Read Zou THUHILKIANA 29 Bible Online

THUHILKIANA 29 - Zou bible

THUHILKIANA 29

¹[62]Tam teng pen TOPA in amate tawh Horeb ah a na bawlsa a thuciemna banah Israel-te tawh Moab ah thuciemna a bawl nadinga Moses a thupieh thuciemna kammalte ahi hi.

²[63] Moses in Israel-te zosie hlanin a kung vuah tam bangin a gen hi: TOPA in Egypt gam sungah na mitmu-un Pharaoh tung, a silate zosie tung le a gam sung zosiete tungah a bawlna,

³na mit un a musa ze-etna lienpite, limte le na lamdang thupi zosiete na thei zo ta uhi.

⁴Ahi vangin tuni dongin TOPA in na tung vuah thu na tel nading uh lungsim ahi a, na mu thei nading uh mit ahi a, na zah thei nading uh bil ahi zongin ang pie sih hi.

⁵Keima in senel gam sungah kum sawmli sung kang pui zo ta hi. Na el vua na puonte uh sie loin na kedapte uzong a sie sih hi;

⁶TOPA na Pasien uh ka hi lam nei thei nadingun neh ding anlum le dawn ding lenggazu ahi a, khamthei zu ahi zongin na ne sih uhi.

⁷Tami munah nang pei ciengun ei do dingin Heshbon kumpipa Sihon le Bashan kumpipa Og ang pei uhi, ahi vangin amate i zo uhi.

⁸Amau’ leitang i la vua, Reuben-te, Gad-te le Manasseh minam alangte tungah luo dingin i pie hi.

⁹Tua ahi ziehin na sepna uh bangkim ah na lamzan[64] thei nadingun tami thuciemna kammalte limtahin zui un.

¹⁰TOPA na Pasien un tuni-a note tawh a bawl ahi TOPA na Pasien uh’ thuciemna sungah na lut thei nadingun, tuni-in ama in ama’ mi dinga ang kipsah thei nading, le na tung vuah ang ciemna le na pu na pate uh Abraham, Isaac, le Jacob tungah a kiciemna bangin na Pasien uh ahi thei nadingin na minam[65] lutangte uh, na upate uh, na uliente uh, Israel pasal zosie, na tate uh, na zite uh, na giephuol sung vua om pemtate, na sing uh ang tompieh, na tui uh ang tawipiehte a kipan note zosie tuni-in TOPA na Pasien uh’ mai-ah na ding uhi.

¹⁴Kiciemin ka bawl tam thuciemna pen tuni-in i TOPA Pasien mai-a a ding note beh tawh ka bawl ahi sih a,

¹⁵tuni-a note tawh ang omton lo mite tawh zong a bawlton ka hi hi.

¹⁶Egypt gama i ten dan i giedan ule i nawhkhah uh minamte laikima i pei dan uh zong na thei uhi.

¹⁷Amau’ sil kidahhuoi, singlesuong tawh a kibawl, ngun le kham tawh a kibawl, a lah vua a om milimte na mu zo ta uhi.

¹⁸Note lahah numei ahi a, pasal ahi a, innkuon ahi a, minam khat ahi zongin tua minamte’ pasien-te bie dingin TOPA i Pasien kung panin a lungsim kihei om kha thei ding hi. Note lahah a gunei singhui khat huihla-in a ga khalawng khat ang ga kha thei ding hi.

¹⁹Tami kiciemna kammal a za zosie in a lungsim vuah amau le amau thupha kipie tawmin, “Lungkhautahin ka gamtat vangin ka suohta veve ding hi,” a ci mi ang om kha ding hi. (Tua ahi ciengin mihoi le misie, a kibangin gimna a tungsah ding hi.)[66]

²⁰Amau’ langkhatah meikhu bangin TOPA’ lungthahna le thangsietna kitungto ding ahi ziehin TOPA in amate a maisah nuom sih ding hi. Tami laibu sunga a kigiel samsietna zosie amate tungah tung ding a, TOPA in mun vannuoi panin amau’ min phiet maimang ding hi.

²¹Tam thukham laibu sunga kigiel samsietna thuciemte tawh kituohin tuosietna thuoh dingin TOPA in Israel minam zosie lah panin amate a tuomin a la ding hi.

²²Mai lamah ang khang ding na tate ule gamlapi pana ang pei gamdang mite in tua gam kisietna le TOPA in a tunsah gimnate a mu ding vua,

²³a leitang zosie uh kaat le ci tawh a katum, khaici kivaw lo, bangma a po lo, lopa zong a po zo lona mun, a sinso zieha TOPA in a suhsiet Sodom le Gomorrah, Admah le Zeboiim-te’ kisietna tawh kibang hi.

²⁴Amate le leitung minam zosie in lamdang a sa ding vua, “Bang zieha TOPA in tami gam ahi ci bawl va-ia adiei? Tam lungthahna lienpi a piengsah khu bang ahi ta diei?” a ci tahtah ding uhi.

²⁵Mite in, “Tam pen Egypt pana amate a peipi lai-in amate tawh a bawl, a pu a pate’ Pasien ahi, TOPA’ thuciemna amate in nuasie-in,

²⁶a thei ngai lo uh pasien dangte le ama in amate tunga a pieh lo pasien dangte langah a kihei vua, tuate’ na semin a bieh zieh uh ahi hi;

²⁷tuaci’n khum gamah TOPA’ lungthahna a tung a, tam laibu sunga kigiel samsietna zosie tua leitangah a tungsah hi.

²⁸TOPA in sinsona, lungham thangpaina tawh a leitang panun a notmang a, tuni-a i mu bangun gam dangah amate a notmang hi,” ci ding uhi.

²⁹Thusimte TOPA i Pasien-a’ ahi a, ahi vangin ang kilah thute ahile eite le i tate-a’ hi-in, tam thukham sunga thu zosie i zui zing ding uh ahi hi.