel pawina kuongte kisamsie ding hi.

¹⁸Na sung vua a piengte, na leitang pan vua a pieng gate, na bawngte ule na tuuhonte uh zong kisamsie ding hi.

¹⁹Na sungtum ciengun ang kisamsie ding a, na pusuo ciengun zong ang kisamsie ding hi.

²⁰Keima ei nuasie-in na gamtatsietnate uh ziehin ang kinaw suhsiet masangun TOPA in na tung vuah gimna, patauna, galgihnate ang tungsah ding hi.

²¹TOPA in na luo ding vua na lut nading uh leitang panin ang suhmang masangin natna in ang bawmsah ding hi.

²²TOPA in kumzawnna, cithuo natna, cipawm natna, a sa mama khuolumna le guotui kanna, huisa mutgawpna, le maaibuoh natnate tawh ang gimsah ding a, tuaci’n na sigam masangsie-un ang del ding hi.

²³Na lutung vua om vantung zong sumngo bangin sanin guo zu lo ding hi; na nei vua om leitung zong siatang bangin sah giagua ding hi.

²⁴TOPA in na gam sung vua guote leivui ang suohsah ding a, ang kisuhsiet masangsie-un van panin na tung vuah tuate ang kiesuh ding hi.

²⁵TOPA in na galte uh mai-ah ang guolelsah ding hi; amate a do dingin lam khatin na kuonton ding vua, a masang vuah lam sagi-in na taimang ding uhi. Leitung kumpi gamte zosie adingin cimulthaw huoi na hi ding uhi.

²⁶Na luonghawmte uh vana leng vate le leitunga om ganhing zosie’ an hi ding a, tuate delmang ding mi koima om lo ding hi.

²⁷TOPA in na damkia thei lo nadingun Egypt uilutte le hima naikulte, hima lipneite le cithahte tawh note ang gimsah ding hi.

²⁸TOPA in motna, mittawtna, le lungsim buoina tawh note ang gimsah ding hi;

²⁹miel lahah mittawte a kimaimaw bangin suntanglai pi-in na kimaimaw ding vua, ahi vangin na lampi uh na mu thei sih ding uhi; mite’ bawlsiet le bulu-in na om zing ding vua, ang panpi ding koima a om sih ding hi.

³⁰Zi dingin numei khat na khaam ding vua, ahi vangin midang khat in ama a na luppi ding hi. Inn na lam ding vua, a sungah na teng sih ding uhi. Lengga um na bawl ding vua, a ga na nekha sih ding uhi.

³¹Na mitmu-un na bawngtangte uh kigo ding a, a sa na nekha sih ding uhi. Na maitang vuah na laate uh ang kiguhpieh ding a, na kung vuah ang kipiekia nawn sih ding hi. Na tuute uh na galte kipie ding a, ang hu ding koima om lo ding hi.

³²Na tapate ule na tanute uh midangte kipie ding a, sun nitang tumin amate na en ngetngut ding uhi; na et na lamun na mit uh a kham ding a, hizongle amate bangma na law zo sih ding uhi.

³³Na thei ngai lo uh minam khat in na leitang pan vua a piengte le na sepsa zosie uh ne sieng ding hi; ang kibawlsie-in ang kigawt zing ding hi.

³⁴Na mit vua na mu ding uh nate ziehin na motlaw va-ia ding uhi.

³⁵TOPA in na damkia thei lo nading uh a nasie mama uilut natna tawh na khup ule na keng ban vuah, na ketawte panun na luvum dongun ang genthei bawl ding hi.

³⁶Noma le na pu na pate un a thei ngai nai lo minam khat kungah TOPA in noma le na tung vuah vaihawm dinga na koi uh na kumpipa uh ang peipi ding a, khum sungah singlesuong tawh kibawl pasien dangte’ na na sem ding uhi.

³⁷TOPA in ang peipina mi zosiete lahah a cizathuoi, paunah le thugentena na suoh ding uhi.

³⁸Lo-ah khaici na tu ding vua, hinanle themno khat beh na la bo ding uhi, azieh pen kauphe in a netum ding hi.

³⁹Lengga um bawlin na pawngil sipsep ding vua, hizongle lenggazu dawn loin a ga zong na lo sih ding uhi, azieh pen na lengga uh lung neh ding ahi bo hi.

⁴⁰Na gam sung zosie vuah olive kung na nei ding vua, hinanle a thau na kinu tuom sih ding uhi. Azieh pen na olive gate uh pulmang ding hi.

⁴¹Tanu le tapate na nei ding vua, hinanle noma-a’ hi den lo ding hi, bang ding ahei cile amate salin kiman ding hi.

⁴²Na singkungte ule na leitang pan vua a pieng ga zosie khuombai an ahi ding hi.

⁴³Note sangin na lah vua om pemtate a sangzaw semsem ding vua, note na niem suhsuh ding uhi.

⁴⁴Amate in note ang leitawi ding vua, hizongle note in amate leitawi na pie zo sih ding uhi; amate a lutang suoh ding a, note a meidawn na suoh ding uhi.

⁴⁵Ama in na kung vua ang gen thupiehte le thukhamte zui loin, TOPA na Pasien uh’ thu mang lo na hi ziehun ang kisuhsiet masangsie-un na tung vuah tam samsietna zosie ang tung ding a, note hing nuadelin ang nua phah ding uhi.

⁴⁶Tuate pen noma le na suonlehlahte lahah lim le hilkholna lim hi zing ding hi.

⁴⁷Sil bang kimah kiningcinga note na op lai-un lungdam kipah tahin TOPA na Pasien uh’ na sem lo na hi ziehun,

⁴⁸TOPA in note do dinga ang sawl ding na galte uh’ na, gilkiel dangtana, guohtanga opna, bangkim tasapna tawh na sem ding uhi. Note ang suhsiet masangsie-in na ngawng vuah sia hahkol ang bul ding uhi.

⁴⁹TOPA in a gamlapi, leimong pan muvanlai bangin note ang taw dingin a ham na thei lo uh minam,

⁵⁰a giinhuoi minam, khanghamte a zatah vawt lo le khangnote zong maipha a pie tuon lo minam khat na kung vuah ang sawl ding hi.

⁵¹Note na sigam masangsie-un na gannote ule na leitang pieng a gate hing nehtum piehin ang suhsiet masangsie-un an, lenggazu, sathau, na ganhonte uh ahi sihle na tuuhon note uzong ang henpieh sih ding uhi.

⁵²Note in na muon uh kul muonhuoi a sangpite a cipzan masangin amate in na gam sung zosie vua a om na khuopi zosie ang imtawm ding uhi; TOPA na Pasien un note ang pieh na gam sung zosie vua a om na khuopi zosie sung vuah ang imtawm ding uhi.

⁵³Na galte un na khuopi zosie uh imtawm ding a, na cimaw hun sungun TOPA na Pasien un ang pieh, na sung pan vua a pieng na tanute ule na tapate uh’ sa na ne ding uhi.

⁵⁴Note lahah mi pien hoi le a kimipisah penpen pa in zong a sanggam, a kawilai a it a zi, a si nukhia pen a tate nangawn zong an a pie nuom sih ding hi.

⁵⁵Na khuopite sung vuah ang ki-imtawm nading u le na galte un ang lungkhamsah nading uh hun sungah neh kitasam ding ahi ziehin ama in a neh a tate’ sa koima a hawm nuom sih ding hi.

⁵⁶Note lahah a ngehsuo, a cithei pen numei, ama ngehsuo-in a ci a sa a nel seng ziehin a ketaw tawh tuol a tuon nuom va-ia lo nu in zong a it a kawilai a pasal, a tanute le a tapate adingin a sunga pieng naungehte le a kalkawm pana a peikhie a naulapte nangawn a phal sih ding hi. Bangzieh ahei cile a khuopite sung vuah ang ki-imtawmna le na galte un ang lungkhamsah nading hun sungah neh kitasam seng ding ahi ziehin ama in a tate a nedap ding hi.

⁵⁷

⁵⁸Tam laibu sunga kigiel tami thukham kammalte limtahin na zui sih vua, a vanglien, a cizathuoi min, TOPA na Pasien na zatah sih uleh,

⁵⁹TOPA in noma le na suonlehlahte tungah a nasie le a dam thei lo gimnate le a zauhuoi natsaute tawh ang nuoicip ding hi.

⁶⁰Ama in na giin uh Egypt natnate ang tungsahkia ding a, tuate in na tung vuah ang bawmden ding hi.

⁶¹Note ang kisuhsiet masangsie, tam thukham laibu sungah kiciemte sih nanle natna dang le gimna zosie zong TOPA in na tung vuah ang tungsah ding hi.

⁶²Hun khat lai-in vana aasi za pha nan locin themno khat na hi ta ding uhi. Azieh pen TOPA na Pasien uh’ thu na mang nuom sih uhi.

⁶³Ang hausah cieng ule ang punsah ciengun TOPA a lungkim bang lien ma-in, ang sietsah ding cieng ule ang manthaisah ding ciengun zong TOPA lungkim veve ding hi; na luo ding uh gam na lut vua kipanin ang kiphungkal ding hi.

⁶⁴TOPA in leimong khat pan mong khat, minam zosie lahah ang thethang ding hi; noma le na pu na pate un zong a thei ngai nai lo uh singlesuong tawh kibawl pasien dangte’ na na sem ding uhi.

⁶⁵Tua minamte lahah lungnopna na mu sih ding vua, na ketaw uh a tatna khop ding tawlngahna mun zong na mu sih ding uhi. Khum munah TOPA in lungsim patauna, mitgimna, lungsim zawngkhalnate ang pie ding hi.

⁶⁶Na hinkhuo uh lunghimawna tawh na om zing ding uhi; sun le zanin zau denin lungmuonna hinkhuo na nei sih ding uhi.

⁶⁷Na lungsim un a giin zauna le na mit un a mu ding nate’ ziehin zingmawngin, “Nitah hi leh!” na ci ding vua, nitahin zong, “Zingmawng hi leh!’” na ci ding uhi.

⁶⁸Na mukia nawn sih ding uhi, ci-a kang kamciemsa lampi ahi Egypt gamah TOPA in tembaw tawh ang peipikia ding hi; tua sunga na galte kung vuah sila numei le sila pasal dingin na kizua ding vua, ahi vangin koima in ang lei sih ding uhi.