Read Zou JOHN 14 Bible Online

JOHN 14 - Zou bible

JOHN 14

¹“Note kilungkhamsah sih un. Pasien um[71] unlen kei zong ei um un.

²Ka pa inn sungah op nading mun tampi a om hi. A om lo hileh na op nading uh mun siem dingin ka va pei ta ding hi, ci-in kang gen ding amah?

³Kei pei-in note adingin opna ding mun ka va siem tah leh, ka opna munah no zong nang op thei nadingun no ang la dingin kang peikia ding hi.

⁴Note in ka pei nading mun na thei uhi,” a ci hi.

⁵Thomas in, “TOPA, na pei nading ka thei sih uhi. Kote in lampi bangci thei ding ka hi uh ahei?” a ci hi.

⁶Jesu in ama kungah, “Keima in lampi, thuman thutah, le hinna ka hi hi. Kei ei suong loin Pa kungah koima tung thei lo ding hi.

⁷Keima nei thei uleh ka Pa zong na thei ding uhi. Tu-a kipanin ama thei-in, na mu zo ta uhi,” a ci hi.

⁸Philip in, “TOPA aw, Pa ei lah in, tua hile ka lung a kim ding hi,” a ci hi.

⁹Jesu in ama kungah, “Philip aw, nang tawh tami hun sung zosie hing omton sam ing a, kei ei thei nai lo na hi amah? Kei ei mu poma in ka Pa a mu zo ta hi. Bang dingin, ‘Pa ei lah in,’ ci thei na hei?

¹⁰Pa sungah kei ka om a, kei sungah Pa a om hi, ci na um sih amah? Na kunga kang gen thute keima’ thu-a kang gen ahi sih hi; kei sunga a teng Pa in ama’ na a sem hizaw hi.

¹¹Pa sungah kei ka om a, kei sungah Pa a om lamtah note in um un; na up sih uleh, ka sepsate ziehin um un.

¹²A tahtah a kang ci-in, keima ei um mi in keima’ sep nate ma a sem ding a, kei Pa kungah pei ta ding ka hi ziehin tamte sangin a lienzaw nasepte a sem lai ding uhi.

¹³Tapa sunga Pa a kipatawi nadingin keima’ min suonga na nget popo uh keima in kang bawlpieh ding hi.

¹⁴Keima’ min suongin note in kei kungah[72] na khatpopo nang nget uleh kang pie ding hi.

¹⁵“Kei nei it uleh ka thuciemte na zui ding uhi.

¹⁶Keima in Pa kungah thu ka ngen ding a, ama in note ang ompi zing dingin adang Hupa khat ang pie ding hi.

¹⁷Leitung mite in tua thuman Hlagau Siengtho pen mu thei lo, theithei lo uh ahi ziehin a sang zo sih uhi. Note tawh ama ang tenton ziehin ama na thei vua, tuale note sungah[73] ama ang om ding hi.

¹⁸“Note a taga dingin kang nuasie sih ding hi; na kung vuah kang pei ding hi.

¹⁹Leitung in bakhat sung ei mu nawn lo ding a, ahi vangin note in nei mu ding uhi; kei ka hin ziehin no zong na hing ding uhi.

²⁰Khum ni ciengin Pa sungah kei ka om a, kei sungah no omin, no sungah kei ka op lam note in na thei ding uhi.

²¹Ka thupiehte nei-a, a zui mite pen keima ei it ahi uhi; kei ei itte in ka Pa zong it ding a, ke’n zong amate it-in amate tungah kei le kei ka kilah ding hi,” a ci hi.

²²Judas (Iscariot ahi lo) in, “TOPA aw, leitunga kilah lo pi-in, ko tungah nang le nang bang ang ci kilah thei ding na hei?” a ci hi.

²³Jesu in, “Kei ei itte in ka thu zui-in ka Pa in amate it ding a, amate kungah kote pei-in ka tengton ding uhi.

²⁴Kei ei it lo poma in ka thu a zui sih hi; tu-a na zah uh thute kei-a’ ahi sih a, kei ei sawl Pa-a’ ahi zaw hi.

²⁵“Note tawh ka opton lai-in na kung vuah tam thute kang gen zo hi.

²⁶Ahi vangin Pa in keima’ min tawh ang sawl ding Hupa Hlagau Siengtho in na zosie ang hil ding a, ama in na kung vua kang gensa thu zosie ang phawhsahkia ding hi.

²⁷Keima in note tungah lungnopna kang nuasie hi; note tungah ka lungnopna kang pie hi. Keima in leitung mite pieh bangin kang pie sih hi. Kilungmangsah sih unlen zong zau sih un.

²⁸‘Keima ka va pei ta ding a, na kung vuah kang peikia ding hi,’ ci ka gen thu na za zo uhi. Kei nei it uleh Pa kunga pei ding ka hi ziehin na kipah ding uhi, bangzieh ahei cile kei sangin Pa a lienzaw hi.

²⁹Tam thu ang pien tahtah ciengin na up thei nadingun a pien masangin na kung vua kang magen ahi hi.

³⁰Tu-in leitung thu vaihawmpa ang pei zo tah ziehin note tungah thu tampi kang gen ta sih ding hi. Ama in keima tungah thuneina bangma a nei sih hi.

³¹Ahi vangin Pa ka it lamtah leitung mite in a theithei nadingin Pa ei thupieh bangin ka sem hi. Ding un, tam panin pei ta vai.