Read Zou THUHILKIANA 8 Bible Online

THUHILKIANA 8 - Zou bible

THUHILKIANA 8

¹Note nungta-in na pun nading ule na pu na pate uh tungah TOPA in a ciemsa gamah pei-in na luo thei nadingun tuni-in note kang pieh tami thupiehte zosie kukal taha na zui nadingun thu kang pie hi.

²Note ang suhnem thei nading, a thupiehte na zui vuoi mah, na zui sih vuoi ci-a a thei nading le na lungtang vuah bang om ahei ci-in a thei nadingin amate in note ang zelahna-in TOPA na Pasien un tam kum sawmli sung senel gamah lam saupi tah ang puina khu phawh un.

³Mihingte pen an beh tawh nungta ahi sih a, TOPA’ kam sung pana a pusuoh thu zosie tawh nungta hizaw hi, ci-in ang theisah nadingin note hing gilkielsahin hing sunem a, tua ciengin no na hi vua, na pu na pate ahi zongin na thei ngai nai lo uh manna tawh ang va hi.[19]

⁴Tami kum sawmli sungin na el vua na puonsil uh sie loin na keng uzong pawm vawt lo hi.

⁵Tuaci’n nu le pate in a tapa a khal bangin TOPA na Pasien un no ang khalna thu na lungtang vuah thei un.

⁶Tua ahi ziehin ama’ lampi zuina le ama zatahna tawh TOPA na Pasien uh’ thupiehte zui un.

⁷Azieh pen TOPA na Pasien un muol le guoma a luong luite opna, ciatui le tuisamte a luonna leitang

⁸mangbu le mangbuham, lenggui le theikung, mang kawlsing opna leitang, olive kungte le khuoizu luonna leitang,

⁹an cilbawl loin kitasap bangma om lo-a an na neh theina uh leitang, a suongtumte sia hi a, a muoltangte panin sumsan na taw theina uh leitang ahi gam hoi-ah note ang peipi hi.

¹⁰Gilva tahin an na ne ding vua, gam hoi ang pieh ziehin TOPA na Pasien uh na phat ding uhi.

¹¹Tuni-in keima in na tung vua kang gen a thupiehte, a ngaina kipte le a thukhamte na zui lona utawh TOPA na Pasien uh na mangngil khah lo nading uh kidawm un.

¹²Gilva tahin na neh zaw uh cieng, inn hoite lamin tuate sungah na ten uh cieng,

¹³na ganhonte ule na tuuhonte uh a pun cieng le na khamte ule na ngunte uh ang tam a, na nei na lam zosiete uzong ang kiningcin ciengin,

¹⁴no le no kiliensah pai sih unlen, saltanna Egypt gam pana ang peipi TOPA na Pasien mangngilh sih un.

¹⁵Ama in a lien a zauhuoi senel gamah gul guneite,[20] mom-aite lah le tui op lona gamgawta lahah note ang peipi hi. Ama in na dawn dingun meisuong tawh a kibang suongpi panin tui a phulsah hi.

¹⁶Senel gamah na pu na pate un a thei ngai lo uh manna tawh ang va a, a tawpna-ah na hoi nadingun hing niemkhiehin hing ze-et hi.

¹⁷No le no in, “Ka vanglietna le ka khut thahat in tam hauna ei ngasah ahi hi,” ci sih un.

¹⁸Hizongle tuni-a a bawl bangin na pu na pate uh tungah a kiciemna a kipsah thei nadingin TOPA na Pasien uh phawh zing un, bangzieh ahei cile hauna ang pie pa ama ahi hi.

¹⁹TOPA na Pasien uh mangngilin pasien dangte’ nua zui a, a na uh semin na bieh uleh, na si tahtah ding uhi, ci-in tuni-in limtahin kang hilkhol hi.

²⁰Note’ masanga TOPA suhsiet minamte bangin note zong na kisie ding uhi, azieh pen note in TOPA na Pasien uh’ thu na mang sih uhi.