Read Zou JOHN 7 Bible Online

JOHN 7 - Zou bible

JOHN 7

¹Tua zaw ciengin Galilee gam sungah Jesu a zin kawikawi hi. Ama tha nading Jew mite in hunlem a sui ziehun Judea gamah ama a zin nuom[32] sih hi.

²Tu-in Judah-te’ Buh[33] Pawi a nai mama hi.

³Tuaci’n a sanggamte in ama kungah, “Na nuazuite in na nasepna a mu thei nadingun tam sung nuasie inlen Judea gamah pei in;

⁴azieh pen mipi thei ding a nuom poma in dapsep ngai lo hi. Tam thute na bawl leh leitung mite theisah vet in,” a ci uhi.

⁵(Azieh pen a sanggamte nangawn in ama a um sih uhi.)

⁶Jesu in amate kungah, “Ka hun tung nai lo hi, hizongle no hun ahile a lemtang zing hi.

⁷Leitung in note ang muda thei sih vangin kei ei muda hi, azieh pen a silbawlte hoi lo hi, ci-a teci ka pan zieh ahi hi.

⁸No mama in tua pawi va sim ta un. Keima’ hun tungkim nai lo ahi ziehin tua pawi kang sim nai sih ding hi,” a ci hi.

⁹Tami thu a genzaw ciengin Galilee gamah a tamsuoh hi.

¹⁰Ahi vangin pawi sim dingin a sanggamte a pei zaw ciengin ama zong mipi thei loin a va hawdap ta hi.

¹¹Pawi sungah Jew mite in, “Jesu hei-a om ahei?” ci-in dongin a sui uhi.

¹²Tuaci’n mihonpi lahah ama’ thu tawh kisai kimawsietna lienpi a om hi. Mi pawlkhatte in, “Ama mihoi khat ahi hi,” a ci vua, adangte in, “Hi lo hi, ama pen mipite sol ahi bo hi,” a ci uhi.

¹³Ahi vangin amate in Jew mite a giin ziehun koima in a langtangin a gen ngam sih uhi.

¹⁴Pawi bawl a kimsuhin biehinnpi sungah Jesu pei to-in thuhil ding a kipan hi.

¹⁵Jew mite in, “Tami pa in sinna bangma a nei ngai lopi, tam bang theina a bangci nei thei son adiei?” ci-in lamdang a sa uhi.

¹⁶Tua ciengin Jesu in, “Ka thuhilte keima-a’ ahi sih a, keima ei sawlpa-a’ ahi zaw hi.

¹⁷Pasien’ deina bang sem dinga a khensat poma in tua thuhilna pen Pasien kung pan amah, ahi sihle keima’ thu beh gen ka hei, ci a thei ding hi.

¹⁸Amau’ thu a gente pen amau’ minthan nading beh sui ahi uhi; ahi vangin a sawlpa’ minthan nading a sui mite pen mi thuman ahi vua, amate sungah zuouthu om lo hi.

¹⁹Moses in note thukham hing pie zo hi lo amah? Hizongle khat mama in zong tua thukham na zui sih uhi. Bang dinga kei tha nading hun lemtang na sui uh ahei?” a ci hi.

²⁰Mihonpite in, “Nang dawivei na hi hi! Tha dinga ang sui koi ahiei?” ci-in a dawng uhi.

²¹Jesu in amate kungah, “Na khat ka bawl a, na unpi-un lamdang na sa uhi.

²²Moses in teptan ding thu note ang pie a, (a tahtahin tam pen Moses’ pat hi loin pupite’ pat ahi zaw hi), note in sabbath ni-in mi khat’ tep na tanpieh uhi.

²³Moses’ thukham a kipalsat lo nadingin sabbath ni-in mi khat’ tep kitan thei ahileh sabbath ni-in mi khat’ pumpi ka damsah ziehin bang dingin kei tungah lungthah na hi uh ahei?

²⁴A putham muna tawh thukhen sih unlen, a thukhenna man tawh thu na khen un,” a ci hi.

²⁵Tu-in Jerusalem mi pawlkhat in, “Tha dinga a suisui pa uh tampa hi lo amah?

²⁶Ama tanah om a, mipi zahin thu gen napi ama kungah bangma a gen ngam sih uhi! Tampa Messiah[34] ahi hi, ci-in thunei vaihawmte in a thei tahtah ding vuoi mah?

²⁷Hinanle eite in tam mipa hei pana ang kipan ahei, ci i thei uhi; ahi vangin Messiah[35] ang pei ciengin ama hei pana hing pei ci koima in thei lo ding hi,” a ci uhi.

²⁸Tua ciengin biehinnpi sungah thu a hil kawmin Jesu kiko a, “Note in kei nei thei vua, kei hei pana hing pei ci zong na thei uhi. Keima thu tawh ang pei ka hi sih hi. Keima ei sawlpa thudih a, ahi vangin note in ama na thei sih uhi.

²⁹Ama in keima ei sawl a, ama kung pana ang pei ka hi ziehin ama ka thei hi,” a ci hi.

³⁰Tua ciengin ama mat ding a hanciem vua, ahi vangin a hun a tun nai lo ziehin koima in ama tungah khut a nga sih uhi.

³¹Hinanle mihon lahah mi tampite in ama a um vua, “Messiah[36] ang pei ciengin tampa sangin na lamdang a tamzaw ang lah diei izaw?” a ci uhi.

³²Ama tungtang mipite phunna Pharisee-te in a za vua, tuale siempu liente le Pharisee-te in ama man dingin biehinncing palihte a sawl uhi.

³³Tua ciengin Jesu in, “Note tawh bakhat sung beh ka om ding a, tua ciengin keima ei sawlpa kungah ka pei ding hi.

³⁴Keima nei suisui vangun nei mu sih ding uhi; ka opna ah nang pei thei sih ding uhi,” a ci hi.

³⁵Jew mite in, “Eite in ama i mu zawh lo nadingin hei sung pei sawm adiei? Greek-te lahah a Kithethangte kungah va pei-in Greek-te’ thu va hil sawm adiei?

³⁶‘Note in nei sui ding vua, nei mu sih ding uhi,’ a ci thu le, ‘Ka opna ah nang pei thei sih ding uhi,’ a ci pen bang a ci nopna adiei?” ci-in khatlekhat a kiho uhi.

³⁷Pawi ven ni le a ni thupi ni-in, tua sungah Jesu a din laitahin ama kiko a, “A dangta khatpo ka kungah hing pei-in,

³⁸kei ei um poma in hing kidawn taheh. Lai Siengtho in a gen bangin, ‘Thu-um pa’ lungtang[37] panin hinna guntui a luong ding hi,’ ci hi,” a ci hi.

³⁹Tu-in ama in tam bang a ci ciengin ama a um mite in a nga ding uh Hlagau thu gen ahi hi; azieh pen Jesu kipatawi nai lo ahi ziehin Hlagau[38] a om nai sih hi.

⁴⁰Amate in tam thute a zah ciengun mipite lahah pawlkhat in, “Tampa pen kamsang tahtah ahi hi,” a ci uhi.

⁴¹Adangte in, “Tampa pen Messiah[39] ahi hi,” a ci uhi. Hizongle pawlkhat in, “Galilee gam panin Messiah[40] ang pieng tahtah mawh ding amah?

⁴²Lai Siengtho in Messiah[41] pen David’ suon ahi a, David’ tenna Bethlehem khuo pana ang pieng ahi hi, ci hi lo amah?” a ci uhi.

⁴³Tuaci’n ama ziehin mipite lahah kikhenna a om hi.

⁴⁴Amate lahah mi pawlkhat in ama a mat nuom vangun koima in ama tungah a khut uh a nga sih uhi.

⁴⁵Tua ciengin, “Ama bang dinga nang mat lo uh ahei?” ci-in a na dong siempu liente le Pharisee-te kungah biehinncing palihte a kilekia uhi.

⁴⁶Palihte in, “Tampa gen bangin koima in gen ngai nai lo hi!” ci-in a dawng uhi.

⁴⁷Tua ciengin Pharisee-te in, “No zong ang kisol zo ta hi lo amah?

⁴⁸Thunei vaihawmte ahi sihle Pharisee-te lahah ama a um mi khat beh a om ta amah?

⁴⁹Thukham a thei lo tam mihonpite samsiet thuoh ahi uhi,” a ci hi.

⁵⁰Amate lahah Jesu kunga a haw ngai Nicodemus in,

⁵¹“Amate in bang teng sem ci kan masa lopi-in i thukham in mite thu a khen ngai ngel amah?” a ci hi.

⁵²Amate in, “Nang zong Galilee mi hi lo na mah? Galilee panin kamsang koima pieng ngai lo hi, ci thu kan lacin na thei ding hi,” ci-in a dawng uhi. [

⁵³Tua ciengin amate a unpi-un a inn ciet vuah a pei uhi.