Read Zou THUHILKIANA 30 Bible Online

THUHILKIANA 30 - Zou bible

THUHILKIANA 30

¹Na mai vua ka koi tami thuphate le samsietna zosiete na tung vuah ang tun ciengin, TOPA na Pasien un ang nawkhietna minam zosiete lahah tam thute phawhkia-in,

²tuni-a note kang thupieh bangin TOPA na Pasien uh kungah noma le na suon na hlahte na kilekia vua, na lungsim zosie ule na hinna zosie utawh ama’ thute na man uleh,

³TOPA na Pasien un hing nuomsa sah kia-in na tung vuah lainatna ang nei ding a, ang thethangna mi zosie lah panin TOPA na Pasien un ang kaikhawmkia ding hi.

⁴Leimong[67] khat nangawnah nang kinawdawh nan ule TOPA na Pasien un tua mun panin ang khawm ding a, ang peipikia ding hi.

⁵TOPA na Pasien un na pu na pate uh’ neisa gamah hing peipi-in tua gam na luo ding uhi; ama in na pu na pate uh sanga a citheizaw le a pungzaw-in note ang siem ding hi.

⁶Tua banah na lungsim zosie ule na hinna zosie utawh TOPA na Pasien uh itin na hin thei nadingun, TOPA na Pasien un noma le na suon na hlahte’ lungsim tep ang tanpieh ding hi.

⁷TOPA na Pasien un ang bawlsie na galte ule na langte tungah tami samsietna zosie ang tungsah ding hi.

⁸Tua ciengin TOPA’ thu na mangkia ding vua, tuni-a kang gen ama’ thupiehte zosie na zui ding uhi,

⁹tuale TOPA na Pasien un na sepnate zosie vuah, na sung pan vua piengte, na ganhonte sung pana piengte, na leitang pan vua piengte zosie-ah na dau uh ang peisah ding hi. Bang ding ahei cile na pu na pate uh tungah ama a lungkim bangin note tungah zong TOPA ang lungkimkia ding a,

¹⁰tuale na lungsim zosie ule na hinna zosie utawh TOPA lamah na kihei ziehun tami thukham laibu sunga a kigiel ama’ thupiehte le ama’ thukhamte zuina tawh TOPA na Pasien uh’ thu na man uleh ama in ang daupeisah ding hi.

¹¹A tahtahin tuni-a kang gen tami thupieh pen note adingin a hamsa seng sih a, zuila ding zong ahi sih hi.

¹²“I zah thei nading ule i zui thei nadingun vantungah koi va kato-in ei va lahpieh ta ding ahei?” na ci thei nadingun vantunga om ahi sih hi.

¹³“Tua thu za-in i zui thei nadingun koi in tuipi galkhat kantanin ei lahpieh ding ahei?” na ci thei nadingun zong tuipi gala om ahi kan sih hi.

¹⁴Om lo hi, a thu na kung mama vuah a om hi; a thu na zui thei nadingun na kam sung ule na lungsim sung vuah a om hi.

¹⁵En un, tuni-in na mai vuah hinna le nopsahna, sina le sietna ka koi zo hi.

¹⁶TOPA na Pasien[68] uh itna, ama’ lampite totna, ama’ thupiehte, a thukhamte le a ngaina kipte zuina tawh, tuni-in na kung vua kang gen TOPA na Pasien uh’ thupiehnate na man uleh, note nungta-in pungin gou luo dinga na lut nading uh gam sungah TOPA na Pasien un thupha ang pie ding hi.

¹⁷Ahi vangin na lungsim uh kihei-in a thugen za loin pasien dangte mai-a a kun ding le a na a sem dinga na lampiel uleh,

¹⁸keima in tuni-in note kungah kang gen hi, note na mangthai ding uhi; Jordan galkai-in a lut ding le a nei dinga na peina uh gam sungah sauvei teng loin na mangthai ding uhi.

¹⁹Keima in tuni-in na langkhat vuah teci a pang dingin vanpi le leipi ka ko a, na mai vuah hinna le sina, thuphate le samsietnate ka koi zo hi. Noma le na suon na hlahte uh a hin thei nadingin nuntahna teel unlen,

²⁰TOPA na Pasien uh itin a thu mangin, ama tukip un; azieh pen TOPA in na pu na pate uh Abraham, Isaac, le Jacob tungah a pieh dinga a ciemsa gamah na ten thei nadingun note adingin tua khu nuntahna le khansauna ahi hi.