Read Zou JOHN 3 Bible Online

JOHN 3 - Zou bible

JOHN 3

¹Nicodemus a kici Judah makai khat om a, ama pen Pharisee-te khat ahi hi.

²Zan lai-in Jesu kungah pei-in ama kungah, “Rabbi aw, nang pen Pasien kung pana ang pei siepa khat na hi lam kang thei uhi; azieh pen Pasien lo tawh na bawl tami limte koima in bawl thei lo hi,” a ci hi.

³Jesu in ama kungah, “A tahtah a kang ci-in, mi khatpo tunglam panin a suokia[9] sih leh Pasien’ manggam a mu thei sih ding hi,” a ci hi.

⁴Nicodemus in, “Mi khat a khangham zaw ciengin bangci suokia thei ding ahei? A nu gil sungah lutkia-in a suohkia thei ding amah?” a ci hi.

⁵Jesu in, “A tahtah a kang ci-in, koipo tui le hlagau tawh a suokia sih leh Pasien’ manggam a lut thei sih ding hi.

⁶Tahsa-a suona in tahsa hi a, Hlagau-a suona in hlagau[10] ahi hi.

⁷‘Nang[11] na hi leh tunglam panin[12] na suohkia a ngai hi,’ kang ci ciengin lamdang sa sin.

⁸Hui zong a nopna popo-ah lang a, a gin na zah vangin hei pana hing lang hi a, hei lam zuon ahei, ci na thei sih hi. Hlagau-a suoh tapo zong tua ma bang ahi hi,” ci-in a dawng hi.

⁹Nicodemus in ama kungah, “Tami thu a bangci pien thei ding ahei?” a ci hi.

¹⁰Jesu in ama dawng a, “Nang Israel-te’ sie khat lawmlawm in tam thute na tel sih amah?

¹¹“A tahtah a kang ci-in, kote in ka theisa thute kang gen vua, ka musa thute beh teci kang pang uhi; ahi vangin nang[13] in ka teci panna uh na sang zo sih hi.

¹²Note kungah leitung thu tawh kisai kang gen ciengin na up sih uleh vantung thu hing gen leng bang na ci up thei ding uh ahei?

¹³Vantung pana ang kumsuh Mihing Tapa simlo vantungah a kato koima om lo hi.[14]

¹⁴Moses in gamlahah gul a khai bangin Mihing Tapa kikhai ding a,

¹⁵tua khu ama a um tapo in kumtawn hinna a nga nading ahi hi.

¹⁶“Pasien in leitung a it seng ziehin a tapa a um mi zosie in kisie loin kumtawn hinna a nei thei nadingin a tapa neisun a pie hi.

¹⁷“A tahtahin Pasien in leitung mawsahna thukhen dingin a Tapa leitunga ang sawl ahi sih a, ama tungtawnin leitung in hutdamna a nga thei nading hizaw hi.

¹⁸Ama a umte in mawsahna thukhenna a thuoh sih ding uhi; ahi vangin ama a um lote in Pasien’ Tapa neisun’ min a up lo ziehun mawsahna thukhenna a thuoh zo ta uhi.

¹⁹Tuale thukhenna a thuohna uh a hang pen leitungah khuovah hing tung zo napi a gamtat uh a siet luot ziehin mihingte in khuovah sangin khuomiel deizaw uhi.

²⁰Bangzieh ahei cile sietna a bawl mi zosie in amau’ gamtatnate a kilah lo nadingin khuovah a muda vua, khuovah sungah a pei sih uhi.

²¹Ahi vangin thuman-a a gamtate in amau’ gamtatna pen Pasien sunga gamta ahina uh kicien tahin a kimu thei nadingin khuovah sungah a pei uhi.

²²Tua zaw ciengin Judah gamah Jesu le a nuazuite a pei vua, khum munah amate tawh bakhat sung hun zangin mite a baptize hi.

²³Salim khuo gei-a Aenon munah tui a tam ziehin John in zong tuanah mite a baptize hi; tuale mite a kiphamatin pei-in a ki-baptize uhi,

²⁴thong sungah John a kikhum nai sih hi.

²⁵Tu-in kisiensuona tungtang thu tawh kisai-in John’ nuazuite le Jew[15] mi khat kikalah thu kikupna khat a om hi.

²⁶John kungah amate pei-in, “Sie aw, Jordan gun galkhatah nang tawh a omton ngai, ama’ thu teci na panna pa pen tu-in tanah omin mite a baptize a, mi zosie in ama a zuon uhi,” a ci uhi.

²⁷John in, “Vantung panin a kipieh sih leh koima in bangma nga thei lo hi.

²⁸‘Kei, Messiah[16] ka hi sih a, a masanga ei kisawl pa ka hi bo hi,’ ci-a ka gen khu nomate mama ka teci na hi uhi.

²⁹Monei pa pen zinei pa ahi hi. Zinei pa kungah dingin ama’ thu ngai-a om a guolpa in zinei pa’ aw a zah ziehin a kipah mama hi. Tua thu ziehin ka lungdamna a bukim ta hi.

³⁰Ama in khanlam manaw ding a, kei ka hile kiemlam ka manaw ding hi,” a ci hi.

³¹Tunglam pana ang peipa khu mi zosie tungah a om hi; lei pana piengpa pen lei-a’ ahi a, leitung thute a gen hi. Vantung pana ang peipa ahile mi zosie’ tungah a om hi.

³²Ama in mu-in a zahsa thute teci pang a, hizongle koima in a teci panna a sang sih hi.

³³Ama’ teci panna a sang poma in Pasien pen a thuman hi, ci-in a kipsah[17] uhi.

³⁴Pasien’ sawl mi in Pasien’ thu a gen hi, azieh pen ama in tua mipa tungah ciengtan om loin Hlagau a pie hi.

³⁵Pa in Tapa it a, ama’ khut sungah na zosie a koi zo hi.

³⁶Tapa a um mi poma in kumtawn hinna a nei hi; Tapa’ thu a mang lo mi poma in hinna mu lo ding a, Pasien’ lungthahna a thuohzaw lai ding hi,” a ci hi.