Read Zou JOHN 17 Bible Online

JOHN 17 - Zou bible

JOHN 17

¹Jesu in tam thu teng a gen zaw ciengin vantung ento-in, “Pa aw, a hun ang tung ta hi; Tapa in na min ang thansah thei nadingin nang in na Tapa’ min hing thangsah in,

²bangzieh ahei cile ama na piehsa mi zosie tungah ama in nuntah tawntungna a pieh thei nadingin mi zosie tungah thuneina ama na pie zo hi.

³Tuale amate in nang beh Pasien man tahtah na hina le na sawlpa Jesu Khris a thei siemna uh pen kumtawn hinna ahi hi.

⁴Keima in sep dinga nei pieh nasep ka mansiengna tawh leitungah na min ka thangsah zo hi.

⁵Tuaci’n Pa aw, leitung pien masangin na kunga ka neisa minthanna tawh tu-in na omna munah ei minthangsah ta’n.

⁶“Leitung mite sung panin nei piehsate tungah keima in na min ka kitheisah zo hi. Amate nangma-a’ hi a, nangma in kei tungah amate nei pie zo ta a, amate in na thu a mang uhi.

⁷Tu-in ahile amate in kei nei pieh zosie nang kung pan ahi lam a thei ta uhi;

⁸azieh pen kei nei pieh thute ma amate ka pie a, amate in zong tua thute a sang vua, nangma kung panin thuman thutah sunga ang pei ka hina thu amate in a thei uhi; tuale amate in nangma’ ei sawl ka hi lam zong a um uhi.

⁹Kema in amate tangin thu kang ngetpieh hi; leitung mite adingin thu ka ngen sih a, nei piehsa mite adingin thu ka ngenzaw hi. Bangzieh ahei cile amate nangma-a’ ahi uhi.

¹⁰Keima’ neisa zosie nangma-a’ hi a, nangma’ neisa zosie zong keima-a’ ahi hi; tuate sungah keima ei kiminthangsah zo ta hi.

¹¹Tu-in leitungah ka om nawn sih hi, ahi vangin amate pen leitungah a omlai vua, kei ka hile nangma kungah kang pei ta ding hi. Siengtho Pa aw, ei gel pum khat i hi ma bangin amate zong pumkhat a suo thei nadingun, na min tawh keima nei piehsa amate dal in.

¹²Amate tawh ka opton laitahin nei piehsa amate na min tawh ka kem zo hi. Amate ka dal a, Lai Siengtho a tangtun nadingin a mangthai dinga kilaitansa mipa khat simlo[77] koima khat beh a pelem a om sih hi.

¹³Ahi vangin tu-in na kunga ang pei ding ka hi ta a, amate mama sungah[78] ka lungdamna bucing a nei thei nadingun leitung ka op lai-in tami thute ka gen zo hi.

¹⁴Keima in amate tungah na thu ka pie zo hi, kei leitung-a’ ka hi lo ma bangin amate zong leitung-a’ ahi lo ziehun leitung in amate a muda hi.

¹⁵Leitung panin amate na lahkhiet ding ang ngen ka hi sih a, gilopa kung panin[79] na dal ding ang ngen ka hizaw hi.

¹⁶Kei pen leitung-a’ ka hi lo ma bangin amate zong leitung-a’ ahi sih uhi.

¹⁷Thuman thutah sungah amate na siensuo in; na thu in thuman ahi hi.

¹⁸Leitungah kei nei sawl ma bangin, kei zong amate leitungah ka sawl hi.

¹⁹Thuman thutah sungah amate zong a kisiensuo thei nadingun, amate ka khuolna-in keima le keima ka kisiensuo hi.

²⁰“Tam mite ading beh ang ngen ka hi sih a, amau’ thugenna ziehin keima ei um ding mite adingin zong ang ngen ka hi hi.

²¹Pa aw, kei nei sawl lam leitung mite in a up thei nading ule kei sungah nang na om a, nang sungah kei ka op bangin, amate zong eite sungah omin[80] a unpi-un pumkhat a suo thei nadingun thu kang ngen hi.

²²Nang le kei pumkhat i suo bangin amate zong pumkhat a suo thei nadingin keima in nei pieh minthanna amate ka pie zo hi.

²³Amate pumkhat a suo sieng thei nadingun amate sungah kei ka om a, kei sungah nang na om hi, tuaci’n kei leitunga nei sawl ahi lam le kei nei it bangin amate zong na it lam leitung mite in a thei ding uhi.

²⁴Pa aw, nei piehsate in zong leitung pien masanga kei nei it zieha nei piehsa ka minthanna a mu dingin ka opna ah kei tawh amate ang op ding uh ka lunggul hi.

²⁵“A thuman ka Pa aw, leitung mite in ang thei sih vangin keima in nang kang thei hi; tuale tamte in zong kei nei sawl lam a thei uhi.

²⁶Amate na min ka theisah zo ta a, amate sungah kei nei itna za itna a op thei nading le, amate sungah kei ka op thei nadingin keima in na min ka theisah lai ding hi,” a ci hi.