Read Zou THUHILKIANA 6 Bible Online

THUHILKIANA 6 - Zou bible

THUHILKIANA 6

¹Tu-in tam teng pen note galkai-in na luo ding uh gamah na tun ciengun na zui ding vua TOPA na Pasien un note tungah kang hil dinga ei thupieh, thukhamte le ngaina kipte ahi hi,

²tuaci’n na hinkhuo uh a sawt thei nadingin note, na tate ule na tute un na hin sung tungtawnun TOPA na Pasien uh zatahin, kei ei hil sawnsah a thukhamte le a thupieh zosie na zui ding uhi.

³Tua ahi ziehin Israel aw, na nopsah thei nading le na pu na pate uh’ Pasien TOPA nangma tunga ang ciemsa bangin, note zong bawngnawi le khuoizu luonna gamah na pun na men thei nadingun tam thute ngai unlen limtahin zui un.

⁴Israel-te aw, za un: TOPA i Pasien pen TOPA khat beh ahi hi.[15]

⁵TOPA na Pasien uh, na lungtang zosie, na hinna zosie le na hatna zosie utawh na it ding uhi.

⁶Keima in tuni-a note kang pieh tam thute na lungtang vuah vom lenlon un.

⁷Na tate hil unlen, inn ah na op uh cieng, khuolai na va uh cieng, na lup uh cieng le na thaw uh ciengin amate genpi un.

⁸Na khut tung vuah lim dingin tuate khi unlen, na zangpai vuah melcina-in[16] tuate suong un.

⁹Na kotbieng khuomte tung le na tunkotte tung vuah tuate giel un.

¹⁰TOPA na Pasien un na pu na pate uh ahi Abraham, Isaac, le Jacob-te tungah pieh dinga a na ciemsa gam, na lam lo uh a gol a hoi khuopite,

¹¹na khol lo uh sil hoi tawh kidim innte, na taw lo uh tuikhuhte, na suon lo uh lengga guite, le olive kungte opna gamah hing peipi-in khamtahin na neh zaw ciengun,

¹²saltanna Egypt gam panin note ang peipi TOPA na mangngil khah lo nading uh kidawm un.

¹³TOPA na Pasien uh na zatah ding uhi; ama’ na beh na sem ding vua, ama’ min beh tawh na kiciem ding uhi.

¹⁴Na kimvel vua mite’ pasien-te ahi pasien dangte na zui sih ding uhi.

¹⁵Azieh pen note tawh ang omton TOPA na Pasien uh pen a thangsie Pasien ahi hi. Na langkhat vuah TOPA na Pasien uh’ lungthahna hing kikuontaw ding a, tuaci’n lei maitang panin note ang susie ding hi.

¹⁶Massah munah ama na zelah bangun TOPA na Pasien uh na zelah sih ding uhi.

¹⁷TOPA na Pasien un note ang thupiehte, a thukipte, a thukhamte limtahin na zui ding uhi.

¹⁸TOPA in na pu na pate uh tunga pieh dinga a ciemsa leitang hoi-ah lutin na luo thei nading ule na nopsah thei nadingun TOPA muna-ah a man le a hoi nate bawl unlen,

¹⁹TOPA ang kamciem bangin na mai panun na galte zosie uh notmang un.

²⁰Ang tung ding hunah na tapate un, “TOPA i Pasien in note ang thupieh ahi thukipte, thukhamte le ngaina kipte bang a cinopna ahei?” ci-in ang dawh ciengun

²¹na tapate uh kungah, “Egypt gamah Pharaoh’ salin i na om vua, ahi vangin Egypt panin TOPA in a banhat tawh ei na peipi hi.

²²TOPA in i muna vuah Egypt, Pharaoh le a innkuonpite zosie tungah a lien le a cizathuoi lim le na lamdangte ei na lah hi.

²³I pu i pate tungah pieh dinga a na ciemsa leitangah ei puoh dingin khum mun panin ei na peipi hi.

²⁴Tua ciengin i hoi zing nading ule tuni-a banga ei hinsuo thei nadingin, TOPA i Pasien zatatin tami thukham zosie i zui nadingin TOPA in thu ei pie hi.

²⁵Ei thupiehsa bangin TOPA i Pasien uh muna ah tam thupieh vannuoi limtahin i zui uleh, thuman sungah i om ding uhi,” na ci ding uhi.