Read Zou SAWLTAHTE 16 Bible Online

SAWLTAHTE 16 - Zou bible

SAWLTAHTE 16

¹Paul[80] peisuoh lai-in Derbe le Lystra khuo ah a tung a, tua munah thu um Jew mi numei khat’ tapa Timothy a kici nuazui khat a om hi; ahi vangin a pa pen Greek mi ahi hi.

²Lystra le Iconium khuo-a thu um[81] mite in ama a genpha mama uhi.

³Paul in Timothy a kithuopi nuom hi; tua mun tenga a teng Jew mite ziehin tua pa zawpi-in a tep a tanpieh hi, azieh pen amate in a pa Greek mi ahi lam a unpi-un a thei uhi.

⁴Khuopi khat pan khuopi khat zin kawikawi-in Jerusalem-a sawltahpite le upate in zui dinga khensatna a bawlsate uh amate tungah a pie uhi.

⁵Tuaci’n upna sungah hlattuom pawlpite thahatsahin nisimin thu um mimal a khang hi.

⁶Hlagau Siengtho in Asia gam sungah Pasien thu a hil ding uh phal lo ahi ziehin Phrygia le Galatia gam tengah a zin uhi.

⁷Mysia gamgi a tun uh ciengin Bithynia gam a lut sawm vangun Jesu’ Hlagau in amate a phal sih hi;

⁸tuaci’n Mysia gam nawt suohin Troas khuo ah a peisuh uhi.

⁹Zanlai-in Paul in mang khat a mu hi; tua munah Macedonia mi khat dingin, “Macedonia gamah hing galkai inlen kote ei hu in,” ci-in a thum hi.

¹⁰Ama in mang a mu zaw ciengin amate kungah lungdamna thu a tangko dingin Pasien in eite ei hlan zo hi, ci-in ngaisun ka hi ziehun Macedonia galkai ding thakhatin ka sawm pai uhi.

¹¹Troas khuo panin gunkuong tung tuongin Samothrace tuikul lam zuonin tangtahin ka pei vua, a zing ni-in Neapolis khuo tungin,

¹²tua mun panin Macedonia gamkhen[82] sunga khuo thupi pen le Rome mite tenna Philipi khuo ah ka tung uhi. Tami khuo ah ni tampi sung ka tam uhi.

¹³Sabbath ni-in khuopi tunkot pulamah ka pusuoh vua, thungetna mun hi kha ding hi, ci-a ka upmawna uh gun gei lamah ka pei uhi; tuale ka to vua, khum sunga a kikhawm numeite tawh ka kiholim uhi.

¹⁴Pasien a bie Lydia a kici numei khat in ka thugen uh a ngai hi; tua nu pen Thyatira pana puon dupsan zua ahi hi. Ama in Paul’ thugente lawp tahin a ngai thei nadingin TOPA in a lungsim a honpieh hi.

¹⁵A innkuonpite tawh a ki-baptize ciengin ama in kei kungah, “Note in kei, TOPA adingin mi muonhuoi khat a nei ngaisut uleh hing pei unlen ka inn ah hing tung ta un,” ci-in ei zawl hi.

¹⁶Nikhat, thungetna mun zuona ka pei laitahun, dawi lawm nei, mailam thugenna tawh a pute sum tampi a suipieh sila numei khat tawh ka kituoh kha uhi.

¹⁷Tua nu in Paul le ko ei zui laitahin, “Tam mite pen na kung vua hutdamna lampi ang tangko Sangpen Pasien’ silate ahi uhi,” ci-in ang kiko hi.

¹⁸Tua bangin ni tampi sung a awng den mielmuol hi. Ahi vangin Paul in tuapa seda mama a, tuale ama kihei-in tua hlagau kungah, “Tam nu sung panin na pusuo nadingin Jesu Khris’ minin thu kang pie hi,” a ci hi. Tua hun lien ma-in tua hlagau a pusuoh pai hi.

¹⁹Ahi vangin a pute in a sum mu nading uh lametna tawp zo hi, ci-in a thei bepun amate in Paul le Silas-te a man vua, tuale vanzuana mun thuneite mai-ah a kaiphit uhi.

²⁰Thukhenmangte kung a tut uh ciengin amate in, “Tam mite in i khuo sung a buoisah uhi; ama gel pen Jew mite ahi vua,

²¹tuale kote Rome mi ka hina utawh ko adingin pom ding le zui dinga kilawm lo ngainate ei hil uhi,” a ci uhi.

²²Mihonpite in ama gel a vuohpi valuoi vua, tuale thukhenmangte in zong a puon uh hawhmang piehin ciengpum tawh a sat nadingun thu a pie uhi.

²³Amate in nahpitahin a sat zaw ciengun thong sungah a khum vua, hoitaha a cin nadingin thongcing pa a vaihlah uhi.

²⁴Thongcing pa in zong tam kivaihlahnate ma bangin thonginn sungtawng penah ama gel koi-in kengkol a bul hi.

²⁵Zankim pawlin Paul le Silas in thu ngenin Pasien tungah phatna late a sa vua, tuale thongkiete in a ngai uhi.

²⁶Thakhatin zil ling a, tua zil a natsiet seng ziehin thonginn a zung dongin a lawhthing gawp hi. Thakhatin kotkhah zosie kihong a, mi zosiete’ kikhina siakhaute a kiphel sieng hi.

²⁷Thongcing pa zong khanglo-in thong kotpi zosie kihong sa-a om a mu bepin, thongkie zosie a pit sieng hi ta va, ci-in ngaisun a, tua ziehin a namsau dawhin ama le ama a kithat dingin a kisa hi.

²⁸Ahi vangin Paul in, “Nang le nang bangma kilaw sin, azieh pen tanah ka unpi-un ka om uhi,” ci-in a aw neiza tawh a kiko hi.

²⁹Thongcing pa[83] in meivah ngenin thong sung a nawlut pai a, Paul le Silas-te mai-ah a citunsa-in a khupbawh hi.

³⁰Tua ciengin ama gel a pusuopi a, tuale ama in, “Siete aw, hutdamna ka nga nadingin bang bawl ding ka hei?” a ci hi.

³¹Ama gel in, “TOPA Jesu um in, tua hile nang le na innkuonpite in hutdamna na nga ding uhi,” ci-in a dawng uhi.

³²Ama gel in tua pa kung le a inn sunga om mi zosie kungah TOPA’ thu[84] a hil uhi.

³³Khum zan tua hun lien ma-in tua pa in ama gel peipi-in a maliemte uh a sawp siengpieh hi; tua ciengin ama le a innkuonpite zosie a ki-baptize pai uhi.

³⁴A inn ah ama gel peipi-in a mai vuah ankuong zong a lui hi; tuale ama pen Pasien sunga thu um mi khat hi ta ahi ziehin ama le a innkuon buppi a lungdam uhi.

³⁵Zingmawng ciengin thukhenmangte in palih khat sawlin, “Tua mite hlakhie ta un,” a ci hi.

³⁶Thongcing pa in Paul kungah thu puoh a, “Thukhenmangte in no gel hla nadingin kam ei kivaihlah zo hi; tua ziehin tu-in pusuoh unlen lungnuom tahin pei ta un,” a ci hi.

³⁷Ahi vangin Paul in, “Amate in Rome gammi ahi kote, mawsahna thu om lopi-in mizapi mai-ah ei satin thong ei khie uhi; tu-in zong koima’ thei lo-in ei dap hla sawm uh amah? Hi thei lo ding hi! Amate mama hing pei-in ei hla uheh,” ci-in a dawngkia hi.

³⁸Palihte in thukhenmangte kungah tam thute a ko vua, amate Rome gammi ahi uh a zah bepun a zau mama uhi.

³⁹Tuaci’n ama gel kungah amate pei-in a va thum ta vua, thong panin ama gel la dawhin khuopi a nuasie nadingun a zawl uhi.

⁴⁰Thong panin a peikhiet zaw ciengun Lydia inn ah a haw uhi; sanggam pasal le sanggam numeite[85] tawh tua munah kimu-in a hanthot zaw cieng gelin tua panin a dingkhie uhi.