Read Zou JOHN 21 Bible Online

JOHN 21 - Zou bible

JOHN 21

¹Tami thu teng zaw ciengin a nuazuite opna Tiberius tuipi gei-ah Jesu kilahkia hi. Ama tam bangin kilah hi.

²Tua munah a kisutuo teng pen Simon Peter, a kopsuo[93] kici Thomas, Galilee gam Cana khuomi Nathanael, Zebedee’ tapate, le a nuazui dang nite ahi uhi.

³Simon Peter in amate kungah, “Nga beng dingin va kuon ta vang,” a ci hi. Amate in, “Komate in zong nang zui va ung,” a ci uhi. Amate pei-in gunkuong tungah a tuong vua, hizongle tua zanin bangma a man sih uhi.

⁴Zingmawng khuovah patin gun gei-ah Jesu ding a, ahi vangin nuazuite in Jesu ahi lam a thei sih uhi.

⁵Jesu in amate kungah, “Tate, nga khat beh na man sih uh amah?” a ci hi. Amate in, “Man sih ung,” ci-in a dawng uhi.

⁶Ama in, “Gunkuong zietlam pangah na len uh pai locin pawlkhat na man ding uhi,” a ci hi. Tuaci’n len a pai uleh nga tampi awhin a len uh a kai zo ta sih uhi.

⁷Jesu in a it nuazui pa in Peter kungah, “TOPA lah ahin!” a ci hi. Simon Peter in TOPA ahi lam a zah ciengin ama pen a ngentanga om ahi ziehin puon silin tui sungah a lengsuh hi.

⁸Nuazui dangte zong gunkuong tawh pei-in a len utawh nga a dimletin a kai uhi. Tua mun le gungei pen kigamla lo a, kai za ni[94] bang beh a kigamla hi.

⁹Pieugei a tun ciengun meihol kitaw mei-am tungah nga le anlum kihang a mu uhi.

¹⁰Jesu in amate kungah, “Na nga matte uh tawmkhat hing tawi un,” a ci hi.

¹¹Tuaci’n gunkuong tungah Simon Peter kato-in tuipieu-ah len kai dawh a, nga a gol vive za le sawm nga le thum a awh hi. Tua za-a a tam vangin len a ehkeh sih hi.

¹²Jesu in amate kungah, “Hing pei unlen zing an ne un,” a ci hi. Amate in TOPA ahi lam a thei ziehun a nuazuite khat beh in, “Nang koi na hei?” ci-in a dong ngam sih uhi.

¹³Jesu pei a, tuale khomun la-in amate a pie hi. Tua ma bangin nga zong la-in a pie hi.

¹⁴Tami pen sina panin Jesu a thawto zaw a nuazuite kunga a kilah a thum veina ahi hi

¹⁵Zing an a neh zaw ciengun Jesu in Peter kungah, “John’ tapa Simon aw, tamte sangin kei nei it zaw ei mah?” a ci hi. Peter in ama kungah, “Kang itzaw hi TOPA. Nang kang it lamtah na thei hi,” a ci hi. Jesu in ama kungah, “Ka tuunote na vah in,” a ci hi.

¹⁶Ama in, “John’ tapa Simon aw, kei nei it ei mah?” ci-in a niveina dong leuleu hi. Ama in, “Kang it hi, TOPA aw, nang in kang it lamtah na thei hi,” a ci hi. Jesu in ama kungah, “Ka tuunote na cing in,” a ci hi.

¹⁷Ama in, “John’ tapa Simon aw, kei nei it ei mah?” ci-in a thumveina dong leuleu hi. “Nang in kei nei it ei mah?” ci-in thumvei a dawh ziehin Peter da mama a, tua ahi ziehin, “TOPA, na zosie na thei a, ke’n nang kang it lam zong na thei hi,” a ci hi. Jesu in ama kungah, “Ka tuute na cing in.

¹⁸A tahtah a kang ci-in, na khangno lai-in na kawng gahin na nopnopna-ah na pei thei hi. Ahi vangin na khangham ciengin na khutte zahin mi dangte in na kawng gah ding a, na pei nop lona-ah ang peipi ding hi,” a ci hi.

¹⁹(Ama in bangci bang sina tawh Pasien’ min a thansah nading a gen nopna ahi hi.) Tam thu a gen zaw ciengin Jesu in Peter kungah, “Ka nua ei zui-in,” a ci hi.

²⁰Peter a kihei leh Jesu in a it a nuazui pa in amate a zui a mu hi. ama pen nitah an a neh laitahun Jesu banah kingamin, “TOPA, nang ang leheh ding pa koi ahiei?” ci-a a dong pa ahi hi.

²¹Peter in tua pa a mu ciengin Jesu kungah, “TOPA, ama bangci ding?” a ci hi.

²²Jesu in, “Kang peikia dong cieng ama a hing lai dinga ka dei nah leh nang tawh bang kisai ahei? Keima ei zui-in! a ci hi.

²³Tuaci’n a khuopite[95] lahah tami nuazuipa si lo ding hi, ci-in a thu kithang hi. Hinanle Jesu in tami nuazui pa si lo ding hi, ci-in a genkha sih a, “Kang peikia hun dong ama a hing dinga ka dei leh nang tawh bang kisai ahei?”[96] a ci ahi zaw hi.

²⁴Tam thu teng teci pang le a gielpa pen tami nuazui pa hi a, a teci panna pen thudih ahi hi, ci-in i thei uhi.

²⁵Ahi vangin Jesu in a sep adang na tampite zong omlai hi. Tua teng zosiepi a kigiel sieng hileh leitung in tua a kigiel ding laibu teng kenin ka um va-ia sih hi.