Read Zou JOHN 19 Bible Online

JOHN 19 - Zou bible

JOHN 19

¹Tua ciengin Pilat in Jesu kai-in a satsah hi.

²Tuale galkapte in ling tawh kumpi lukhu khat phanin a lu tungah a khusah vua, puontuol ausan khat a silsah uhi.

³Ama kungah amate pei den mielmuolin, “Jew mite kumpipa na khan sau taheh,” ci-in a mai a beng uhi.

⁴Pilat pusuoh kia-in amate kungah, “En un, ama mawsah thei nading bangma thu ka mu lo lam na thei nadingun na kung vuah ama kang peisah hi,” a ci hi.

⁵Tuaci’n ling lukhu khukawm le puontuol ausan silkawmin Jesu a pusuoh hi. Pilat in amate kungah, “En un, mipa tanah om hi!” a ci hi.

⁶Siempu liente le palihte in ama a mu ciengun, “Singlamte tungah khailia un! Singlamte tungah khailia un!” ci-in a awng uhi. Pilat in amate kungah, “Noma ma in la unlen singlamte tungah kikhailia ta un; kei ka hile ama tungah mawmat ding ka mu sih hi,” a ci hi.

⁷Jew mite in ama kungah, “Kote in thukham khat ka nei vua, ama Pasien’ Tapa a kici ziehin thukham dung zui-in a si dinga kilawm ahi hi,” a ci uhi.

⁸Pilat in tami thu a zah ciengin nidang sangin a zauzaw hi.

⁹A kumpi inn ah[85] ama lutkia-in Jesu kungah, “Nang hei pana hing pei na hiei?,” ci-in a dong hi. Hinanle Jesu in kam khat beh dawng lo hi.

¹⁰Tua ahi ziehin Pilat in ama kungah, “Kei ei hopi lo ding na hi amah? Nang hla thei nading le tha thei nading thu ka nei lam tah na thei sih amah?” a ci hi.

¹¹Jesu in ama kungah, “Tunglam pana ang kipieh sih leh kei tungah thu na nei thei sih ding hi; tua ahi ziehin nang tunga kei ei piekhie pa in mawna lienzaw a bawl hi,” ci-in a dawng hi.

¹²Khum hun a kipanin Pilat in ama hla thei nading sui a, ahi vangin Jew mite in, “Tam pa na hla poma leh Caesar’ lawm na hi sih hi. Ama le ama kumpi a kibawl popo Ceasar langpang ahi hi,” a ci uhi.

¹³Pilat in tam thute a zah ciengin a pulamah Jesu peipi a, Hebrew[86] hamin Gabbatha a kici Suongpha muna a om thukhenna topha tungah a to hi.

¹⁴Khum ni pen Peisan pawi dinga Kigin ni hi a, sunkim pawl ahi hi. Ama in Jew mite kungah, “Na kumpipa uh tanah om ei!” a ci hi.

¹⁵Amate in, “Ama that in! Ama that in! Singlamte tungah khailia in!” ci-in a kiko uhi. Pilat in amate kungah, “Na Kumpipa uh ka khailia ta diei mah?” ci-in a dong hi. Siempu liente in, “Caesar simlo kumpi dang ka nei sih uhi,” ci-in a dawng uhi.

¹⁶Tua ciengin Pilat in khailia dingin amate khutah Jesu a pie hi.

¹⁷Tuaci’n amate in Jesu peipi-in ama’ singlamte ding ama in puo a, Hebrew[87] hamin Golgotha a kici Lutang Gu Mun-ah a pusuoh hi.

¹⁸Amate in singlamte tungah Jesu le adang mi nite tua munah a khailia uhi. Ama langtuoh ah adang nite kikhai-in a lai-ah Jesu kikhai hi.

¹⁹Pilat in zong lai khat gielsahin, “Nazareth khuomi Jesu, Judah Kumpipa,” cisah a, singlamte tungah a suongsah hi.

²⁰Jew mite tampitah in tua lai kigiel a sim uhi. Bangzieh ahei cile Jesu kikhaina mun pen khuopi tawh kinai hi; tuami lai pen Hebrew lai, Latin lai, le Greek laite tawh kigiel ahi hi.

²¹Tua ciengin Judah siempu lien pente in Pilat kungah, ‘Judah-te Kumpipa’, ci-in giel sinlen, “ Tam pa in kei Judah kumpipa ka hi hi,’ a ci hi, ci-in gielzaw in,” a ci uhi.

²²Pilat in, “Ka gielsa, ka gielsa ahi hi,” ci-in a dawng hi.

²³Singlamte tungah Jesu a khailia zaw ciengun galkapte in a puonsilte la-in phal li a suo vua, phal khat cietin a tang uhi. Amate in a puon tungsil zong a la uhi; tua pen a lu panin a taw donga khui lo-a kigan ahi hi.

²⁴Tuaci’n amate in, “Tami balkeh sih vai, koi pen in i nga ei aisan vai,” khatlekhat a kici uhi. Tam pen Lai Siengtho in, “Amate in ka puonte a hawm vua, ka puon-ah nga nadingin ai a san uhi,” a ci thu a tangtun nading ahi hi.

²⁵Galkapte in tam bangin a bawl uhi. Tua laitahin Jesu’ singlamte gei-ah a nu, a nu’ sanggamnu, Clopas’ zi Mary, le Mary Magdalene-te a ding uhi.

²⁶Jesu in a nu panga a ding a it mama nuazuipa a mu ciengin ama in a nu kungah, “Numei aw, tanah na tapa om hi,” a ci hi.

²⁷Tua ciengin ama in nuazuipa kungah, “Tanah na nu om hi,” a ci hi. Khum hun a kipanin a nuazui pa in a inn ah ama a peipi hi.

²⁸Tua zaw ciengin Jesu in vai zosie mansieng zo ci a thei ciengin (Lai Siengtho a tangtun nadingin), “Ka dang a ta hi,” a ci hi.

²⁹Tua munah lenggazu thua a dim bel khat kitung hi. Tuaci’n amate in tua sungah tuihup a die vua, hyssop ba dawnah taa-in Jesu’ kam tawh a tuo uhi.

³⁰Jesu in tua lenggazu a dawn zaw ciengin, “Kizo zo hi,” ci-in lukunin a si hi.

³¹Tua ni pen Kigin ni ahi ziehin Jew mite in sabbath hun sungin singlamte tungah a luongte nuasie ding a dei sih uhi. Bangzieh ahei cile tua sabbath pen a diehdiehin a lipkhap huoi ni thupi ni ahi hi. Tuaci’n amate in a kikhailum pa’ kengte sattanin a luongte a hepkhiet thei nadingin Pilat kungah a ngen uhi.

³²Tua ciengin galkapte pei-in a masa pa’ keng sattan piehin ama tawh a kikhaiton adang khat pa-a’ zong a sattanpieh uhi.

³³Ahi vangin Jesu kung a tun ciengun ama a sisa-in a mu vua, a kengte a sattan pieh ta sih uhi.

³⁴Tua tangin galkapte khat in teipi tawh a pang a sun leh thakhatin sisan le tui a luongkhie hi.

³⁵(Note in zong tam thu na up thei nadingun tami thu a mu pa in teci a pang hi. Ama’ teci panna thuman ahi a, ama thuman gen ahi lam a kithei hi.)

³⁶Lai Siengtho in, “A gu khat zong kitawngsah lo ding hi,” ci-in a genna thu a tangtun thei nadinga tam thute ang pieng ahi hi.

³⁷Lai Siengtho mundang khat ah, “Amate in a sut pa uh a en ding uhi,” na ci lai hi.

³⁸Tam thu teng zaw ciengin Jesu’ nuazui khat, Jew mite a giin ziehin a langtanga a zui ngam lo, Arimathea khuomi Joseph in Jesu’ luong a lah thei nadingin Pilat kungah ngen hi. Pilat in zong ama phalna a pie hi; tuaci’n ama pei-in Jesu’ luong a la hi.

³⁹Jesu kungah a zan haw ngai pa Nicodemus zong myrrh le aloes kihal pong za bang a gih ding panamtuite tawi-in a pei hi.

⁴⁰Amate in Jesu’ luong la-in Judah-te’ kivuina ngaina bangin diel sungah panamtui tawh a tun uhi.

⁴¹Singlamte tungah a kikhailiana mun gei-ah um khat om a, tua um-ah koima a kivui ngai nai lona han tha khat a om hi.

⁴²Jew mite’ Kigin ni ahi zieh leh tua kima han nai pen ahi ziehin tua hanah Jesu a vui uhi.