Read Zou JOHN 12 Bible Online

JOHN 12 - Zou bible

JOHN 12

¹Peisan pawi kipat ding ni guh a sap ni-in, sina pana kithosah Lazarus’ opna Bethany khuo ah Jesu a tung hi.

²Tua munah amate in ama nitah an a va uhi. Martha in an bawlin Lazarus pen ama tawh ankuong a imton pawlte lahah khat ahi hi.

³Mary in a manpha mama nard kici sathau namtui bung khat la-in Jesu’ keng nupieh a, a sam tawh tuate[59] a nawtpieh hi. Tua sathau namtui gim in innsung teng zelmang sieng hi.

⁴Ahi vangin a nuazuite lahah khat ahi Judas Iscariot (ama lezua ding pa) in,

⁵“Tami sathau namtui denarii[60] za thum tawh zua-in bang dingin tua sum mizawngte kihawmpieh lo ahei?” a ci hi.

⁶(Tam bang a gen ciengin mizawngte a khuol zieh hi loin, ama mi guta khat ahi zieh ahi hi; ama in sum-ip kemin a sunga sum kikoite a la thei zel hi.)

⁷Jesu in, “Ama nu tuaci opsah lel un. Ama nu in ka kivui ni cienga zah dingin tuate lei-in[61] a koi hi kha thei ding hi.

⁸Note na hi ule mizawngte tawh na omton zing ding vua, kei ka hile note tawh ka omton zing sih ding hi,” a ci hi.

⁹Tua munah Jesu a op lamtah Judah mihon tampite in a thei ciengun Jesu zieh beh hi loin, sina panin ama in a thawsahkia Lazarus zong ve kawm dingin amate a pei uhi.

¹⁰Tua ciengin siempu liente in Lazarus zong tha a sawm uhi.

¹¹Bangzieh ahei cile ama hangin Judah mi tampi in amate taisanin Jesu a um uhi.

¹²A zing ciengin pawi sim mihon tampite in Jerusalem lamah Jesu pei ci a za uhi.

¹³Tuaci’n amate in lutu baate tawi-in ama dawn dingin a kuon vua, “Hosanna! TOPA’ min tawh ang pei Israel Kumpi pa in thupha nga taheh!” ci-in a kiko uhi.

¹⁴Jesu in laano khat mu-in a tungah a tuong hi. Tami thu Lai Siengtho sungah:

¹⁵“Zion tanu aw, zau sin. En in, na kumpipa uh hing pei-in, laano tungah a tuong hi!” ci-in kigiel hi.

¹⁶A nuazuite in tam thu a cilin a thei sih uhi; ahi vangin minthanna tawh Jesu a thawkia zaw bepin amate in Jesu’ thu tam bangin na kigiel a, ama tungah tam bangin na kibawl hi, ci-in a nua phaw pan na bo uhi.

¹⁷Tuaci’n han sung panin Lazarus hlan dawhin sina panin ama a thawsahna thute, khumlai-a ama kunga om mihonte in teci a pang uhi.

¹⁸Jesu in tam bang lim lamdang a bawlna thu mihonte in a zah ziehun ama dawn dingin a pei uhi.

¹⁹Tua ciengin Pharisee-te khatlekhat kiho-in, “Thei un, bangma na law zo ta sih uhi. En un, leitung mi zosie in ama a zui sieng ta uhi,” a kici uhi.

²⁰Pawi hun sungin Pasien bie dinga a peite lahah pawlkhat Greek mi ahi uhi.

²¹Galilee gam Bethsaida khuomi Philip kungah amate haw-in, “Siepa aw, Jesu ka mu nuom uhi,” a ci uhi.

²²Philip pei-in Andrew kungah a gen hi; tua ciengin Andrew le Philip zong pei-in Jesu kungah a gensawn uhi.

²³Tua ciengin Jesu in amate kungah, “Mihing Tapa a minthan ding hun a tung zo hi.

²⁴A tahtah a kang ci-in, lei-ah mangbuhum tang khat kie-in a si phot sih leh, tang khat beh ma om den ding hi; ahi vangin a si leh ga tampi a ga hi.

²⁵A hinna a it mite in mansuo ding a, tami leitunga a hinna a muda mite in kumtawn hinna a nei ding uhi.

²⁶Ka na a sem poma in ka nua ei zui kul a, ka opna ah ka nasempa zong a om ding hi. Ka na a sem poma Pa in a patawi ding hi.

²⁷“Tu-in ka lungsim a gim mama hi. Tuale bang ka gen ta diei, ‘Pa aw, tam hun panin ei hunkhie in,’ ka ci ta ding amah? Hi lo hi, tam thu hang tawh tami hun a ang pei ka hi hi.

²⁸Pa aw, na min thangsah ta’n,” a ci hi. Tua ciengin vantung panin aw khat ging a, “Ka thangsah zo a, khatvei ka thangsahkia ding hi,” a ci hi.

²⁹Tua munah a om mihonpite in za-in vanto ahi hi, a ci uhi. Adangte in, “Vantungmi khat in ama hopi hi,” a ci uhi.

³⁰Jesu in, “Tami awging pen kei ading ahi sih a, note dinga ang ging hizaw hi.

³¹Tu-in tam leitung in thukhenna thuoh ding uhi; tu-in tami leitung uhpa kihawlkhie ta ding hi.

³²Tuale leitung panin ei kikhaito ciengin keima lamah mi zosie[62] ka kai ding hi,” a ci hi.

³³Ama in tam bang thu a gen ciengin a si cienga bangci dan a si ding ci a lah ahi hi.

³⁴Mihonpi in, “Messiah[63] pen a om zing ding ahi hi, ci thukham bu panin ka thei uhi. Nang in bang dinga Mihing Tapa kikhaito ding hi, na ci thei ahei? Tami Mihing Tapa koi ahei?” a ci uhi.

³⁵Jesu in amate kungah, “Note tawh khuovah bakhat sung beh om lai ding hi. Khuomiel in note ang phah lo nadingin khuovah na nei petun pei un. Khuomiel sunga na pei uleh hei lam pei ci na thei sih uhi.

³⁶Khuovah’ tate na suo thei nadingun note in khuovah na nei petun tua khuovah um un,” a ci hi. Jesu in tam thu a gen zaw ciengin pei-in amate kung pan a kiphuol hi.

³⁷Jesu in amate muna-ah lim lamdang tampi lah nanle amate in ama a um tuom sih uhi.

³⁸Kamsang Isaiah in: “TOPA aw, ka thugen uh koi in um a, koi tungah TOPA’ ban thahat kilang ahei?” ci-a a thugen a tangtun thei nading ahi hi.

³⁹Tuale amate in a um zo sih uhi, azieh pen kamsang Isaiah in zong,

⁴⁰“Amate in a mit utawh en loin, a lungtang utawh thei-a ang kihei lo nadingun, ama in a mit uh tawsahin, a lungtang uh a khausah hi. Tua hi sihle keima in amate ka damsah kha ding hi,” a ci hi.

⁴¹Isaiah in a minthanna mu ahi ziehin ama’ thu tam banga a gen ahi hi.

⁴²Ahi vangin vaihawm thuneite nangawn in ama a um uhi. Pharisee-te in kikhopna inn pan a nawmang ding a zau ziehun amate in a pulah ngam sih uhi.

⁴³Azieh pen amate in Pasien’ patah ding sangin mite’ patah ding a deizaw uhi.

⁴⁴Tua ciengin Jesu in, “Kei ei um poma in kei ei um hi loin kei ei sawlpa um hizaw hi.

⁴⁵Kei ei mu poma in kei ei sawlpa zong a mu hi.

⁴⁶Kei ei um poma in khuomiel sungah a op lo nadingin leitungah khuovah banga ang pei ka hi hi.

⁴⁷Ka thugente za-in a zui lo mi khatpo tungah keima in thu ka khen sih hi, azieh pen leitung thu khen dinga ang pei ka hi sih a, leitung hundam dinga ang pei ka hizaw hi.

⁴⁸Kei ei nielin ka thugen a sang lo mi pa in thukhenpa khat a nei hi; nitawp ni ciengin ka gensa thu teng pen thukhen pa-a ang pang ding ahi hi.

⁴⁹Bangzieh ahei cile kei nop thu tawh a gen ka hi sih a, ei sawl Pa in bang genin bang sut ding ci-a ei thupieh teng a gen ka hi bo hi.

⁵⁰Ama’ thupiehte kumtawn hinna ahi, ci ka thei hi. Tua ahi ziehin ka gen thute ahile Pa in gen in, ei ci banga a gen ka hi hi,” a ci hi.