Read Zou SAWLTAHTE 11 Bible Online

SAWLTAHTE 11 - Zou bible

SAWLTAHTE 11

¹Tu-in Gentile-te in zong Pasien’ thu sang zo ta uhi, ci thu Judea gama om sawltahpite le thu umte[48] in a za uhi.

²Tuaci’n Jerusalem ah Peter a peito ciengin a tep kitan thu um mite[49] in,

³“Bang ziehin a tep kitan lo mite kungah tungin amate tawh an neton mawh na hei? ci-in a mawsah uhi.

⁴Tua ciengin Peter in a thu omzie teng a banbanin amate kungah sut a,

⁵“Joppa khuo ah thu ngenin ka haituh laitahin mang ka mu hi. Keima in vantung panin a ningli ciet pana a kikhaisuh a peh golpi bang khat ka kunga ang tusuh ka mu hi;

⁶tuami limtahin ka et leh keng li a nei ganhingte, sasielne gamsate, a bawhva ganhingte le vana a leng vate ka mu hi.

⁷Awging khat in, “Peter aw, tho inlen, go-in ne in,” ei ci zong ka za hi.

⁸Ahi vangin keima in, ‘TOPA, hi thei malmal sih; azieh pen a bua ahi sihle a sieng lo nate ka kam sungah a tum ngai nai vawt sih hi,’ ka ci hi.

⁹Ahi vangin tua awging ma in vantung panin a niveina ei dawng a, ‘Pasien in a sienga a bawlsate a bua hi bo ci paupau sin,’ ei ci hi.

¹⁰Tu-a bangin thumvei ang pieng a, tua ciengin tua teng zosie a unpi-in vantungah a kikaito kia hi.

¹¹Tua laitahin ka opna inn ah Caesarea pana ang kisawl mi thumte thakhatin ang tung uhi.

¹²Eite le amau’ kikalah khentuom ci nei loin amate tawh a zawhton dingin kei kungah Hlagau in ei gen zo hi. Tami i sanggam guhte in zong ei zui vua, tua mipa’ inn ah ka tung uhi.

¹³Ama in ka kung vuah a inn sunga vantungmi khat a din a mu dan le, ‘Joppa khuo-ah mi sawl inlen Peter a kici Simon hlansah in.

¹⁴Nangma le na innkuonpi bup un hutdamna na nga thei nading uh thu ang gen ding hi,’ a ci dan teng ei gen hi.

¹⁵Thu gen ka kipat laitahin eite tungah Hlagau Siengtho a tuncil lai bangin amate tungah zong ang tung hi.

¹⁶Tuale TOPA in, ‘John in tui tawh na baptize a, ahi vangin note na hi ule Hlagau Siengtho tawh ang ki-baptize ding hi,’ ci-in a gen ka phawhkia hi.

¹⁷TOPA Jesu Khris i up ciengin Pasien in letsong ei pieh bangin amate tungah zong a kibanga a pieh ahileh Pasien’ nasepna a khahtan zo dingin kei koi hi lel ka hei?” a ci hi.

¹⁸Tami thu a zah ciengun amate a dai dide uhi. “Tua ciengin Pasien in Gentile-te tung nangawn ah zong hinna nga thei nading kisiakiana thu a pie hi,” ci-in amate in Pasien a phat uhi.

¹⁹Stephen tungah bawlsietna a tun ziehin a kithethangte in Phoenicia gam, Cyprus tuikul, le Antioch dongin a banzin vua, amate in Jew mite kung simlo koima kungah thu a hil sih uhi.

²⁰Ahi vangin Antioch khuo-a pei, Cyprus tuikul le Cyrene khuo mite pawlkhat in Greek ham a zang Jew mite[50] kungah zong TOPA Jesu’ thu a tangko uhi.

²¹TOPA’ khut amate tawh om a, TOPA lamah thu um mi tampitah a kihei uhi.

²²Jerusalem-a om hlattuom pawlpite in tami thu thate a zah ciengun Antioch khuo ah Barnabas a sawl uhi.

²³Ama tungin Pasien’ hepina thupha a mu ciengin a lungdam a, tuale ama in tupna kip tawh TOPA tungah a citah nadingun amate a hanthawn hi.

²⁴Bangzieh ahei cile ama pen mi hoi, Hlagau Siengtho le upna tawh a kidim mi khat ahi ziehin TOPA sungah mi tampi a kibelap hi.

²⁵Tua ciengin Tarsus khuo ah Saul sui dingin Barnabas pei a,

²⁶tuale ama a mu ciengin Antioch khuo ah a zawpi hi. Ama gel zong kum khat sung tungtawn hlattuom pawlpi mite tawh[51] kimu-in mi tampi thu a hil uhi. “Tapidawte” ci-in a min kilo masa pente Antioch khuo-a nuazuite ahi uhi.

²⁷Tua hunin Jerusalem panin Antioch ah kamsangte a peisuh uhi.

²⁸Amate sung panin Agabus a kici mipa khat dingto-in, leitung gam zosie-ah a siehuoi kielpi khat tung ding hi, ci-in Hlagau tungtawnin a magen hi; tuale Claudias hun lai-in tuami thu tung ngai zo hi.

²⁹Nuazuite in ahi zaw za ciet utawh Judea gama teng thu um mite[52] huna sum hlah dingin a khensat uhi.

³⁰Amate in tua bangin a bawl vua, Barnabas le Saul tung panin upate kungah a hlah uhi.