Read Zou JOHN 5 Bible Online

JOHN 5 - Zou bible

JOHN 5

¹Tua zaw ciengin Jew mite’ pawi khat om a, Jesu zong Jerusalem ah a peito hi.

²Jerusalem khuo-a Tuu Tunkot gei-ah Hebrew[21] hamin Beth-zatha[22] a kici buol tuikhuh khat om a, tua buol in talap nga nei hi.

³Tua talapte sungah mittaw, khelbai, phalsi-a kipanin a dammaw mi tampitah in

⁴tui kilaw ding ngahin a lum uhi; bangzieh ahei cile buolah TOPA’ vantungmi khat kumsuhin a hunhunin tua tui a lawh thei zel hi; tua tui a kilaw zaw ciengin a sunga a kumsuh masa penpen mipa in bangbang natna vei tale a dam pai lien hi.[23]

⁵Khum sungah kum sawm thum le kum giet sung a cina khat a om hi.

⁶Jesu in tua sunga a lum mipa a mu ciengin ama in a lup zaw a sawt zo lam thei a, tuale ama in tua pa kungah, “Na dam nuom ei mah?” ci-in a dong hi.

⁷Cina pa in, “Siepa aw, tui a kilaw ciengin buol sungah ei koi ding mi koima ka nei sih hi; tuale ka pei ciengin ka masangah midang khat a na kumsuh paipai hi,” ci-in a dawng hi.

⁸Jesu in tuapa kungah, “Ding in, na lupna la inlen pei in,” a ci hi.

⁹Tuapa zong thakhatin dam a, a lupna la-in a pei pai hi. Khum ni pen Sabbath ni ahi hi.

¹⁰Tuaci’n Jew mite in damna nga pa kungah, “Tuni pen Sabbath ni ahi hi; na lupna puoh pen thukham tawh kituoh lo hi,” a ci uhi.

¹¹Ahi vangin ama in amate kungah, ‘Kei ei damsah pa in na lupna la inlen pei in,’ ei ci hi,” ci-in a dawng hi.

¹²Amate in, ‘Na lupna puo inlen pei-in,’ ang cipa koi ahei?” ci-in ama a dong uhi.

¹³Tua munah a om mihonte lahah Jesu peimang zieu ahi ziehin[24] a kidamsah pa in a damsah pa koi ahei, ci a thei ta vanuh sih hi.

¹⁴Tua zaw ciengin Jesu in biehinnpi sungah tua mipa mu a, ama kungah, “En in, na dam sieng ta hi! Na tungah a siezaw khat ang tun lo nadingin mawna bawl nawn sin,” a ci hi.

¹⁵Mipa pei-in ama a damsah pa Jesu ahi hi, ci-in Jew mite kungah a gen hi.

¹⁶Sabbath ni-in Jesu in tam bang nate a sep ziehin Jew mite in ama bawlsiet ding a kipan uhi.

¹⁷Ahi vangin Jesu in amate kungah, “Ka Pa in tudong na sem lai a, ke’n zong ka sem lai hi,” a ci hi.

¹⁸Tam bangin Jesu in sabbath ni a sietsah tham loin, Pasien pen a Pa hisah a, ama le Pasien pen a kikimin a koi ziehin Jew mite in ama tha dingin a sui semsem uhi.

¹⁹Jesu in amate kungah, “A tahtah a kang ci-in, Tapa in ama thu-in bangma bawl thei lo a, Pa’ bawl a mute beh a bawl hi; azieh pen Pa’ sep teng ma Tapa in zong sem hi.

²⁰Pa in Tapa it a, a silbawl zosie Tapa tungah lah hi; note in lamdang na sah dingun Pa in tamte sanga a lienzaw sep dingte Tapa tungah a lah ding hi.

²¹Pa in misite thosahin hinna a pieh ma bangin Tapa in zong a deisahte hinna a pie hi.

²²Pa in koima tungah thu a khen sih hi, ahi vangin ama in Tapa tungah thukhenna zosie a ap hi.

²³Mi zosie in Pa a zatah bangin Tapa zong a zatah nadingin Pa in koima tungah thu khen loin thukhen nading thu zosie Tapa a pie hi. Tapa a zatah lo mi poma in ama a sawlpa Pa zong a zatah lo ahi hi.

²⁴A tahtah a kang ci-in, koipo in ka thu za-in keima ei sawlpa a up leh kumtawn hinna a nei zo ta a, thukhenna thuoh nawn loin sina pan peikhie-in hinna ah a tung zo hi.

²⁵A tahtah a kang ci-in, misite in Pasien Tapa’ aw a zah ding uh hun le a za tapo a hin nading uh hun ang tung ding a, tu-in zong ang tung zo ta hi.

²⁶Azieh pen Pa in ama sungah hinna a nei ma bangin Tapa in zong ama sungah hinna a nei thei nading thu a pie hi.

²⁷Ama Mihing Tapa ahi ziehin Pa in ama tungah thukhen thei nading thuneina a pie hi.

²⁸Tami thu-ah lamdang sa sih un; azieh pen han sunga om zosie in ama’ aw za-in hansung panin ang pusuo ding uh hun ang tung ding a,

²⁹tuale a hoi a gamtate in hinna nga dingin ang thokia ding a, sietna a bawl mite zong thukhenna thuoh dingin ang thokia ding uhi.

³⁰Keima’ thu-in bangma ka bawl thei sih hi. Ka zah bangin thu ka khen hi; ka thukhenna a dih hi, azieh pen keima’ deina ka sui sih a, kei ei sawlpa’ deina ka suizaw hi.

³¹“Keima tawh kisai teci pang leng ka teci panna man lo ding hi.

³²Keima adingin teci a pang midang khat a om a, ama in keima dinga a teci panna pen dih hi, ci ka thei hi.

³³Note in John kungah mi na sawl vua, ama in thuman thutah thu teci a pang hi.

³⁴Tua banga mihing’ teci pannate ka sang hi, ka cina hi loin note in hutdamna na nga thei nadingun tam thute ka gen ahi zaw hi.

³⁵Ama pen meivah bangin kuongin a tang pimpem a, note in ama’ khuovah sungah bakhat sung nopsah ding na nuom uhi.

³⁶Ahi vangin John’ teci panna sanga a lienzaw teci panna khat ka nei hi. Pa in ka man sieng dinga ei pieh nasepte le tu-a ka septe in Pa pen keima ei sawlpa ahi lam keima tanga teci a pang ahi hi.

³⁷Tuale keima ei sawlpa ahi Pa mama in zong kei tangin teci a pang zo hi. Note in ama’ aw na za ngai sih vua, a lim a mel zong na mu ngai sih uhi.

³⁸Ama a sawlpa na up lo ziehun ama’ thu zong na sung vuah a teng sih hi.

³⁹“Lai Siengtho simna tawh tawntung hinna kinga thei ding na sah ziehun Lai Siengtho na lim-et mama uhi; tuate khu keima’ thu teci pang ahi bo hi.

⁴⁰Hizongle note in hinna na nei nadingun keima kungah nang pei nuom sih uhi.

⁴¹Keima in mihingte tung panin minthanna ka sang sih hi.

⁴²Ahi vangin note in Pasien’ itna lungsim na nei lo uh ka thei hi.

⁴³Ka Pa’ min suonga kang pei vangin nei sang sih uhi; ama’ min suongin midang khat ang pei hileh na sang ding uhi.

⁴⁴Khatlekhat kiphatna sang napi ucin, Pasien khat beh tung pana ang pei phatna na sui lopi uh na bangci up thei ding uh ahei?

⁴⁵Pa mai-ah note ang mawsah dingin ei ngaisun sih un; note ang mawsah pen na kinepna pa uh Moses ahi bo hi.

⁴⁶Moses um na hi uleh, kei zong nei up ding uh ahi hi, bangzieh ahei cile ama in keima’ thu a giel hi.

⁴⁷Note in a laigielte na up sih uleh ka thugente na bangci up thei ding uh ahei?” a ci hi.