Read Zou JOHN 6 Bible Online

JOHN 6 - Zou bible

JOHN 6

¹Tua zaw ciengin Tiberias Tuipi[25] zong a kici Galilee Tuipi galkhatah Jesu a pei hi.

²Mi tampite in cinate tungah a bawl lim lamdangte a mu ziehun ama’ nua a zui uhi.

³Jesu zong muol tungah ka to-in khum tahah a nuazuite tawh a toton hi.

⁴Tu-in Judah-te’ Peisan pawi nai mama ta hi.

⁵Jesu a khuoda leh ama kung a zuon mihonpite mu a, tuaci’n ama in Philip kungah, “Tam mite neh ding an hei sungah i lei ding vuoi?” a ci hi.

⁶Tam pen Philip a zelahna-a a gen ahi bo hi, azieh pen amama in a bawl ding a theisa ahi hi.

⁷Philip in, “Mikim in themkhat cietin a tan ding uh an lei nadingin hla guh thaman[26] in zong cin lo ding hi,” ci-in a dawng hi.

⁸A nuazuite lah panin Peter’ sanggampa Andrew in ama kungah,

⁹“Tamnah anlum pum nga le nga tawn ni a nei naupang khat om hi. Ahi vangin mihing tazapi lahah tam teng banga gei ding ahei?” a ci hi.

¹⁰Jesu in, “Mite tosah un,” a ci hi. Tua munah lopa tampi a po hi; tuaci’n amate[27] a to vua, pasal tul nga bang a pha uhi.

¹¹Tua ciengin Jesu in zong anlum la-in lungdam a ko zaw ciengin a to mite lahah a hawm hi; tua ma bangin nga zong la-in amau’ deiza cietin a hawmpieh hi.

¹²A kham zaw ciengun a nuazuite kungah, “A thelthang bangma a op lo nadingin khawnla nengkie teng luoh un,” a ci hi.

¹³Tuaci’n amate in anlum nga sungah khawnla nengkie teng a luoh vua, seu sawm le seu ni a dim hi.

¹⁴Mite in ama’ bawl lim lamdangte a mu uh ciengin, “Tampa pen leitunga ang pei ding kamsang tahtah khat hi ding hi,” a ci uhi.

¹⁵Mite pei-in kumpi dinga a paumat ding uh Jesu in a thei bepin ama guohin muol tungah a geldap hi.

¹⁶Nitah ciengin tuipi-ah a nuazuite a peisuh vua,

¹⁷gunkuong khatah tuongin Capernaum zuon dingin tuipi a kantan uhi. Tua munah khuo miel ta a, Jesu lah amate kungah a tung nai sih hi.

¹⁸Huipi a hat ziehin tui a kilawh hi.

¹⁹Tai thum tai li[28] bang gunkuong a haw zaw ciengun amate lam ang zuon, tui tunga ang pei Jesu a mu vua, a zau mama uhi.

²⁰Ahi vangin Jesu in amate kungah, “Keima ka hi hi; zau sih un,” a ci hi.

²¹Tua ciengin amate in gunkuong tungah kipah tahin ama a tuongsah vua, tuale a gunkuong zong a tun nading mun vuah mallang tahin a tung hi.

²²A zing ciengin tuipi galkhatah a omlai mihonpite in tua sungah gunkuong khat beh om a, Jesu lah a nuazuite tawh tua gunkuong tungah tuongton loin amate guoh a pei a mu uhi.

²³Tua ciengin TOPA in lungdam a ko zaw ciengin[29] khomun a nehna uh mun gei-ah Tiberius panin gunkuong pawlkhat a pei hi.

²⁴Tuaci’n tuipi gei-ah mihonpite in Jesu le a nuazuite a op nawn lo lam a thei ciengun, Jesu sui dingin gunkuong tung tuongin Capernaum ah a pei uhi.

²⁵Amate in tuipi galkhatah ama a mu ciengun ama kungah, “Siepa, bang hun a tasung na tung na hei?” a ci uhi.

²⁶Jesu in, “A tahtah a kang ci-in, na lamdangte na mu zieh vua kei ei sui hi loin, an kham taha na neh zieh vua ei sui na hi bo uhi.

²⁷A sie thei an nga nadingin hakat sih unlen, Mihing Tapa in ang pieh ding kumtawn hinna dinga a kimang thei an nga nadingin hakatzaw un. Azieh pen Pa Pasien in ama tungah a ciemtena seal a khen zo ta hi,” ci-in a dawng hi.

²⁸Tua ciengin amate in, “Pasien’ na ka sep thei nadingun bang bawl ding ka hi uh ahei?” a ci uhi.

²⁹Jesu in amate kungah, “Ama in ang sawlpa na upna uh pen Pasien’ nasep ahi hi,” ci-in a dawng hi.

³⁰Tuaci’n amate in ama kungah, “Kote in zong mu-a kang up thei nadingun lim lamdang bang ei lah ding na hei? Bang teng bawl ding na hei?

³¹Lai Siengtho sungah, ‘Ama in vantung panin a neh ding uh khomun a pie hi,’ ci-in a kigiel ma bangin, i pu i pate in gamlahah manna a ne uhi,” a ci uhi.

³²Tua ciengin Jesu in amate kungah, “A tahtah a kang ci-in, Moses in vantung panin note khomun ang pie sih a, vantung panin khomun ang pie pa pen ka Pa ahi bo hi.

³³Bangzieh ahei cile vantung panin hing pei-in leitung mite hinna a piepa pen Pasien’ khomun ahi hi,” a ci hi.

³⁴Amate in ama kungah, “TOPA, tami khomun ko ei pie suoh ta’n,” a ci uhi.

³⁵Jesu in amate kungh, “Keima in hinna khomun ka hi hi. Kei kunga ang pei poma gilkiel ngai nawn lo ding a, kei ei um poma a dangta ngai nawn sih ding hi.

³⁶Hinanle kei ei mu zo napi ucin nei um sih uhi, ci-in kang gen zo hi.

³⁷Pa in kei ei pieh mi zosie ka kungah ang pei ding vua, tuaci’n ka kunga ang pei poma ka notmang ngai sih ding hi.

³⁸Bangzieh ahei cile keima’ dei bang bawl dinga vantung pana ang kumsuh ka hi sih a, keima ei sawlpa’ dei bang bawl dinga ang kumsuh ka hizaw hi.

³⁹Keima ei sawlpa’ deina ahile, ama in ei piehsa zosie khat zong mansuo loin, ni tawp ni cienga ka thawsah ding ahi hi.

⁴⁰Tapa mu a, a um zosie in kumtawn hinna nei-in ni tawpni ciengin amate ka thawsah ding pen ka Pa’ deina tahtah ahi hi,” a ci hi.

⁴¹Tua ciengin ama in, “Keima in vantung pana ang kumsuh khomun ka hi hi,” a ci ziehin ama tungah Jew mite a phun uhi.

⁴²Amate in, “Tampa a nu le a pa i thei hi a, ama Joseph’ tapa Jesu hi lel lo amah? Tu-in ama in, ‘Vantung pana ang kumsuh ka hi hi,’ bang dinga a ci thei ahei?” a ci uhi.

⁴³Jesu in amate kungah, “Khatlekhat kiphunsan sih un.

⁴⁴Keima ei sawlpa Pa in a huoi lote koima ka kungah ang pei thei sih ding hi; ni tawp ni ciengin keima in tua mipa ka thosah ding hi.

⁴⁵Kamsangte’ laibu sungah, ‘Pasien in amate a unpi-un a hil ding hi,’ ci-in kigiel hi. Pa tung panin thu ngai-in a kunga kisin poma kei kung pana ang pei ahi hi.

⁴⁶Tam bang ka ci ciengin Pa kung pana ang pei mi khat simlo khatpo in Pa mu zo hi, a ci ka hi sih hi; ama in Pa a mu zo hi.

⁴⁷A tahtah a kang ci-in, a um mi in kumtawn hinna a nei hi.

⁴⁸Kei pen hinna khomun ka hi hi.

⁴⁹Na pu na pate un gamlahah manna ne-in a si uhi.

⁵⁰Tami pen vantung pana ang peisuh khomun ahi a, a ne mi poma a si sih ding hi.

⁵¹Keima in vantung pana ang peisuh hinna khomun ka hi hi. Tami khomun a ne poma kumtawnin a hing den ding hi; leitung mite hinna dinga ka pieh ding khomun pen keima’ tahsa ahi hi,” a ci hi.

⁵²Tua ciengin Jew mite in, “Tam pa in i neh dingin a tahsa bang ei ci pieh thei ding ahei?,” ci-in a kisel uhi.

⁵³Tuaci’n Jesu in amate kungah, “A tahtah a kang ci-in, note in Mihing Tapa’ sa na neh sih vua, a si na dawn sih uleh na sung vuah hinna na nei sih ding uhi.

⁵⁴Keima’ sa ne-a keima’ si a dawn mite in kumtawn hinna nei a, keima in nitawp ni ciengin amate ka thosah ding hi.

⁵⁵Bangzieh ahei cile ka sa pen neh ding an tahtah ahi a, ka si zong khu dawn ding tui tahtah ahi hi.

⁵⁶Ka sa ne a, ka si a dawn poma keima sungah teng a, kei zong ama sungah ka teng hi.

⁵⁷A hingzing Pa in keima ei sawlin Pa ziehin ka hin ma bangin, kei zieha a ne poma zong a hing ding hi.

⁵⁸Tami pen vantung pana ang kumsuh khomun ahi a, na pu na pate un ne-in a si veve utawh kibang lo hi. Ahi vangin tami khomun a ne poma a hing zing ding hi,” a ci hi.

⁵⁹Ama in tam thu pen Capernaum khuo kikhopna inn sungah a thuhil lai-a a gen ahi hi.

⁶⁰A nuazui tampite in tua thu a zah ciengun, “Tami thuhilna hahsa mama hi. Koi in pom thei ding ahei?” a ci uhi.

⁶¹Ahi vangin a nuazuite in tam thu zieha a phunphun uh Jesu in a thei ciengin amate kungah, “Tam thu in note ang lungkiesah amah?

⁶²Tua ahile Mihing Tapa a opna ngai-ah a kato a mu hi locin bang na ci ding vuoi?

⁶³Hinna a pie pen hlagau ahi a, tahsa in kimanna a nei sih hi; na kung vua kang gen thute hlagau thu ahi a, hinna zong ahi hi.

⁶⁴Ahi vangin note lahah a um lo pawlkhat a om hi,” a ci hi. Tua banga a ci theina pen Jesu in a cil a patin koite in um lo a, koite in ama lebawl ding ahei, ci thu a theisa ahi zieh ahi hi.

⁶⁵Tuale ama in, “Tami thu ziehin Pa phalna om loin ka kungah koima ang pei thei sih ding hi, ci-in kang gen zo hi,” a ci hi.

⁶⁶Tami thu a zah ziehun a nuazui tampite kinuale-in ama tawh a kithuo nawn sih uhi.

⁶⁷Tuaci’n Jesu in sawm le nite kungah, “No zong na peimang nuom vuoi mah?” ci-in dong a,

⁶⁸Simon Peter in, “TOPA, ko koi kunga pei son ding ka hi uh ahei?

⁶⁹Nangma in kumtawn hinna thu na nei a, kote in a Siengtho Pasien[30] na hi lam kang um vua, zong kang thei uhi,” ci-in a dawng hi.

⁷⁰Tua ciengin Jesu in amate kungah, “No, sawm le nite, kang teel na hi sih uh amah? Hizongle note lahah khat pen dawimangpa ahi hi,” a ci hi.

⁷¹Tam pen sawm le nite lahah ama a leheh ding pa, Simon Iscariot[31] tapa’ Judas a genna ahi hi.