Read Zou JOHN 15 Bible Online

JOHN 15 - Zou bible

JOHN 15

¹“Kei lengga gui tahtah ka hi a, ka Pa pen lengga lonei pa ahi hi.

²Ama in keima sunga a ga lo baa zosie a paimang ding hi. Ga nei a baate a ga semsem nadingin ama in heu-in a hasieng hi.

³Keima in note kunga kang gen thute ziehin note ang siengthosah zo ta uhi.

⁴Note sunga ka op bangin note zong keima sungah om un. Lengga baa pen lenggui tawh a kizop sih leh a matanga a ga thei lo bangin, no zong kei tawh na kizop sih uleh ga na ga thei sih ding uhi.

⁵Keima lengga gui ka hi a, note a baa na hi uhi. Keima sungah tengin amate sunga kei ka ten leh amate in ga tampi a ga ding uhi, azieh pen kei loin note in bangma na bawl thei sih uhi.

⁶Kei sunga a om lo poma a kipaimang a baate bangin a vulgawp hi; tua bang a baate kikhawm a, meikhuh sungah kipai-in a katum hi.

⁷Keima sungah na op vua, note sungah ka thu a op leh na dei popo ngen locin note adingin ang kibawlpieh ding hi.

⁸Ga tampi ga-in ka nuazui na suona ziehun note in ka Pa’ min na thangsah ding uhi.

⁹Pa in kei ei it bangin ke’n zong note kang it hi; keima’ ang itna sungah om un.

¹⁰Ka Pa thupiehte zui-a ama’ itna sunga ka op bangin, note in ka thupiehte na zui uleh keima’ itna sungah na om ding uhi.

¹¹Note sungah ka kipahna a op thei nading le note’ kipahna a bukim thei nadingin na kung vuah tam thute kang gen zo hi.

¹²“Tami pen ka thupieh ahi hi, keima in note kang it bangin note zong khatlekhat khat na ki-it un.

¹³A lawmte adinga a hinna a pie ngam itna sanga a lienzaw itna koima in nei lo hi.

¹⁴Note in ka thupiehte na zui uleh ka lawmte na hi uhi.

¹⁵Note pen nasemte[74] kang ci nawn sih ding hi, azieh pen nasempa[75] in a pupa’ sep bang ahei, ci a thei sih hi; keima in lawmte kang cizaw hi, azieh pen keima in ka Pa kunga ka thuzah zosie note kang theisah zo hi.

¹⁶Note in kei nei teel sih vua, keima in note kang teelzaw hi. Tuale note pei-in a kimang zing ding gate a ga dingin kang se zo hi. Tuaci’n keima’ min suongin note in ama kunga na nget popo uh Pa in ang pie ding hi.

¹⁷Note khatlekhat na ki-it nadingun keima in tami thupieh kang pie hi.

¹⁸“Leitung mite in note ang muda leh, note ang muda masangin kei ei muda zo hi, ci thu thei un.

¹⁹Note pen leitung-a’ na hi uleh leitung in ama-a’ bangin ang it ding hi. Note pen leitung-a’ hi loin leitung pana kang teelsa na hi ziehun leitung in note ang muda hi.

²⁰Note kungah, ‘Nasemte[76] pen a pupa sangin lienzaw lo hi,’ ci-a kang thugen phawh un. Amate in ei bawlsiet uleh no zong ang bawlsie ding uhi; amate in ka thugen a man uleh no-a’ zong a mang ding uhi.

²¹Ahi vangin keima’ min ziehin amate in na tung vuah tamte zosie ang bawl ding uhi, azieh pen amate in kei ei sawlpa a thei sih uhi.

²²Amate kungah pei-in thu gen lo hi leng amate a maw sih ding uhi; hinanle tu-in amate in a mawna tungtang vuah hamlap ding a nei ta sih uhi.

²³Kei ei muda poma in ka Pa zong a muda ahi hi.

²⁴Amate lahah koima dang’ bawl ngai lo nate va bawl ta sih leng amate a maw sih ding uhi. Ahi vangin tu-in amate in ka sil bawlte a mu zo vua, kei le ka Pa ei muda ton uh ahi hi.

²⁵A thukham sung vuah, ‘Thu om lopi-in kei ei muda gumsan uhi,’ ci-a a kigiel thu a tangtun nading ahi hi.

²⁶“Pa kung pana ang pei, thuman thutah Hlagau Siengtho ahi Pa kung panin na kung vua kang sawl ding Hupa ang pei ciengin kei tangin teci ang pang ding hi.

²⁷A cil a kipanin kei tawh omton na hi ziehun note in zong keima tungtang teci na pang ding uhi.