Read Zou SAWLTAHTE 15 Bible Online

SAWLTAHTE 15 - Zou bible

SAWLTAHTE 15

¹Tua ciengin Judea gam panin mi pawlkhat a hawsuh vua, “Moses’ ngaina tawh kizui-in na tep uh na tan sih uleh note in hutdamna na nga thei sih ding uhi,” ci-in amate in sanggamte thu a hil uhi.

²Paul le Barnabas in amate tawh nahpitahin kinielna le kiselna a nei zaw ciengun, tam thudawhna tawh kisai-in sawltahpite le upate tawh Jerusalem ah peito-in thu kikum dingin Paul, Barnabas, le adang pawlkhat kise hi.

³Tuaci’n hlattuom pawlpi in lampi-ah amate a va hla ta vua, Phoenicia gam le Samaria gam a kantan kawmun Gentile-te a kikhelna uh thu a zasah vua, tuaci’n amate in thu um[70] mi zosie a nuomsah mama uhi.

⁴Jerusalem a tun ciengun hlattuom pawlpi mite, sawltahpite, le upate in amate a na dawn vua, amate tung tawnin Pasien’ nasepna zosie a zasah uhi.

⁵Ahi vangin Pharisee pawlte sung panin thu um mi pawlkhat ding to-in, “Amate in Moses’ thukham zui-in a tep uh a tan nadingun thu i pieh uh kul hi,” a ci uhi.

⁶Tami thu a lungngai dingin sawltahpite le upate a kikhawm uhi.

⁷Sawtveipi a kisel zaw ciengun Peter zong dingto a, “Sanggamte aw, kei tung panin Gentile-te in lungdamna thu za-in thu um mi a suo thei nadingun sawtveipi lai panin note lahah Pasien in kei ei teelna thu na thei uhi.

⁸Mihingte’ lungtang sung a thei Pasien in eite tunga ei pieh bang lienin amate tungah zong Hlagau Siengtho a piehna tawh teci a pang zo hi.

⁹Amate le eite kikalah khentuom nei loin upna tawh amau’ lungsim a siengthosah hi.

¹⁰Tua ahi ziehin nuazuite ngawngah i pu i pate le eite in i puoh zawh lo uh hahkol suonin bang dingin Pasien ze-et ding i hi ahei?

¹¹Tua bang ding ahi sih hi. TOPA Jesu’ hepina ziehin eite ei kihundam ding hi, ci-in i up ma bangin amate zong kihundam ding hi,” a ci hi.

¹²Paul le Barnabas in ama gel tungtawnin Pasien in Gentile-te lahah lim le na lamdang a bawlsa zosie a gen laitahun a kikhawm mihon vannuoi in sip dide-in a ngai uhi.

¹³A thugen uh a man zaw ciengin James in, “Sanggamte aw, ka thugen na ngai un.

¹⁴Pasien in a min adingin amate sung panin kimkhat a teelkhiet nadingin, a masa-in bangci bangin Gentile-te tungah maipha pie ahei ci thute Simeon in ang gen zo ta hi.

¹⁵Kamsangte’ thugente tam tawh kituoh hi.

¹⁶‘Tua zaw ciengin kang peikia ding a, a puasa David’ tenna inn ka lam kia ding hi; a kisiesate panin ka lamkia ding a, ka tungding kia ding hi,

¹⁷tuaci’n midangte le ka mina kihlan Gentile-te zosie nangawn in TOPA a sui ding uhi,

¹⁸ci-in tanglai peh panin tam thute ei theisah TOPA in a gen hi,’ ci-in kigiel hi.

¹⁹Tua ahi ziehin kote in Pasien lamah ang kihei Gentile-te suhbuoi lo zawh ding khensatna ka nei vua,

²⁰tuale mahin amate in milim biehna, numei-pasal pahtatna, lawlmeh sa popo le sisan nehnate panin amate a kibuasah lo nadingun lai hlahzaw leih pha ka sa hi.

²¹Bangzieh ahei cile sabbath nisielin kikhopna innte-ah Moses’ thukhamte ma a gingin kisim ngitnget a, tanglai peh panin zong khuo cin tengah ama’ thugente ma hil penin kinei hi,” a ci hi.

²²Tua ciengin sawltahpite, upate le hlattuom pawlpi buppi in amate sung panin mi pawlkhat teelin Antioch khuo ah Paul le Barnabas peitonsah dingin a khensat uhi. Amate in sanggamte lahah makai ahi Barsabbas a kici Judas le Silas a sawl vua,

²³tam bangin lai gielin a puosah uhi: “Sanggamte aw, sawltahpite le upate in Antioch khuo-a kipanin Syria gam le Cylicia gama om Gentile mi-a pieng thu um mite[71] kang hopi uhi.

²⁴Ko sawl lopi-in ko kung panin mi pawlkhat a piekhie vua, no buoi nading thute genin na lungsim uh[72] ang amsah zo uhi, ci thu ka na za uhi.

²⁵Kote in na kung vua kang sawl ding uh tangmite[73] ka teel vua, tuale Barnabas le Paul tawh ang zawhton dingin lungkimtahin ka khensat zo ta uhi.

²⁶Ama gel pen i TOPA Jesu Khris’ min ziehin a hinna uh a pie ngamte ahi uhi.

²⁷Tua ahi ziehin amate mama in a kam utawh tam thute ma ang gen dingin Judas le Silas kang sawl uhi.

²⁸Azieh pen kote in tam thupoimawte sanga a gihzaw vangih dang note tunga kang guonbe lo nading uh, Hlagau Siengtho le kote in hoi ka sa uhi.

²⁹Tua a kisam thute in: Milim kithoina ante, sisan, a kilawlmeh sa,[74] le numei-pasal pahtatnate na tan ding uh ahi hi. Tam teng na tan zawh nah po uleh note adingin hoikhop ta lel hi. Na damta un,” ci-in lai a hlah uhi.

³⁰Tuaci’n amate sawlin Antioch khuo ah a peisuh uhi. Amate in mipi a kaikhop zaw ciengun tua laihlah a pie uhi.

³¹Pawlpi mite in laihlah a sim ciengun hanthawtnate ziehin amate lungdam mama uhi.

³²Amate mama zong kamsang ahi Judas le Silas-te in thu tampitah a gen vua, thu um[75] mite hanthawnin a thakhausah uhi.

³³Tua tahah amate bakhat sung a tam zaw ciengun thu um mite[76] in amate a sawlkhie mite kungah lungnuom tahin a peisahkia uhi.

³⁴Hinanle tua munah Silas a tam lai ding hoi a sa uhi.[77]

³⁵Ahi vangin Antioch khuo ah Paul le Barnabas-te a tam vua, amate in midang tampite tungah TOPA’ thu a tangko uhi.

³⁶Ni phabep khat zaw ciengin Paul in Barnabas kungah, “Hing pei in, peikia vai-in, TOPA’ thu i hilnasa khuopi zosie-a om thu um mite[78] kungah haw-in bang a ci vuoi mah va en tavai,” a ci hi.

³⁷Barnabas in Mark kici John zawpi nuom hi.

³⁸Ahi vang in Paul in Pamphylia khuo ah amate nuasie-in a nasepna vua a zui nuom lo mipa zawpi lo dingin a khensat hi.

³⁹Kinah niel luo uh ahi ziehin a kikhenlaw vawt uhi; Barbabas in Mark a zawpi a, tembaw tawh Cyprus tuikul ah a pei uhi.

⁴⁰Hizongle Paul in Silas teel a, TOPA’ hepina sungah thu um mite[79] in ama apin a kuonkhie uhi.

⁴¹Syria gam le Cilicia gam nawhin ama pei-in hlattuom pawlpite a thakhausah hi.