Read Zou THUHILKIANA 9 Bible Online

THUHILKIANA 9 - Zou bible

THUHILKIANA 9

¹Israel-te aw ngai un! Note sanga a tamzaw le a thahatzaw minamte, van holh a kulpi kiciengto khuopite a suonkhie dingin Jordan gungal kai-in a pei ding na hi ta uhi.

²A mite pen na theisa uh ahi a tunsang a thahat Anak’ suonte ahi uhi. Amate pen “Anak-te langah koi pang zo ding ahei,” a kici na zah ngaisa uh mite ahi hi.

³Tua ciengin note’ TOPA Pasien pen mi a katum thei meikuong bangin na masang vua a peipa ahi lam tuni-in thei un. TOPA in ang kamciemsa bangin amate suon dawhin mallang tahin na suhsiet thei nadingun, ama in na masang vuah amate gal lelsahin a zogawp ding hi.

⁴TOPA na Pasien un na mai vuah amate a nawdawh ciengin na lungsim sung vuah, ‘TOPA in tami leitang a luo dinga ei puohna pen ka dihna zieh uh ahi hi,’ ci kha vawt sih un; TOPA in na mai vuah amate a nawdawhna khu tam minamte’ gitlona zieh hizaw hi.

⁵Na dihna zieh ule na lungsim manna zieh utawh a gam uh a luo ding na hi sih vua, tam minamte’ gitlona ziehin TOPA in kiciemna tawh na pu na pate uh Abraham, Isaac, le Jacob tunga a na kamciemsa thu a tangtun nadinga TOPA na Pasien un na mai vua amate a nawmang ahi zaw hi.

⁶Tua ciengin na dihna ziehun TOPA na Pasien un na luo ding vua tam gam hoi ang pieh ahi lo lam thei un; azieh pen mi lungkhauhpi na hi bo uhi.

⁷Senel gamah TOPA na Pasien uh phinin na lungthahsah dante uh phawh unlen mangngil sih un; Egypt gam panin na pei ni vua kipan tam mun na tun dongun TOPA na ledo mielmuol uhi.

⁸Horeb muol nangawn-ah TOPA na thangpaisah vua, na tung vuah TOPA a lungthah seng ziehin note susie dingin a baisa-in a om hi.

⁹TOPA in note tawh a bawl thuciemna suongpehte sang dingin muol tungah ka kato lai-in, sun sawmli le zan sawmli sung ka thaam hi; an ne lo, tui dawn loin ka om hi.

¹⁰TOPA in Pasien’ khutme tawh kigiel suongpeh ni kei ei pie hi; tuate tungah muol tunga na kikhop ni vua TOPA in na kung vuah mei sung pana ang gensa thu zosie om hi.

¹¹Sun sawmli le zan sawmli a cin zaw-in TOPA in tua kiciemna suongpeh ni tegel keima ei pie hi.

¹²Tua ciengin TOPA in keima kungah, “Tho inlen tam panin peisuh meng in. Bangzieh ahei cile Egypt pana na zawpi na mite a siet gamtat sieng ta uhi. Ka thupieh lampi panin a kihei zuai ta vua, amate dingin a kisung milim khat a bawl zo ta uhi,” ci-in ang gen hi.

¹³Tua banah TOPA in keima kungah, “Tam mite ahile a lungkhauh tahtah mite ahi hi, ci-in ka mu zo hi.

¹⁴Amate susie-in vansin nei pan a min uh ka phietmai thei nadingin keima guoh ei omsah un; tuale amate sangin a thahatzaw le a citamzaw minamin nang kang bawl ding hi,” ei ci hi.

¹⁵Tuaci’n muolpi a kuon vapuol laitahin kihei-in muol tung panin ka kumsuh hi; kiciemna suongpeh nite ka khut ni tegel sungah a om hi.

¹⁶Tua ciengin noma dingin a kisung bawngno lim khat na bawlna utawh TOPA na Pasien uh tungah na maw zo tahpi lam uh ka mu a, tuaci’n TOPA in ang thupiehsa lampi panin na kihei zuai ta uhi.

¹⁷Tuaci’n kei zong ka khut gelin tua suongpeh nite ka tawi a, ka khut tegel panin tuolah sepin na muna vuah ka guoicimsah hi.

¹⁸Tua ciengin a masa-a ka bawl ngai bangin TOPA mai-ah sun sawmli le zan sawmli sung ka khupbawhkia hi; ama tunga na bawl uh na mawna zosie zieh ule ama mai-ah a sie na gamtatnate utawh TOPA na lungthahsah ziehun an ne lo tui dawn loin ka om hi.

¹⁹Bangzieh ahei cile note tungah TOPA’ lungthahna nasie seng ahi ziehin ama in note ang suhsiet ding ka zau hi. Hizongle TOPA in khumi hunin zong ka thu ei ngai hi.

²⁰Aaron tungah TOPA thangpai mama a, ama susie dingin a baisa-in om a, ahi vangin khumi hun ma-in Aaron tangin zong ka thumpieh hi.

²¹Tua ciengin keima in note ang mawsah ahi na bawl uh bawngno lim la-in mei tawh haltumin ka sukeh a, leivui a suo dongin ka gawtvui hi; tua a vuite muol pan a luongsuh luidungah ka pai hi.

²²Taberah, Massah, le Kibroth-hattaavah munte-ah zong TOPA phinin na lungthahsah uhi.

²³TOPA in Kadesh-barnea panin note ang sawl a, “Peito unlen kang piehsa leitang va luo ta un,” ei ci hun lai-in TOPA na Pasien uh’ thupieh langpangin ama muong loin, a thu zong na mang sih uhi.

²⁴Ama in note ang thei zaw[21] a kipan TOPA langpangin na ledo ngitnget uhi.

²⁵TOPA in note ang suhsiet sawm ciengin sun sawmli le zan sawmli sung TOPA mai-ah khupbawh a ka op sung tungtawnin,

²⁶TOPA kungah thu ka ngen a, “TOPA Pasien aw, na lietna tawh na tatsa, na banhat tawh Egypt pana na peipi na mite susie sin.

²⁷Na nasem Abraham, Isaac, le Jacob-te phawh in; tam mite’ lungkhauhna, gitlona, le mawnate thulah seng sin.

²⁸Tua bang hi sih mawh leh nei peipina gama a teng mite in, ‘TOPA in amate a ciemsa leitangah a peipi thei lo zieh le a muda ziehin senel gama a thagam dinga a peipi hizaw hi,’ ci mawh kha ding uhi.

²⁹Bangzieh ahei cile amate pen na vanglietna le a kizah na ban tawh na peipi nangma’ neisa mite ahi hi,” ka ci hi.