Read Zou JOHN 9 Bible Online

JOHN 9 - Zou bible

JOHN 9

¹Lampi-ah Jesu a pei laitahin a pienpi mittaw mipa khat a mu hi.

²A nuazuite in ama kungah, “Sie aw, tampa mittaw sa-a ang pienna pen koi pen’ mawna zieh ahi diei? Ama mawna zieh ahi diei? Ahi sihle a nu a pate’ mawna zieh a hizaw diei?” ci-in a dong uhi.

³Jesu in, “Ama’ mawhna zieh ahi sih a, a nu a pate’ mawna zieh zong ahi sih hi; ama tungah Pasien’ nasepna a kilah thei nadingin a suo-a kipanin a mittaw sa-a ang suoh ahi zaw hi.

⁴Ni a op sungin kei[49] ei sawlpa’ na i[50] sem ding hi; koima in na a sep thei lo zan hun ang tung ding hi.

⁵Leitunga ka om laisie kei pen leitung khuovah ka hi hi,” a ci hi.

⁶Tami thu a gen kawmin tuolah a cil sie a, cil tawh buon a meh zaw ciengin a mit buon nupiehin,

⁷“Pei inlen Siloam buolah na mai va phiet ta’n,” ci-in a sawl hi. (Siloam kici pen Sawl a cina ahi hi.) Tua ciengin ama pei-in a mai phiet a, khuo mu theisa-in a kinuale kia hi.

⁸Nidang lai-in khudaw ngen banga a oplai a mu a vengte le ama a mungaite in, “Khutdaw ngen a na to let pa khu tampa hi lo amah?” a ci uhi.

⁹Pawlkhat in, “Ama ahi hi,” a ci uhi. Adangte in, “Ama hi laizang sih, a kisutpi khat hi bo,” a ci uhi. Ama in, “Kei tuapa ka hi hi,” a ci hi.

¹⁰Ahi vangin amate in ama kungah, “Tua ahile na mit bang ang ci vah theikia ahiei” ci-in a dong uhi.

¹¹Ama in, “Jesu kici mi khat in buon mehin ka mit ang nu zaw ciengin Siloam buolah pei inlen na mai va phiet ta’n, ei ci bangin kei zong pei-in ka phiet leh khuo mu theikia ka hi hi,” ci-in a dawng hi.

¹²Amate in ama kungah, “Tua pa hei-a om ahiei?” a ci uhi. Ama in, “Thei sing,” a ci hi.

¹³Amate in Pharisee-te kungah tua mittaw pa a peipi uhi.

¹⁴Jesu in ama buon nu-in a mit a vahsah ni pen Sabbath ni ahi hi.

¹⁵Tua ciengin Pharisee-te in zong tua pa kungah a mit khuomu dan a dongkia uhi. Ama in, “Tua mipa in ka mit buon ei nupiehin ka mai ka phiet leh khuo mu theikia ka hi hi,” a ci hi.

¹⁶Pharisee-te pawlkhat in, “Tam mipa in Sabbath ni tang lo ahi ziehin Pasien kung pan hi lo ding hi,” a ci uhi. Ahi vangin adangte in, “Mawnei mi khat in tam bang lim lamdangte bangci bawl thei ding ahei?” a ci uhi. Tuale amate lahah kikhenna a om hi.

¹⁷Tuaci’n amate in mittaw pa kungah, “Tua pa in na mit hing vahsah ci lei nang in ama koi hi va na ci ei?” ci-in a dongkia uhi. Ama in, “Kamsang khat hi,” ci-in a dawng hi.

¹⁸Jew mite in ama mittaw ngai-in khuo a mu thei lam mit khuomu pa’ nu le pate a hlat masangsie a tahsang thei sih uhi.

¹⁹Tuale amate kungah, “Pienpi mittaw na ci uh na tapa uh tam pa ma ahi amah? Tua ahile bangci dan a tu-a khuo a mu theikia ahei?” ci-in a dong uhi.

²⁰A nu le a pate in, “Tam pa pen ka tapa uh ahi a, kote in pienpi mittaw ahi lam ka thei uhi;

²¹ahi vangin bangci danin tu-in khuo mu thei a, koi in a mit a vahsah ahei, ci ka thei sih uhi. Ama kidawh un; ama zong mi khangcingsa ahi ziehin ama’ thu ama in ang gen na ding hi,” ci-in a dawng uhi.

²²A nu a pate in Jew mite a giin ziehun tam banga a gen uh ahi hi; azieh pen mi khatpo Messiah[51] danin a kigen leh Jew mite kikhopna inn panin kinotmang ding hi, ci-in thukimna a neisa uh ahi hi.

²³Tua ahi ziehin a nu le a pate in, “Ama a khangcingsa hi, ama kidawh un,” a na ci uh ahi hi.

²⁴Tuaci’n amate in a niveina mittaw pa hlankia-in ama kungah, “Pasien phat in! Kote in tam pa pen mawnei mi khat ahi lam ka thei uhi,” a ci uhi.

²⁵Ama in, “Mawnei mi ahile ahi lo ka thei kha sih hi. Mittaw ka hi a, tu-in khuo ka mu ta hi, ci thu khat beh ka thei hi,” ci-in a dawng hi.

²⁶Amate in ama kungah, “Ama in nang tungah bang ang bawl ei? Na mit bang ang ci vahsah ei?” ci-in a dongkia uhi.

²⁷Ama in, “Kang gen zo ta a, note in na ngai nuom sih uhi. Bang dinga na zah nuom sawnsawn uh ahei? Note zong ama’ nuazui suoh nuom na hi ta uh amah?” ci-in a dawng hi.

²⁸Tua ciengin amate in ama kungah, “Nang ama’ nuazui na hi a, ko ka hi ule Moses’ nuazuite ka hi uhi.

²⁹Pasien in Moses a hopi lam kote in ka thei vua, ahi vangin tam pa hei sung pana ang pei ahei, ci ka thei sih uhi,” ci-in a engho uhi.

³⁰Tua mipa in, “Ama in ka mit ei vahsah ta ngiangua a, note in lah ama hei sung pana ang pei ci na thei lo uh lamdang sam ei izaw!

³¹Pasien in mawnei mite’ thu ngai loin, ama bie-in ama’ deina banga a gamta mite’ thu a ngaipieh hi, ci i thei uhi.

³²Lei piencil a kipanin pienpi mittaw a damsah koima kiza ngai nai lo hi.

³³Pasien kung pana ang pei hi sihle ama in bangma bawl thei lo ding hi,” ci-in a dawng hi.

³⁴Amate in, “Mawna bulomtang lah pana suoh hi napicin bang dinga thu ei hil sawm meumo na hei?” a ci uhi. Tuale amate in tua pa a notmang uhi.

³⁵Tua mittaw pa a nawmang dawh uh Jesu in za a, ama in tua pa a mu ciengin, “Mihing Tapa[52] na um ei mah?” a ci hi.

³⁶Tua pa in, “ Siepa, ama koi ahiei? Ama ka up thei nadingin ei gen in,” a ci hi.

³⁷Jesu in ama kungah, “Ama na mu zo hi; nang ang hopi pa ahi hi,” a ci hi.

³⁸Tua pa in, “TOPA aw, ken ka um ta hi,” a ci hi. Tuale ama in tua pa a bie pai hi.

³⁹Jesu in, “Khuo mu thei lote in khuo a mu nading ule khuomu theite in a mu thei lo nadingun thukhen dinga leitunga ang pei ka hi hi,” a ci hi.

⁴⁰Ama kunga a om Pharisee pawlkhat in tam thu a zah ciengun ama kungah, “Ko zong mittaw ka hi ta uh amah?” ci-in a dong uhi.

⁴¹Jesu in, “Mittaw hi locin note in mawna na nei sih ding uhi. Ahi vangin tu-in note in, ‘Khuo ka mu uhi,’ na ci ziehun na mawna uh a omlai hi,” ci-in a dawng hi.