Read Zou JOHN 10 Bible Online

JOHN 10 - Zou bible

JOHN 10

¹“A tahtah a kang ci-in, tuu khumna tunkot panin lut loin lampi tuom panin kato-in a lut poma guta le misuom ahi hi.

²Tunkot pana lut mipa ahile a tuute a cing pa ahi hi.

³Tunkot cingpa in ama kot honin tuute in ama’ aw a za uhi. Ama in tuute a min tawh hlanin a pusuopi hi.

⁴Ama-a’ zosie a pusuopi zaw ciengin a mai-ah pei-in tuute in ama’ nua a zui uhi, azieh pen tuute in ama’ aw a thei uhi.

⁵Tuute in a melmahte uh’ nua a zui sih ding vua, a melmahte uh’ aw a thei lo ziehun ama kung panin a gelmang ding uhi,” a ci hi.

⁶Jesu in amate tawh tam thugentena a zah vangin bang thu gen ahei, ci a thei sih uhi.

⁷Tuaci’n Jesu in amate kungah, “A tahtah a kang ci-in, kei pen tuute lutna tunkot ka hi hi.

⁸Ka mai-a pei zosie guta le misuomte ahi uhi; ahi vangin tuute in a thu a mang sih uhi.

⁹Kei tunkot ka hi hi. Keima tungtawnin a lut poma kihundam ding a, sungtum pusuohin lodawnna mun a mu ding hi.

¹⁰Guta pen a gu ding, a that ding le a susie ding behin ang pei hi. Kei ka hile amate in hinna a nei thei nading ule hinna bukim a nga thei nading vua ang pei ka hi hi.

¹¹“Kei tuucing hoi ka hi hi. Tuucing hoi in a tuute adingin a hinna a pie hi.

¹²Tuucing ahi lo, tuu zong a nei lo, a kiciel tuucing in ngie pei a mu ciengin a tuute nuasie-in taimang a, tua ngie in tuute manin a thezah hi.

¹³Ama a kiciel ahi bo ziehin tuute don loin a taimang hi.

¹⁴Keima tuucing hoi ka hi hi. Kei-ate ka thei a, kei-ate in zong kei ei thei uhi.

¹⁵Pa in kei ei thei bangin ke’n zong Pa ka thei hi. Keima in tuute adingin ka hinna ka pie hi.

¹⁶Tami tuu khumna sunga a om lo tuu dang zong ka nei lai hi. Tuu khumna ah tuate kang peipi valon ding a, amate in ka aw a ngai ding uhi. Tuaci’n tuuhon khat, tuucing khat a om ding hi.

¹⁷Ka hinna ka lahkia thei nadingin ka hinna ka pieh ziehin Pa in keima ei it hi.

¹⁸Koima in keima tung panin ka hinna ei lahpieh lo a, keima thu-a ka pieh ahi zaw hi. Keima in pieh thei nading thu ka nei a, lahkia thei nading thu zong ka nei hi. Keima in tami thupieh pen ka Pa kung pana ka nga ahi hi,” a ci hi.

¹⁹Tami thute ziehin Jew mite a kikhen leuleu uhi.

²⁰Mi tampitah in, “Ama pen dawivei ahi a, a maw ahi bo hi. Bang dinga ama’ thu na ngai uh ahei?” a ci uhi.

²¹Adangte in, “Tam bangte pen dawivei khat’ thugen ahi sih hi. Dawivei khat in mittawte’ mit a vahsah thei ding amah?” a ci uhi.

²²Khum hunin Jerusalem ah Ki-apna Pawi om a, tua pen phalbi hun sung ahi hi.

²³Biehinn huong sunga Solomon talap ah Jesu a pei kawikawi laitahin,

²⁴a kimkotah Jew mite kikhawmin ama kungah, “Nang in bang tanvei lung nawngkai-in kote ei koi ding na hei? Messiah[53] na hi leh siengtahin ei gen pai ta’n” a ci uhi.

²⁵Jesu in, “Ke’n kang gen zo a, na tahsang paupau sih uhi. Ka Pa’ min tawh ka sep zosie in keima’ thu teci a pang hi.

²⁶Ahi vangin ka tuute na hi lo ziehun nei um sih uhi.

²⁷Ka tuute in ka aw a za uhi. Keima in amate ka thei a, amate in ka nua ei zui uhi.

²⁸Keima in kumtawn hinna amate ka pie a, amate a kisie ngai nawn sih ding uhi. Ka khut sung panin koima in ka tuute ei lahpieh zo sih ding hi.

²⁹Ka Pa ei piehsate adang zosie teng sangin lienzaw a, ka Pa’ khut sung panin koima in ei lahpieh zo lo hi.

³⁰Ka Pa le kei pumkhat ka hi uhi,” ci-in a dawng hi.

³¹Jew mite in ama a se nadingun suong a tung leuleu uhi.

³²Jesu in, “Pa kung panin nasep hoi tampi kang lah zo hi. Tuate lahah bang pen zieha suong tawh nei se sawm uh ahei?” a ci hi.

³³Jew mite in, “Nasep hoi zieha kang se sawm uh ahi sih a, nang mi maimai khat kimlai Pasien bangin nang kibawl a, ama na simmawbawl zieh ahi zaw hi,” ci-in a dawng uhi.

³⁴Jesu in, “Na thukham bu sung vuah, ‘Keima in note pen pasien-te kang ci hi,’ ci in kigiel hi lo amah?

³⁵Pasien’ thu a tunna mite pen, ‘pasien-te’ kici ahile-Lai Siengtho lah kiphiet thei lo cileih-

³⁶keima in, ‘Pasien’ Tapa ka hi hi,’ ka ci ziehin Pa in siensuo-in leitunga a sawl pa ahi keima kungah Pasien na simmawbawl hi, ei ci thei na hi uh amah?

³⁷Ka Pa’ nasepte a sem lo ka hi leh ei up da mai un.

³⁸Ahi vangin tuate sem napi a, nei up nop phiel sih uleh zong tua a nasepte beh um un. Tuaci’n note in keima sungah Pa omin kei zong Pa sunga ka op lamtah thei-in na telsiem ding uhi,” a ci hi.

³⁹Tua ciengin amate in ama mat ding a hanciemkia vua, ahi vangin amau’ khut sung panun ama a suohta hi.

⁴⁰Jordan gun kantanin ama peikia a, John in mite a baptize masahna munah tungin tuanah a om suoh hi.

⁴¹Ama kungah mi tampi pei a, “John in lim lamdang a bawl lo vangin tam mipa tungtang John’ thu gen zosie man hi,” a ci uhi.

⁴²Mi tampi in khum munah ama a um uhi.