Read Zou JOHN 4 Bible Online

JOHN 4 - Zou bible

JOHN 4

¹“Jesu[18] in John sangin nuazui tam suohsah zaw-in mi tam baptize zaw hi, ci thu Pharisee-te in a zah lam uh Jesu in a thei ciengin,

²- a baptize-pa pen Jesu ahi sih a, a nuazuite ahi zaw hi-

³ama in Judea gam nuasie-in Galilee ah a peikia hi.

⁴Ahi vangin ama in Samaria gam nawhin a pei lo phamaw hi.

⁵Tuaci’n Jacob in a tapa Joseph a pieh leitang gei-ah Sychar a kici Samaria gam khuopi khatah a tung hi.

⁶Khum munah Jacob’ tuikhuh a om a, a khuolzin a gim ziehin tua tuikhuh gei-ah Jesu a to hi. Khum hun pen sunkim laitah ahi hi.

⁷Tui tawi dingin Samaria numei khat pei a, Jesu in tua nu kungah, “Tui ei dawnsah vawi,” a ci hi.

⁸(Neh ding lei-in khuopi sungah a nuazuite a pei sieng ta uhi.)

⁹Samaria numei nu in ama kungah, “Nang Judah mi khat in bangci dan a kei Samaria numei khat kunga tui nei nget thei ahei?” a ci hi. (Jew mite le Samaria-te sil bangma a kitang sih uhi.)[19]

¹⁰Jesu in tua nu kungah, “Pasien’ letsong thei-in na kungah, ‘Tui ei dawnsah in,’ ang cipa khu a theicien hi lacin, ama kungah tui na ngenzaw ding a, ama in hinna tui ang pie ding hi,” ci in a dawng hi.

¹¹Numei nu in ama kungah, “Sie aw, nang in tuikhai nading bangma na nei sih a, tuikhuh lah thuh mama hi. Tua hinna tui hei sunga na lah ding ahei?

¹²Tami tuikhuh pen ka pu uh Jacob ei pieh ahi a, ama le a tate-a kipanin a gan khawite in tami tuikhuh a na zah uh ahi hi, tua ahile nang khumpa sanga a lienzaw na hi amah?” a ci hi.

¹³Jesu in, “Tami tui a dawn poma a dangta kia ding a,

¹⁴ahi vangin amate ka pieh ding tui a dawn poma dangta ngai nawn lo ding hi. Ka pieh ding tui a dawnte sungah kumtawn hinna tuinahin a pul ding hi,” a ci hi.

¹⁵Tua numei nu in ama kungah, “Siepa, ka dang a ta nawn lo nading le tam sunga tui tawi-a ka pei nawn lo nadingin tua tui kei ei pie in,” a ci hi.

¹⁶Jesu in tua nu kungah, “Va pei-in na pasal va hlan ta’nlen tanah hing peikia in,” a ci hi.

¹⁷Numei nu in, “Ke’n pasal ka nei sih hi,” ci-in a dawng hi. Jesu in, ‘Pasal nei sing,’ na ci a man hi.

¹⁸Azieh pen pasal nga na nei ngai a, tu-a na nei pen zong na pasal ahi sih hi. Na thugen man hi!” a ci hi.

¹⁹Numei nu in, “Siepa aw, nang kamsang khat na hi lam ka thei hi.

²⁰Ka pu ka pate un tami muol tungah Pasien a na bie vua, ahi vangin note in lah Pasien bieh nading pen Jerusalem hi bo, na ci zel uhi,” a ci hi.

²¹Jesu in tua nu kungah, “Numei aw, kei ei um in, tami muol tungah hitale Jerusalem khuo ah hitale Pa na bieh nawn lo ding uh hun ang tung ding hi.

²²Note in na thei lopi uh na bie uhi; kote in ka theite ka bie uhi, azieh pen hutdamna khu Jew mite tung pan ahi hi.

²³Ahi vangin Pasien a bie tahtahte in lungsim le thuman thutah tawh a bieh ding uh hun ang tung ding a, tu-in tanah ang tung ta hi, azieh pen Pasien in tua banga a bie ding mite a sui hi.

²⁴Pasien pen Hlagau ahi a, ama a biete in lungsim le thuman thutah tawh a bie ding uhi,” a ci hi.

²⁵Numei nu in ama kungah, “Messiah (Khris kici pa) ang pei ding ci thu ka thei hi. Ama ang pei ciengin na zosie ei lah ding hi,” a ci hi.

²⁶Jesu in tua nu kungah, “Nang ang hopi keima khu tuapa ka hi hi,” a ci hi.

²⁷Tua zaw lien ciengin a nuazuite a tung uhi. Numei khat tawh ama a kiho pen lamdang a sa mama vua, ahi vangin koima in, “Bang dei na hei?” ahi sihle “Bang dinga ama na hopi ahei?” a ci sih uhi.

²⁸Tua ciengin a tuibel nuasie-in khuopi sungah numei nu peikia a,

²⁹“Hing pei un, ka gamtatna zosie ei gen mipa hing en ta un! Ama Messiah[20] ahi thei sih ding amah?” ci-in mite kungah a dong hi.

³⁰Amate in a khuopi uh nuasie-in Jesu kung a zuon uhi.

³¹Tua kikalin a nuazuite in, “Siepa bangkhat ne in,” ci in a zawl uhi.

³²Ahi vangin Jesu in amate kungah, “Na thei lo uh neh ding an ka nei hi,” a ci hi.

³³Tuaci’n a nuazuite in, “Koi khatpo in an a puoh zo ahi ta diei izaw?” a kici uhi.

³⁴Jesu in amate kungah, “Ei sawlpa’ deina banga ka sep ding le ama’ nasep ka man sieng ding pen ka an ahi hi.

³⁵Hla li zaw ciengin anlah hun ang tung ding hi, ci hi lo uh na mah? Ahi vangin ke’n kang ci-in, na kim na pam en un, lo lai-ah ante minin lah hun ta hi, ci thei un.

³⁶Anla pa in thaman a nga zo ta a, ama in kumtawn hinna a nga thei nadingin an kaikhawm a, tuaci’n khaitu pa le anla pa a lungdamton ding uhi.

³⁷Azieh pen, ’ Mi khat in vaw a, adang khat in bu a at hi,’ a na kici thu pen a man ahi hi.

³⁸Keima in na hlaw lona mun vuah a at dingin note kang sawl hi. Mi dangte in a hlo vua, note na hi ule amate’ hlawna lo-a a lut na hi uhi,” a ci hi.

³⁹Numei nu in, “Ka gamtatna zosie ama in ei gen hi,” ci-a teci a pan ziehin tua khuo-a Samaria mi tampite in Jesu a um uhi.

⁴⁰Tuaci’n Jesu kungah Samaria-te a tun uh ciengin amate kunga a tam dingin a zawl vua, tuanah ni ni sung Jesu a tam hi.

⁴¹Tuale ama’ thugente ziehin thu um mi tampi a kibelap hi.

⁴²Amate in numei nu kungah, “Na thugenna zieha a um ka hi nawn sih vua, ko mama in ka za vua, tampa pen leitung hundampa tahtah hi, ci-in ka thei uhi,” a ci uhi.

⁴³Ni ni zaw ciengin tua mun panin ama peikhie-in Galilee gam a zuon hi.

⁴⁴(bangzieh ahei cile Jesu mama in kamsang khat, ama’ gamah kipahta ngai lo hi, ci-in teci pang ngaisa ahi hi).

⁴⁵Galilee gamah ama a tun ciengin Galilee mite in a na lamdot uhi, bangzieh ahei cile amate in Jerusalem pawi-ah a silbawl zosie a mu ngai vua, amate mama zong pawi simin a pei uhi.

⁴⁶Tuisih, lengga zu a suosahna mun Cana khuo ah Jesu a peikia hi. Tua laitahin Capernaum khuo ah milien khat’ tapa dam loin a lum hi.

⁴⁷Tua mipa in Judea gam panin Galilee gamah Jesu a tun lam a zah ciengin peisuhin a tapa a damsah nadingin a thum hi, azieh pen a tapa a si dihtah ahi hi.

⁴⁸Tua ciengin Jesu in ama kungah, “Note in lim le na lamdangte na mu sih uleh na um sih ding uhi,” a ci hi.

⁴⁹Milien pa in ama kungah, “Siepa aw, ka tapa a si masangin hing hawsuh ta’n,” a ci hi.

⁵⁰Jesu in ama kungah, “Pei ta’n, na tapa dam ding hi,” a ci hi. Tua pa in Jesu’ thugen umin a pei hi.

⁵¹Lampi-ah a peisuh laitahin a silate in a na dawn vua, “Na tapa hing ta,” ci-in a gen uhi.

⁵²Tuaci’n ama in a noptuom hun amate a dong leh, “Zani sun nai khat laitahin a cithuo a theu hi,” a ci uhi.

⁵³Khum hun pen, “Na tapa a dam ding hi,” ci-in Jesu in a na gen hun lien ahi lam a pa in a thei ciengin ama le a innkuonpi zosie in Jesu a um pai uhi.

⁵⁴Tam pen Jesu in Judea gam panin Galilee gam a tun zaw a na lamdang bawl a niveina ahi hi.