Read Zou SAWLTAHTE 2 Bible Online

SAWLTAHTE 2 - Zou bible

SAWLTAHTE 2

¹Pentecost ni a tun ciengin mun khatah amate a unpi-un a omton uhi.

²Tuale vantung panin thakhatin huipi lang tawh kibang aw khat ging a, a tona uh innsung teng zosie a dim hi.

³Amate lahah meikuong kikhenkeh tawh a kibang leiite kilangin a tung ciet vuah a tu hi.

⁴Amate a unpi-un Hlagau Siengtho tawh a kidim vua, tua Hlagau in a pieh siemna bangin kam tuomtuomte tawh a ham uhi.

⁵Khum laitahin vansin nei-a om gam zosie panin Jerusalem ah Pasien a um Jew mite a teng uhi.

⁶Khumi awging ziehin mihonpi a kikhawm vua, thu kigente amau’ pienpi ham cietin a zah ziehun lamdang a sa uhi.

⁷Amate in tam thu lamdang sa-in a lung uh mang a, “Tu-a thugen zosie Galilee mi ahi sih uh amah?

⁸Bangci dan a i pienpi ham ciet tawh i zah thei uh ahei?

⁹Parthia gam, Media gam, Elam gam, Mesopotamia gama tengte, Judea gam, Cappadocia gam, Pontus gam le Asia gam,

¹⁰Phrygia gam, Pamphylia gam, Egypt gam le Cyrene khuopi-a’ ahi Libya gamkhen sunga tengte le Rome pana a haw mite, Jew mite, le Judah biehna a zuite,

¹¹Crete mite le Arab mite ahi, Pasien’ nasep lienpite i pienpi ham cietin i za uhi,” a ci uhi.

¹²Mi zosie in lamdang sa-in a lungmang vua, “Tami bang a cinopna hi poma ding ahei?” ci-in khatlekhat a kiho uhi.

¹³Ahi vangin pawlkhat in, “Lenggazu tha kham ahi uhi,” ci-in a ehneh ho uhi.

¹⁴Ahi vangin sawm le khatte tawh Peter dingto a, a aw sangsahin amate kungah, “Jew mite le Jerusalem khuo-a tengte aw, tami thu thei unlen ka thugen na ngai un.

¹⁵Na upmaw bangun zukham ahi sih uhi, bang ding ahei cile tuhun pen zingmawng nai kuo ahi na bo hi.

¹⁶Hi vawt lo hi, tam pen kamsangpa Joel tungtawnin tam bangin na kigen hi:

¹⁷‘Pasien in a genna ah ni tawp ni ciengin mi zosie tungah ka Hlagau ka buo ding a, na tapate ule na tanute un kamsangin, na tangvalte un mang mu ding a, na puvuoite un zong mang a man ding uhi.

¹⁸Hi hi, khum ni ciengin ka sila pasalte le ka sila numeite tungah ka Hlagau ka buo ding a, amate in kam a sang ding uhi.

¹⁹Tunglam vanah a lamdangte ka lah ding a, neilam leitungah limte, sisan, meikuong le meikhu sapite ka lah ding hi.

²⁰A lien a thupi TOPA’ ni a tun masangin ni ang miel ding a, hlapi sisan ang bang ding hi.

²¹Tua ciengin TOPA’ min tawh thu ngen zosie in hutdamna a nga ding uhi,’ a ci hi.

²²“No, Israel-te aw, ka thugen ngai un: Note in na theisa ma bangun Nazareth mi Jesu pen Pasien in note lahah ama tungtawna a bawl vanglietna le na lamdangte, le limte tawh Pasien in a kipsah mi ahi hi.

²³Pasien in ama’ ngimna le a theikholna bangin note khut sungah tam pa ang piekhie a, note in singlamte tungah khai-in migilote’ khut tawh ama na that uhi.

²⁴Ahi vangin sina in ama tukip zo lo ahi ziehin Pasien in sina panin suohtasahin a thosah hi.

²⁵Bangzieh ahei cile ama tawh kisai David in a genna-ah, ‘Ka masangah TOPA a op den lam ka mu hi, azieh pen ei kilawthing thei lo na dingin ka zietlamah ama a om hi;

²⁶tua ahi ziehin ka lungsim kipahin ka leii zong a lungdam hi; tua banah ka tahsa zong lametna sungah a hing ding hi.

²⁷Azieh pen nang in Misikhuo ah ka hla na nuasie sih ding a, na Mi Siengtho pa zong muotna nei thuohsah sih ding hi.

²⁸Nangma in hinna lampi nei lah zo hi; nei ompina tawh kipahna bukim nei bawlpieh ding hi,’ a ci hi.

²⁹“Sanggam Israel-te aw, pupi David’ si-in kivui zo a, tuni dongin a han zong eite tawh om hi, ci kimuongtahin na kung vuah kang gen thei hi.

³⁰Ama kamsang khat ahi a, Pasien in a kumpi topha tungah a suonlehlahte khat ka tosah ding hi, ci-in a kiciem lam ama in a thei hi.

³¹Tam thu a mukhol ziehin David in Messiah’[5] thawkiana thu a genna-ah, ‘Misikhuo ah ama kinuasie loin, a pumpi zong muot lo ding hi, a ci hi.

³²Pasien in tua Jesu thosah zo a, tami thu-ah kote zosie teci ka hi uhi.

³³Tua ahi ziehin Pasien’ zietlamah ama kilamsang zo a, note in Pa tung panin a kikamciemsa Hlagau Siengtho zong na sang zo ta vua, note in na mu uleh na zah uh ahi tami zong khu ama in ang buohsuh zo ta hi.

³⁴Bangzieh ahei cile vantungah David a kato sih a, ahi vangin ama in, “TOPA in ka TOPA kungah,

³⁵na keng ngahna munah na galte ka koi masangsie ka zietlamah to in,’ ci hi,” ci-in a gen hi.

³⁶Tua ahi ziehin note in na khailia uh tua Jesu, Pasien in TOPA le Messiah[6] a suohsah zo ta hi, ci thu Israel innkuon buppi in teltahin thei ta uheh,” a ci hi.

³⁷Amate in tam thu a zah ciengun a lungsim uh sukha a, Peter le adang sawltahpite kungah, “Sanggamte aw, bang ka bawl ding vuoi?” a ci uhi.

³⁸Peter in amate kungah, “Kisiakia unlen na mawnate uh a mai thei nadingin Jesu Khris’ min tawh ki-baptize un; tua hile note in Pasien’ letsong ahi Hlagau Siengtho na nga ding uhi.

³⁹Bangzieh ahei cile tua kamciem pen note, na suonlehlahte ule TOPA i Pasien in ama kunga a hlat gamlapi-a om mi zosie ading ahi hi,” a ci hi.

⁴⁰Tuale Peter in adang thu kiselna tampi tawh teci pangin, “Tami a gilo khang mite panin kihunkhie un,” ci-in amate a hanthawn hi.

⁴¹Tuaci’n a thugenna a um mite a kibaptize vua, khum ni-in mi tul thum bang kibelap hi.

⁴²Amate in sawltahpite’ thuhilna le kipawltonna ah a lunglut ciet vua, tuale khomun phalsuona le thungetna a neiton uhi.

⁴³Tuaci’n mi zosie a zausi vua, sawltahpite in na lamdangte le lim tampi a bawl uhi.

⁴⁴Thu um zosie omtonin na vannuoi a neiton uhi;

⁴⁵amate in amau’ neisate le vante zua-in mi khatpo’ kisapna zui-in tua sumte[7] a hawmpieh uhi.

⁴⁶Amate in biehinnpi sungah nisimin hun tampitah zangtonin, inn ah[8] khomun a phalsuo vua, kipahna le kiphalna lungsim[9] tawh an a ne uhi.

⁴⁷Amate in Pasien’ min phatin mite’ maipha zong a nga uhi. Pasien in nisimin gupna nga mi a kibelapsah hi.