Read Zou JOHN 13 Bible Online

JOHN 13 - Zou bible

JOHN 13

¹Peisan pawi masangin Jesu in leitung panin a Pa kunga a pei ding hun tung ta hi, ci a thei hi. Ama in leitunga a it ama’ mite a tawp dongin a it hi.

²Jesu a leheh dingin Simon Iscariot’ tapa Judas’ lungtangah dawimangpa in ngaisutna koi zo hi.

³Pa in ama’ khut sungah na zosie pie-in ama pen Pasien kung pana ang pei hi a, Pasien kunga peikia ding ahi lam zong Jesu in thei ahi ziehin,

⁴sabuoi[64] panin ama dingto a, a puontuol suo dawhin mainul khat tawh a kawng a gah hi.

⁵Tua ciengin ama in kuong sung khatah tui sungin a nuazuite keng a silpieh a, a kawnga a viel mainul tawh nawtpieh ding a kipan hi.

⁶“TOPA aw, ka keng ei silpieh laizang ding na hi amah?” a ci Simon Peter kungah ama a tung hi.

⁷Jesu in, “Tu-in bang bawl ka hei, ci na thei sih a, ahi vangin a nua ciengin na thei ding hi,” ci-in a dawng hi.

⁸Peter in ama kungah, “Ka keng na sil ngai poma sih ding hi,” a ci hi. Jesu in, “Na keng kang silpieh sih leh kei tawh a kipawl lo na hi hi,” a ci hi.

⁹Simon Peter in ama kungah, “TOPA aw, ka keng guoh hi loin ka khut le ka lu zong ei silpieh vet in!” a ci hi.

¹⁰Jesu in ama kungah, “A kipumsilsa mi in a keng longal[65] sil ding a kisam ta sih a, a pumpi zosie a siengsa ahi hi. Tuale note na unpi-un na sien vangun na sieng kim sih uhi,” a ci hi.

¹¹Azieh pen ama in a leheh ding pa a thei hi; tami thu ziehin ama in, “Na unpi-un na sieng kim sih uhi,” a ci hi.

¹²Ama in a keng uh a silpieh zaw ciengin a puontuol sil a, anneh sabuoi lamah kilekia-in a kung vuah, “Note adinga ka septe na thei vuoi mah?

¹³Kei pen Siepa le TOPA nei ci vua, tua pen a man ahi hi, azieh pen nei ci bangun ka hi hi.

¹⁴Tuaci’n na TOPA ule na Siepa uh ahi keima in na keng uh hing silpieh ka hi leh note in zong khatlekhat na kisilpieh ding uh a kilawm hi.

¹⁵Azieh pen keima in na tung vua ka bawl banga note in zong na bawl thei nadingun ette dinga kang pieh ahi hi.

¹⁶A tahtah a kang ci-in, nasemte[66] pen a pupa sangin lienzaw lo a, a kisawl pa zong a sawl pa sangin lienzaw lo hi.

¹⁷Tam thute thei-in tuate na zui uleh mi hampha na hi uhi.

¹⁸Na unpi vua ang gen ka hi sih hi; keima in ka teelsa mite ka thei hi. Ahi vangin tami pen Lai Siengtho sungah, ‘Ka an[67] a ne mipa in a aketul tawh ei peh hi,’ ci-a a kigen thu a tangtun thei nading ahi hi.

¹⁹Tami thu a pien ciengin kei ama[68] ka hi lam nei thei nadingun tu-in a pien masanga ang magen ka hi hi.

²⁰A tahtah a kang ci-in, ka sawl mi a sang poma in kei zong ei sang hi a, kei ei sang mi poma in kei ei sawl pa zong a sang ahi hi,” a ci hi.

²¹Jesu in tam thu a gen zaw ciengin a lungkham mama a, “A tahtah a kang ci-in, note lahah khat in kei ei leheh ding hi,” ci-in a gen hi.

²²Koi pen gen ahei, ci-in a nuazuite khatlekhat a ki-en uhi.

²³Jesu in a it a nuazuite lahah khat pa in Jesu nehin ama zomah a kingam phei hi.

²⁴Tua ahi ziehin Simon Peter in a mit-heh tawh ama hopi a, “Koi a ci nopna adiei,” ci-in Jesu dong dingin a sawl hi.

²⁵Tuaci’n Jesu lamah ama a zamphei laitahin, “TOPA aw, koi ahei?” ci-in a dong hi.

²⁶Jesu in, “Kuong sungah khomun halkhat ka die zaw cienga ka pieh ding pa ahi hi,” ci-in a dawng hi. Tuaci’n khomun halkhat a die zaw ciengin ama in Simon Iscariot’ [69]tapa Judas a pie hi.

²⁷Ama in khomun halkhat a san zaw ciengin a sungah Satan a lut pai hi. Jesu in ama kungah, “Na bawl dingte nawbawl ta’n,” a ci hi.

²⁸Bang dingin ama kungah tam thu a gen adiei, ci thu sabuoi-a omte koima in thei lo hi.

²⁹Pawlkhatte in Judas pen taangpi sumkem ahi ziehin Jesu in ama kungah, “Pawi cienga i tulmaw ding vante va lei ta’n,” ci-a a sawl ahi sihle, mi zawngte bangkhat pie dinga a sawl hi ding hi, ci-in a ngaisun uhi.

³⁰Tuaci’n khomun halkhat a san zaw ciengin thakhatin a pusuoh pai hi. Tua hun pen zanlai ahi hi.

³¹Judas a pusuo zaw ciengin Jesu in, “Tu-in Mihing Tapa kipatawi a, ama sungah Pasien a kipatawi hi.

³²Ama sungah Pasien a kiminthansah leh [70]Pasien in zong ama sungah Tapa’ min a thangsah ding a, thakhatin ama’ min kithangsah pai ding hi.

³³Ka tanote aw, note tawh bakhat sung beh ka om ding hi. Note in kei nei sui ding uhi; tuale Jew mite kungah, ‘Ka peina munah nang pei thei sih ding uhi’ ci-a ka gen bangin tu-in zong note kungah kang gen hi.

³⁴Note khatlekhat na ki-it nadingun keima in note tungah thupieh tha khat kang pie hi. Keima in note kang it bangin note zong khatlekhat na ki-it un.

³⁵Note khatlekhat na ki-it uleh tam thu ziehin mi zosie in ka nuazuite na hi lamtah uh ang thei ding uhi,” a ci hi.

³⁶Simon Peter in ama kungah, “TOPA, hei-a pei ding na hei?” a ci hi. Jesu in, “Tu-in ka pei nading munah nei zui thei sih ding hi; ahi vangin nualam ciengin nei zui thei ding hi,” ci-in a dawng hi.

³⁷Peter in ama kungah, “TOPA, bang zieha kang zui thei lo ding ahei? Nang adingin ka hinna kang pie ding hi,” a ci hi.

³⁸Jesu in, “Kei adingin na hinna nei pie ngam diei mah? A tahtah a kang ci-in, aah khuon masangin thumvei nei niel ding hi,” ci-in a dawng hi.