Read Zou THUHILKIANA 7 Bible Online

THUHILKIANA 7 - Zou bible

THUHILKIANA 7

¹TOPA na Pasien un na luo ding uh gamah hing puohin na lut ciengun, na mai vuah no sanga a thahatzaw le a tamzaw minam sagite ahi Hit-te, Girgash-te, Amor-te, Canaan-te, Perez-te, Hiv-te, le Jebus-te delmangin,

²TOPA na Pasien un nohaw tungah amate hing pie-in, amahaw na zaw zo ciengun, a unpi-in na susiemang ding uhi. Amate tawh thuciemna bawl sih unlen a tung vuah hepina zong lah sih un.

³Amate tawh zi le ta-in kizong sih unlen, a tapate uh tungah na tanute pie loin, na tapate uh adingin zong a tanute uh la sih un.

⁴Azieh pen pasien dangte’ na sem dingin keima ei zuina panun na tate uh a pielsah ding uhi. Tua ciengin note tungah TOPA’ lungthahna kikuontaw ding a, tuaci’n thakhatin note ang susie ding hi

⁵Hinanle amate tungah tam bangin na bawl ding uhi: Amau’ maitamte susie-in amau’ khuom siengthote[17] satcim unlen, amau’ khuom siengthote phua-in, amau’ milimte mei tawh hal un.

⁶Bangzieh ahei cile TOPA na Pasien uh tungah note a siengtho mi na hi uhi; TOPA na Pasien un leitung mi zosie lah panin ama’ mi ding le ama’ gougil nei dingin note ang teel zo hi.

⁷Midangte sanga na tamzawh zieh vua note tungah TOPA hing lunglutin ang teel na hi sih uhi. Bang ding ahei cile mi namcinte lahah note a citawm pen na hi bo uhi.

⁸TOPA in na saltanna uh Egypt kumpipa Pharaoh’ khut sung pan ang hutkhiet a, a vanglietna tawh ang peipina pen TOPA in note hing itin na pu na pate uh kunga a kiciemna a zuina zieh ahi hi.

⁹Tua ahi ziehin TOPA na Pasien un Pasien ahi a, ama itin ama’ thupiehna a zui mite tungah khang tul tampi dongin a thuciemna le a itna a tukip a thuman Pasien a hina thu le,

¹⁰ama a niel mite tungah suhsietna tawh a thuh pa a hina thu thei un. Ama a niel mite tungah kiheh loin ama in susietna tawh a thuh pai hi.

¹¹Tua ahi ziehin tuni-in na kung vua kang gen thupiehte, thukhamte, le ngaina kipte limtahin zui un.

¹²Note in tami ngaina kipte kukal tahin na zui uleh note tungah TOPA na Pasien un na pu na pate uh tunga a na ciemsa thuciemna’ thumanna khu a tukip ding hi.

¹³Ama in note hing itin, thupha hing pie-in, ang pungsah ding hi; na sung vua piengte, na leitang pan vua a piengte, na an ule na lenggazu uh, na sathaute ule na ganhonte uh hing pungsahin, na tuuhonte ule na keelno honte uzong thupha ang pie ding hi.

¹⁴Mi zosie lahah thupha nga pen minam na hi ding vua, noma lahah ahi a, na ganhonte lah vuah ahi zongin ta nei lo a ciing a om sih ding hi.

¹⁵Note sung panin TOPA in natna vannuoi hemkhie ding hi; note tungah Egypt gam’ natna huoisie zosie ang tung sih ding hi, ahi vangin ama in ang muda mite tungah tuate a tungsah ding hi.

¹⁶TOPA na Pasien un na tung vua ang pieh minam zosie a unpi-in na susie ding vua, amate na khuotuo sih ding uhi; note dingin amate pen thang anta ang hi ding uh ahi ziehin a pasien-te na bie sih ding uhi.

¹⁷Na lungsim sung vuah, “Eite sangin tam minamte a tamzaw uhi; amate bang i ci suon zo ding uh ahei? na ci khah uleh

¹⁸giing malmal sih un. TOPA na Pasien un Pharaoh le Egypt-te zosie tunga a bawl,

¹⁹na mit utawh na mu uh zelahna lienpite, lim le na lamdangte, khut thahat le a kizah bante tawh ang peipi TOPA na Pasien uh phawh un. TOPA na Pasien un na giin uh mi zosie tungah tua bang lienin a bawl ding hi.

²⁰Tua tham loin, TOPA na Pasien un a omlaite le a kiphuolte a kisuhsiet sieng masangsie, amate lahah gimna[18] a tungsah ding hi

²¹Noma tawh ang omton TOPA na Pasien uh pen a lien le a giinhuoi Pasien ahi ziehin amate giing sih un.

²²TOPA na Pasien un na masang vuah tam minamte themthemin notmang ding hi; note in thakhatin na notmang thei sih ding uhi. Tua hi mawh leh note dingin gamsate ang tam seng ding hi.

²³Hizongle TOPA na Pasien un na tung vuah amate ang pie ding a, amahaw a kisuhsiet masangin kipatausah ding hi.

²⁴Ama in na khut sung vuah a kumpite uh ang pie ding a, note in vansin nei panin amau’ min na phietmang ding uhi; amate na suhsiet zo masangsie-un na langkhat vuah koima pang zo lo ding hi.

²⁵Amate pasien-te’ limte mei tawh na hal ding uhi. Tua thangah awh thei ding na hi ziehun tuate tunga om ngunte ahi a, khamte ahi zongin deigaw sih unlen noma dingin zong la sih un; bangzieh ahei cile tua khu TOPA na Pasien uh adingin a kidahhuoi ahi hi.

²⁶Na inn sung vuah a kidahhuoi nate tumpi sih un. Tua hile tuate bangin suhsiet dinga kituomkoite na suoh ding uhi. Tua nate kidahin na huot mama ding uh ahi hi, azieh pen tua nate suhsiet dinga kituomkoi ahi hi.