Read Zou JOHN 20 Bible Online

JOHN 20 - Zou bible

JOHN 20

¹Nipi kal khat sunga ni masa pen ni zingmawng khuomiel laipi-in hanah Mary Magdalene a pei leh ama in hankot sinna suongtum a kiliamangsa a mu hi.

²Tuaci’n Simon Peter le Jesu in a it a nuazui dang khat kungah tua nu tai-in, “Amate in han panin TOPA a ladawh ta vua, hei-a a siel uh ahei, ci ka thei sih uhi,” a ci hi.

³Tua ciengin Peter le adang nuazui pa dingkhie-in han lamah a pei uhi.

⁴A ni tuohun ama gel a taiton vangun nuazui dang khat pa in Peter makhelin hanah a na matun hi.

⁵Ama kunsuhin a etsuh leh tua munah a kitunna puon kipha a mu a, ahi vangin a sungah ama a lut sih hi.

⁶Tua ciengin ama’ nua zui-in Simon Peter pei a, han a tun ciengin han sungah a lut hi. Ama in tua munah a kitunna puon kipha mu a,

⁷a lu tunna puon zong a luong tunna puon tawh na omton loin a tuomtuohin kizielin a om a mu hi.

⁸Tua ciengin hanah a na tung masa adang nuazui pa zong a sungah lut a, tuale ama in mu-in a um hi.

⁹Azieh pen amate in misite lah panin ama thokia ding hi, ci-a Lai Siengtho genna a theitel nai sih uhi.

¹⁰Tua ciengin nuazuite a inn ciet vuah a peikia uhi.

¹¹Ahi vangin han pulamah Mary dingin a kap hi. A kaa kawmin hankhuh sung lam enin[88] a kunsuh leh,

¹²tua nu in Jesu luong kisielna a lu lamah khat, a keng lamah khat, puonpah silin a to vantungmi ni a mu hi.

¹³Ama gel in tua nu kungah, “Numei aw, bang dinga kap na hei?” a ci uhi. Tua nu in ama gel kungah, “Amate in ka TOPA a lamang ta vua, hei sunga a siel dawh uh ahei, ci ka thei ta sih hi,” a ci hi.

¹⁴Tua nu in tam thu a gen zaw ciengin a kinua hei leh khum sunga a ding Jesu mu a, ahi vangin Jesu ahi lam a thei sih hi.

¹⁵Jesu in ama kungah, “Numei aw, bang dinga kap na hei? Koi ahiei na sui?” a ci hi. Tua nu in huon bawlpa sa a, “Sie aw, nang puohdawh ahile, na koina ei gen in, a luong ka la ding hi,” a ci hi.

¹⁶Jesu in ama kungah, “Mary!” a ci leh Mary zong kinua hei-in Hebrew[89] hamin, Rabboni!” ci a, (tua khu Siepa a cinopna ahi hi).

¹⁷Jesu in tua nu kungah, “Ei tu sin, bangzieh ahei cile Pa kungah ka peito nai sih hi. Ahi vangin ka sanggamte kungah pei inlen, “Ka Pa le na Pa uh ahi, ka Pasien le na Pasien uh’ kungah ka kato ta ding hi,’ ci hi, ci-in va genzaw ta un,” a ci hi.

¹⁸Mary Magdalene zong pei pai-in nuazuite kungah, “TOPA ka mu zo hi,” a ci hi; tua nu in tua pa thugen zosie amate kungah a gensawn hi.

¹⁹Nipi kal khat sunga ni masa pen nitahin nuazuite in Judah mite a giin ziehun inn kotkhahte a khah vua, tuale a kikhopna vuah Jesu pei-in amate lahah ding a, “Nopna note tawh ang om taheh,” a ci hi.

²⁰Ama in tam thu a gen zaw ciengin amate kungah a khutte le a pang zong a lah hi. Nuazuite in TOPA a mu ciengun a nuom mama uhi.

²¹Jesu in amate kungah, “Note tawh nopna om taheh. Pa in kei ei sawl bangin note kang sawl hi,” a cikia hi.

²²Tam a ci zaw ciengin amate tungah a hu sang a, “Hlagau Siengtho na sang un.

²³Note in mi khatpo’ mawnate na maisah uleh, tua mawnate kimaisah ding a, mi khatpo’ mawnate na opsah suoh uleh tua mawnate a om suoh ding hi,” a ci hi.

²⁴Jesu a pei laitahin amate lahah sawm le nite lahah khat Thomas (a kopsuo[90] kici pa) om lo hi.

²⁵Tuaci’n nuazui dangte in tua pa kungah, “TOPA ka mu ta uhi,” a ci uhi. Ahi vangin ama in amate kungah, “A khut sunga siakil kikhetna pawn mu-in, siakil kikhetna ma vangah ka khutme ka va khum tehteh sih a, a pang zong ka khut tawh ka va tham tehteh sih leh ka um sih ding hi,” a ci hi.

²⁶Tua zaw nipi kal khat ciengin inn sungah a nuazuite a na omkia vua, Thomas zong amate tawh a omton hi. Kotkhahte a kikha vangin Jesu pei-in amate lahah ding a, “Note tawh nopna om taheh,” a ci hi.

²⁷Tua ciengin ama in Thomas kungah, “Na khutme tawh tamtah tham inlen ka khutte en in. Na khut zah inlen ka pang zong tham in. Umla sinlen muong lenlon in,” a ci hi.

²⁸Thomas in, “Ka TOPA le ka Pasien!” ci-in a dawng hi.

²⁹Jesu in ama kungah, “Kei nei mu zieha ei um pan na hi bo amah? Kei ei mu lopi-a ei umte mi hampha ahi uhi,” a ci hi.

³⁰Jesu in a nuazuite’ muna-ah tami laibu sunga a kigiel kha lo na lamdang tampitah zong a bawl hi.

³¹Ahi vangin Jesu in Messiah[91] hi a, Pasien’ Tapa ahina thu na up[92] thei nading ule tua banga na upna uh tungtawnin ama’ min tawh hinna na nei thei nading vua tam thute kigiel ahi hi.