Read Zou THUHILKIANA 31 Bible Online

THUHILKIANA 31 - Zou bible

THUHILKIANA 31

¹Moses in Israel-te zosie kungah tam thute a unpi-a[69] a gen zaw ciengin

²ama in a kung vuah, “Tu-in kei kum za le kum sawmni ka pha ta hi. Dei bangin ka pia zo nawn sih a, TOPA in ka kungah, ‘Tami Jordan gal na kai sih ding hi,’ ei ci zo hi.

³TOPA na Pasien mama uh na mai vuah ang galkai ding hi. Ama in na mai vuah tam minamte susie ding a, amate na suonmang ding uhi. TOPA’ kamciemsa bangin na mai vuah Joshua a galkai ding hi.

⁴TOPA in Amor-te’ kumpi Sihon le Og tung le a gam uh tunga a bawl bangin amate tungah zong a bawl ding hi.

⁵TOPA in na tung vuah amate ang pie ding a, na kung vua kang thupieh zosie tawh a kituohin amate tungah na bawl ding uhi.

⁶Thahat unlen hangsan un; zau sih unlen amate giing sih un. Azieh pen no ang zawpi pa khu TOPA na Pasien uh ahi hi; ama in note ang cimaw sah sih ding a, zong ang nuasie sih ding hi.

⁷Tua ciengin Moses in Joshua hlanin Israel-te zosie’ mitmu-in ama kungah tam bangin a gen hi: “Thahat inlen hangsan in, bangzieh ahei cile TOPA in a pu a pate uh tungah pieh dinga a ciemsa gamah tam mite zawpi ding khu nangma na hi hi; nangma in amate khum gam na luosah ding hi.

⁸Na masanga a peipa khu TOPA ahi hi. Nangma tawh ama ang om ding hi; ama in nang hing cimawsah loin, zong hing nuasie lo ding hi. Zau sinlen lungkie sin,” a ci hi.

⁹Tua ciengin Moses in tam thukham giel a, tuaci’n TOPA’ thuciemna singkuong a puo Levi’ tapa siempute le Israel upa zosie tungah a pie hi.

¹⁰Moses in tam bangin amate thu a pie hi: “A kisesa leiba kimaisah kum ahi kum sagi a cin siel, buh pawi[70] hunin

¹¹ama’ teel nading mun TOPA na Pasien uh mai-ah a kilaa dingin Israel-te zosie ang pei ciengun, amau’ zahin Israel-te zosie mai-ah tam thukham na sim ding uhi.

¹²Amate in za-in TOPA na Pasien uh zatah a, tami thukham sunga kammal zosie limtahin a zui thei nadingun nupi, papi, naupangte le na khuo sung vua a teng pemtate khawm in.

¹³Tuaci’n tami thukham a thei nai lo a tate un zong za-in, Jordan galkai-in na nei ding uh gama na ten laisie uh na TOPA na Pasien uh zatah dan ding ang thei ding uhi,” a ci hi.

¹⁴TOPA in Moses kungah, “Na si ding hun ang nai ta hi; ama ka sawl thei nadingin Joshua hing hlan inlen, kikhopna puonbuh sungah nangma zong hing om in,” ci hi. Tuaci’n Moses le Joshua pei-in kikhopna puonbuh sungah a om vua,

¹⁵puonbuh kotpi gei meii khuomah TOPA kilang hi; puonbuh kotah meii khuom a kitung hi.

¹⁶TOPA in Moses kungah, “Na pu na pate tawh a lumton bai ding na hi ta hi. Tua ciengin a pei nading uh gam sunga gamdang pasien-te tawh tam mite a pahtat ding uhi; amate in kei ei nuasie-in amate tawh ka bawlsa ka thuciemte a palsat ding uhi.

¹⁷Khum hun ciengin a tung vuah ka sin a so ding hi. Keima in amate nuasie-in ka mai ka phuol ding hi; amate olno tahin nehtumin a om ding vua, amate tungah a zauhuoi gimna tampi a tung ding hi. Khum ni ciengin, ‘Eite lahah i Pasien ang op lo ziehin tami gimnate i tunga ang tung hi lo amah?’ a ci ding uhi.

¹⁸Khum ni ciengin pasien dangte lamah a kihei ziehun a gamtatnasa uh gitlona zosie ziehin ka mai ka phuol tahtah ding hi.

¹⁹Tua ahi ziehin tu-in tami la giel inlen, Israel-te tungah hil in; Israel-te langkhatah kei dinga teci a suoh dingin a kam sung vuah tami la mop in.

²⁰Azieh pen a pu a pate uh kungah kiciemin ka khapsa bawngnawi le khuoizu luonna gamah amate tunpi siengin, tuaci’n amate in an khamtahin ne-in a thau milmel zaw ciengun, pasien dangte lamah kihei-in a na uh semin kei ei simmaw ding vua, ka thuciemna zong a susie ding uhi.

²¹A tung vuah a zauhuoi gimna tampi a tun ciengin a langkhat vuah tami la teci-in a pang ding hi, azieh pen a suonlehlate’ kam sung panin tami la mangngil thei loin a om ding hi. Bangzieh ahei cile keima in amate pieh dinga ka ciemsa gamah ka tut masang, tu nangawnin zong bang bawl nuom uh ci ka thei hi,” a ci hi.

²²Tua ni ma-in Moses in tami la gielin Israel-te a hil hi.

²³Tua ciengin TOPA in Nun’ tapa Joshua sawl a, “Thahat inlen hangsan in, bangzieh ahei cile amate pieh dinga ka ciemsa leitang tungah Israel-te na peipi ding hi; nangma tawh kang om ding hi,” a ci hi.

²⁴Moses in a tawp dongin laibu khat sungah tami thukham kammalte a giel zaw ciengin,

²⁵Moses in TOPA’ thuciemna singkuong a puo Levi-te thu pie a,

²⁶“Tami thukham laibu la unlen TOPA na Pasien uh’ thuciemna singkuong gei-ah koi un; na langkhat vuah teci dingin khum munah omsah un.

²⁷Bangzieh ahei cile bangza taha a ledo mi le a lungkhauh mi na hi uh ahei ci kang thei hi. Ka hin sung bawna na lah vuah TOPA ledo na hi uleh ka si nua ciengin bang zatahin na ledo kan zaw lai ding vuoi izaw!

²⁸Tami kammalte amau’ zahin genin, a langkhat vuah teci-a pang dingin vanpi le leipi ka ko thei nadingin keima kungah na minam upate ule na ulien zosie uh hing khawm un.

²⁹Azieh pen ka si nua ciengin nang siet gamtat valon ding vua, kang thupieh lampi panin na piel ding lam uh ka thei hi. Mailam hun ciengin TOPA muna-ah siet gamtatin na khut utawh na bawlsate uh ziehin ama lungthahsah ding na hi ziehun na tung vuah gimna ang tung ding hi,” a ci hi.

³⁰Tua ciengin Moses in a kikhawm Israel mi buppi’ zahin tami la guite a dawng tawp dongin a sut hi: