Read Zou JOHN 8 Bible Online

JOHN 8 - Zou bible

JOHN 8

¹* Tua laitahin Olive Muol tungah Jesu a pei to hi.

²Zingmawng khuova patin biehinnpi ah ama a peikia hi. Ama kungah mi zosie a pei vua, tuale ama to-in thu hil a kipan hi.

³Thukham theite le Pharisee-te in a angkawm laitaha a kiman numei khat peipi-in amate zosie mai-ah a dingsah uhi.

⁴Amate in Jesu kungah, “Sie aw, tam numei nu a angkawm laitaha kiman ahi hi.

⁵Thukham laibu sungah Moses in tam bangte suong tawh selia dingin thu a pie hi. Nang in bang na gen diei?” a ci uhi.

⁶Tami thu pen ama tungah mawmatna pawlkhat a nei thei nadingun ama zelah nadinga a gen uh ahi hi. Jesu zong kunsuhin a khutme tawh tuolah lai a giel hi.

⁷Amate in a dawh teitei ciengun Jesu dingtang to-in amate kungah, “Note lahah maw nei lo khat pen in suong tawh ama sep masa heh,” a ci hi.

⁸Ama khatvei kunsuh kia-in a khutme tawh tuolah lai a gielkia hi.[42]

⁹Tua thu a zah bepun a tapen panin khat khatin a gelmang uhi. Jesu le a mai-a ding numei nu beh a omlai hi.

¹⁰Jesu dingtang to-in ama kungah, “Numei aw, amate hei sieng ta uh ahei? Khat beh in ang mawmat sih amah?” a ci hi.

¹¹Tua nu in, “Siepa,[43] koima in ei mawmat sih,” a ci hi. Tuale Jesu in, “Ke’n zong kang mawmat sih hi. Pei inlen mawna bawlkia nawn sin,” a ci hi.][44]

¹²Khatvei Jesu in amate kungah, “Keima leitung khuovah ka hi hi. Ka nua ei zui poma khuomiel ah pei loin hinna khuovah a nei ding uhi,” a ci hi.

¹³Tua ciengin Pharisee-te in ama kungah, “Nangma’ thu nangma in teci na pang hi; na teci panna man lo hi,” a ci uhi.

¹⁴Jesu in, “Keima’ thu keima in teci ka pan vangin ka teci panna pen a man ahi hi, bangzieh ahei cile kei hei panin hing pei-in hei lam zuon ding ka hei, ci ka thei a, ahi vangin note in kei hei pan hing pei-in hei lam zuon ding ka hei, ci na thei sih uhi.

¹⁵Note in mihing dan[45] tawh thu na khen uhi; ke’n koima thu ka khen sih hi.

¹⁶Khen tama leng zong, ka thukhenna a man ahi hi; azieh pen thukhen kei beh hi loin keima le ei sawl Pa[46] tawh ka hi uhi.

¹⁷Na thukham sung vuah mi ni’ teci panna a man ahi hi, ci-in kigiel hi.

¹⁸Keima’ thu keima in teci ka pang a, keima ei sawlpa ahi Pa in zong keima tangin teci a pang hi,” a ci hi.

¹⁹Tua ciengin amate in, “Na Pa hei-a om ahei?” a ci uhi. Jesu in, “Note in kei nei thei sih vua, ka Pa zong na thei sih uhi. Note in kei ei thei hi locin ka Pa zong na thei ding uhi,” ci-in a dawng hi.

²⁰Tam thu teng pen biehinnpi sumkholna innkhan sunga ama in thu a hil laitaha a gen ahi a, ahi vangin ama hun tung nai lo ahi ziehin koima in ama man lo hi.

²¹Jesu in khatvei amate kungah, “Kei a peikhie ding ka hi ta a, note in kei nei sui ding vua, hizongle na mawna sung vuah na si ding uhi. Ka peina-ah note nang pei thei sih ding uhi,” a ci hi.

²²Tua ciengin Jew mite in, “Ka peina ah nang pei thei sih ding uhi, ci ahi ziehin ama le ama a kithat ding khat ahi ta diei?” a ci uhi.

²³Ama in a kung vuah, “Note pen nei lam pan na hi vua, kei pen tunglam pan ka hi hi; note pen tam leitung mi na hi vua, kei pen tam leitung pan ka hi sih hi.

²⁴Ke’n kang ci-in na mawnate ziehun note na si ding uhi, azieh pen note in kei ama[47] kici pa ka hi lam nei up sih uleh na mawnate uh ziehin na si ding uhi,” a ci hi.

²⁵Amate in ama kungah, “Nang koi na hei?” a ci uhi. Jesu in amate kungah, “A cil a patin na kung vua kang gensa bang ka hi hi.

²⁶Note tungah gen ding thu le mawsah nading thu tampi ka nei hi; ahi vangin kei ei sawlpa thuman a, keima in ama tung panin ka zah tam thute beh leitungah kang gen hi,” a ci hi.

²⁷Ama in Pa’ thu a gengen ahi lamtah amate in a tel sih uhi.

²⁸Tuaci’n Jesu in, “Mihing Tapa na khaito zaw ciengun kei ama ka hi lamtah nei thei ding vua, tuale keima in ka thu tawh bangma bawl loin Pa ei hil banga thugen ka hi lam note in nei thei ding uhi.

²⁹Keima ei sawlpa keima tawh a om hi; ama in kei guoh ei nuasie ngai lo hi, azieh pen ama’ lungkimna bangin ka gamta zing hi,” a ci hi.

³⁰Ama in tua bangin a gen ciengin mi tampi in ama a um uhi.

³¹Tua ciengin Jesu in ama a um Jew mite kungah, “Ka thute nei zui peisuoh uleh ka nuazui tahtah na hi uhi;

³²tuale note in thuman thutah zong na thei ding vua, tua thuman thutah in note ang suohtasah ding hi,” a ci hi.

³³Amate in, “Kote Abraham suonlehlahte ka hi vua, koima sila-in ka om ngai sih uhi. ‘Note ang kisuohtasah ding hi,’ bang dinga na ci thei ahei?” a ci uhi.

³⁴Jesu in amate kungah, “A tahtah a kang ci-in, mawna a bawl zosie mawna’ sila ahi uhi.

³⁵Sila in inn sungah munkip a nei sih hi; tapa in tua sungah kumtawn ading mun a nei hi.

³⁶Tuaci’n Tapa in ang suotatsah leh suohta tahtahte na hi ding uhi.

³⁷Keima in Abraham suonlehlahte na hi lam uh ka thei hi; hizongle ka thu in na sung vuah mun nga lo ahi ziehin note in kei tha nading hun lemtang na sui uhi.

³⁸Keima in Pa opna munah ka musate kang gen a, note in Pa kung pana na zahte uh na sep ding uh ahi hi,” a ci hi.

³⁹Amate in ama kungah, “Abraham ka pa uh ahi hi,” a ci uhi. Jesu in, “Abraham’ tate na hi uleh Abraham’ septe na sem ding uhi.

⁴⁰Ahi vangin tu-in Pasien kung pana ka zah thuman a gen pa kei lah nei tha sawm vanuh uhi. Tam pen Abraham bawl dan ahi sih hi.

⁴¹Note na hi ule na pa uh’ sep banga a sem tahtah na hi uhi,” a ci hi. Amate in, “Ko zawlta ka hi sih uhi; kote in Pasien mama ahi Pa khat beh ka nei uhi,” a ci uhi.

⁴²Jesu in amate kungah, “Pasien na Pa uh ahileh kei nei it ding uhi; bangzieh ahei cile kei pen Pasien kung pana ang pei ka hi a, tu-in tanah ka om hi. Keima’ thu-a ang peitawm ka hi sih a, ama’ ei sawl ka hi bo hi.

⁴³Bang dinga ka thugen na tel thei lo uh ahei? Azieh pen ka thu na ngai nop lo zieh uh ahi hi.

⁴⁴No pen na pa uh dawimangpa kung pana ang pei na hi vua, na pa uh’ deina banga bawl ding na teel uhi. Ama pen a cil a patin mithat pa ahi a, ama sungah thuman thutah a op lo ziehin thuman thutah a tukip sih hi. Ama in zuouthu a gen ciengin ama’ pienzie tawh kituohin a gen hi, bangzieh ahei cile ama zuou gen pa le mizuou theite’ pa ahi hi.

⁴⁵Ahi vangin note in thuman ka gen ziehin nei um sih uhi.

⁴⁶Note lahah koi in kei nei mawmat uh ahei? Thuman thutah gen ka hi leh bang dinga nei up lo uh ahei?

⁴⁷Pasien kung pana pei poma in Pasien’ gente a za hi. Note in na zah lona uh a hang pen Pasien kung pan na hi lo zieh uh ahi hi,” a ci hi.

⁴⁸Jew mite in ama kungah, “Nang Samaria-te na hi a, dawivei na hi hi, kang ci uh a man hi lo amah?” ci-in a dawng uhi.

⁴⁹Jesu in, “Kei dawivei ka hi sih hi; keima in ka Pa ka zatah a, ahi vangin note in kei nei zatah sih uhi.

⁵⁰Hizongle keima guoh’ minthan nading ka sui sih hi; ka minthan nading a sui khat om a, tuapa khu thukhen ding pa ahi hi.

⁵¹A tahtah a kang ci-in, “Mi khatpo in ka thu a zui leh sina a mu ngai sih ding hi,” ci-in a dawng hi.

⁵²Jew mite in ama kungah, “Nang dawivei na hi lamtah tu-in kang thei uhi. Abraham lah si zo a, tua ma bangin kamsang teng zong a si zo uhi; hizongle tu-in nang in, ‘Mi khatpo in ka thu a zui leh sina a ciem kha ngai sih ding hi,’ na ci hi.

⁵³Tuale a sisa ka pa uh Abraham sanga lienzaw-a kigen na hi amah? Kamsang teng zong si sieng zo uhi. Nang koi-a kigen na hiei?” a ci uhi.

⁵⁴Jesu in, “Kei le kei ka kiminthansah leh tua ka minthanna pen a mawhna a suoh ding hi. Keima ei minthangsah pa pen, ‘Ama ka Pasien ahi hi,’ na ci uh ka Pa ahi hi.

⁵⁵Note in ama na thei sih vua, ahi vangin ke’n ama ka thei hi; ama ka thei sih hi, ci leng note bangin mizuou ka hi ta ding hi. Ahi vangin ke’n ama ka thei a, a thu zong ka mang hi.

⁵⁶Na pa uh Abraham in keima’ hun a mu ding a kipah mama hi; tuale ama in mu-in a lungdam mama hi,” ci-in a dawng hi.

⁵⁷Tua ciengin Jew mite in ama kungah, “Kum sawm nga zong na phah nai lopi Abraham na mu ta ngel amah?”[48] a ci uhi.

⁵⁸Jesu in amate kungah, “A tahtah a kang ci-in, Abraham pien masangin keima ka om zo ta hi,” a ci hi.

⁵⁹Tuaci’n amate in a se nading uh suong a tung vua, ahi vangin Jesu kiphuolin biehinnpi panin a gelmang hi.