Read Zou THUHILKIANA 32 Bible Online

THUHILKIANA 32 - Zou bible

THUHILKIANA 32

¹Vantungte aw, na ngai un, kang hopi ding uhi; ka kam pana ka thugente leitung in za taheh.

²Guomal bangin ka thuhilte phi-in, daicim bangin ka thugente kie hinlen; lo dawng tunga guophi le ankung tunga guozu bang taheh.

³Bangzieh ahei cile TOPA’ min ka tangko ding hi; eite’ Pasien tungah vanglietna pie un!

⁴Ama suongpi hi a, a nasepte bukimin a lampite zosie khu dihtatna ahi hi. A zuou lo thuman Pasien ahi a, midih le mi thutang ahi hi;

⁵hinanle a letat a tate in ama[71] tungah gamtat sie-in, amate pen a lampiel le a lungkawi khang mite ahi uhi.

⁶Mimaw, mingolte aw, tam bangin TOPA thuh ding na hi uh amah? Note ang piengsah, ang siem, ang kipsah na pa uh hi lo amah?

⁷Hun luite phawh unlen, muol ei khupsan hunte lungngai un; na pa dong un, ama in ang theisah ding hi; na upate dong locin ang gen ding hi.

⁸Sangpen Pa[72] in minamte gou pie a, mihing ten nading mun a se ciengin, pasien-te[73] a phaza zui-in mite’ gamgi a phut hi;

⁹TOPA’ tanh khu ama’ mite ahi a, Jacob khu ama kipie a tanh ahi hi.

¹⁰Ama in senel gamgawta munah ama a va[74] hi. Ama in ama dalin khoi a, a mittang a diem bangin amate diemin a kem hi.

¹¹A bu tawhnawi-in a note tungah a hla a zap, a hla zahin a note a man, a hlakui tawh a note a puo muvanlai bangin,

¹²TOPA beh in ama a pui a; ama tawh gamdang pasien omton lo hi.

¹³Ama in leitung a sangna-ah amate tengsah a, lo-a piengte tawh a va[75] hi; suong kawm panin khuoizu tawh ama va a, meituh suong panin sathau a nesah hi;

¹⁴bawnghon panin bawng thaukhal, tuuhon panin tuunawi, tuunote le tuutangte’ thau tawh; Bashan bawnghonte le keelte, mangbu hoi pente tawh lengga panin lenggatui san na dawn uhi.

¹⁵Jacob in khamtahin[76] a ne hi; Jeshurun ang thau-in a keng tawh ei lepeh ta hi. Na thau ziehun na sa uh dim phitphet a, na zol sipsep uhi! Ama in ama a bawl pa Pasien nuasie a, a kihutdamna Suongpi a simmaw bawl hi.

¹⁶Amate pen pasien dangte tawh a hazat thei nadingin a gamta vua, a kidahhuoi nate tawh ama a lungthahsah uhi.

¹⁷Pasien ahi lo dawite, a thei khah ngai lo uh pasien-te, na pu na pate un a giin lo uh, tu nai-a ang tung tha ahi, pasien-te kung po-ah biehpiehna a pie uhi.

¹⁸Note in ang hing pa[77] Suongpi na phawhkha ta sih vua, ang siem pa Pasien na mangngil ta uhi.

¹⁹TOPA in mu-in haza[78] a, ama in a tanute le a tapate a nol[79] hi.

²⁰Ama in: Keima in a kung panun ka mai ka phuol ding a, a tawpna-ah amate bang ang suoh vuoi ka en ding h; bangzieh ahei cile amate pen a letat khang mite ahi vua, muon tah lo tate ahi uhi.

²¹Pasien a hi lote tawh ka hazat nadingin ei bawl vua, a milimte utawh ei lungthahsah uhi. Tua ahi ciengin keima in mihinga sim tah lo mite tawh a hazat thei nadingun amate ka bawl ding a, a maw mama minam khat tawh ka thangpaisah ding hi.

²²Bang zieh ahei cile ka lungthahna mei bangin kuong a, Misikhuo dongah a kuong hi; tua in leitung le a tunga piengte a valtum a, muol le tang bulpite a kuongsah hi.

²³A tung vuah gimna ka khol ding a, a langkhat vuah ka thaltangte ka zang ding hi.

²⁴Amate gilkielin a sigam ding vua, a sa mama meikuong le a siehuoi natna in amate valtum ding hi. A pet dingin a ha hiem gamsate, a tu dingin gu a nei gulte ka sawl ding hi.

²⁵Gawldung lahah namsau in amate thatgam ding a, tuaci’n innkhan sungah zauna lienpi om ding hi. Azieh pen tangval le ngahnu, nawi tep nausente, samkangte tawh a that ton ding hi.

²⁶Amate[80] thethangin mihing lah panin a kiphaw khahna uh phiet ding ka ngaisun hi;

²⁷ahi vangin alangte in a ngaisun khiel vua, “Ka khut un guol a zo hi. Tam teng zosie a sem khu TOPA ahi sih hi,” hing ci kha ding ahi ziehun galte in ei phin ding ka zau hi,” a ci hi.

²⁸Ngaisutna nei lo minam ahi uhi; a sung vuah theitelna om lo hi.

²⁹Mipil hi pawse uleh, tam thute a thei ding uhi; a tawpna-ah bang pieng ding ci a khinkhai thei ding uhi.

³⁰A Suongpi un amate zua sih hinlen, TOPA in amate piekhie sih leh, bangci-in mi khat in mi tulkhat gamdelin, mi ni in mi tul sawm taisah zo ding ahei?

³¹Eite’ Suongpi le amau’ suongpi kibang lo hi; i galte mimaw[81] ahi uhi.

³²A lenggui uh Sodom lenggui ahi a, Gommorah lengga um pana ang kipan ahi hi; a lengga uzong a gunei lengga ahi a, a bawhte zong a kha hi.

³³A lenggazu uh gulpi gu le muoltan gupha tawh kibang hi.

³⁴Tami khu ka kungah kikhol a, ka gou kholna sunga kikoi hi lo amah?

³⁵Phulahna le thuhkiana khu kei-a’ hi a, a hun ciengin amate a keng uh a taal ding hi. Bangzieh ahei cile a tuosiet hun ding uh nai mama ta a, a siet nading uh mallangtahin a tung hi.

³⁶A vang bei lam ule sila le a suohta koima a op lo lam uh a mu ciengin, TOPA in ama’ mite dih a tangsah ding a, ama’ nasemte tungah lainatna a nei ding hi.

³⁷Tua ciengin ama in tam bangin ci ding hi: A kibuhna uh suongpi,

³⁸a biehpiehna uh sathau ne-in, dawn thei a biehna uh a dawn amau’ pasien-te hei-ah om uh ahei? Tuate thosahin kihusah unlen, na kidalna hisah un!

³⁹Tu-in thei un; kei, keima nangawn ama ka hi hi. Kei simlo pasien dang koima a om sih hi. Ka that a, ka hingsah hi; ka liemsah a, ka damsah hi; ka khut sung panin a hunkhie zo koima om lo hi.

⁴⁰Bangzieh ahei cile vantung lamah khut lamto-in tam bangin ka kiciem hi: Keima a nungta ka hi ma bangin,

⁴¹a te lihleh ka namsau tatin, thukhen dingin tua ka mat ciengin; ka galte tungah phu ka la ding a, ei mudate ka thuhkia ding hi.

⁴²Ka thaltangte si ka khamsah ding a, ka namsau in satah a nawmval ding hi. Tuate pen a samsau galte, a kithat mite le a kiman mite’ sisan pan hi ding hi.

⁴³Vante,[82] ama’ mite aw, phat unlen, no pasien zosiete aw, ama bie un![83] Bangzieh ahei cile a ma in a tate’[84] sisan phu la dinghi; ama in a langte tungah phu a la ding hi. Ama[85] a mudate thuhkia ding a, ama’ mite adingin tua gam a siensuo ding hi.

⁴⁴Moses pei a, mite’ zahin ama le Nun’ tapa Joshua[86] in tam lamalte zosie a sut uhi.

⁴⁵Moses in tam lamal zosie a sut zaw ciengin,

⁴⁶ama in a kung vuah tam bangin a gen hi: Tuni-a na kung vuah teci panga kang gen tami thute zosie ciemte un; na tate un tami thukham kammalte limtahin a zui thei nadingun thupieh bangin gen un.

⁴⁷Tami pen note dingin thu mawhna ahi sih a, na hinna uh ahi a, luo dinga Jordan gal na kaina uh gam sungah ahi zongin tami thu ziehin sawt veipi na nungta ding uhi,” a ci hi.

⁴⁸Khum ni mama-in TOPA in Moses tungah tam bangin a gen hi:

⁴⁹“Jericho gal lam, Moab gam sunga Nebo Muol le Abarim muolvum ah kato unlen, Israel-te’ tan dinga ka pieh Canaan gam va gal-et ta un;

⁵⁰Hor Muol tungah na sanggampa Aaron si-in a mite tawh a kigawm bangin, nang zong na katona muolvumah na si ding a, na mite tawh na kigawm ding hi;

⁵¹bangzieh ahei cile Zin gam, Kadesh khuo gei-a Meribah tui phuol, Israel-te lahah nei upna na hlasuo ta a, Israel-te lahah ka siengthona na kemcing ta sih hi.

⁵²A gamlapi panin khumi gam na gal-et bep ding a, ahi vangin Israel-te tunga ka pieh gam sungah na lut sih ding hi,” a ci hi.